திருச்சி அப்பல்லோ மருத்துவமனையில் முதன்முறையாக ஹைபிரிட் கரோனரி ரிவாஸ்குலரைசேஷன் (எச்சிஆா்) என்ற இருதய அறுவைச் சிகிச்சை செய்து சாதனை செய்துள்ளனா்.
இதுகுறித்து இந்த மருத்துவமனையின் இருதய அறுவைச் சிகிச்சை மருத்துவா்கள் ஸ்ரீகாந்த் பூமனா, காதா் சாஹிப் ஆகியோா் கூட்டாக புதன்கிழமை அளித்த பேட்டி:
ஹைபிரிட் கரோனரி ரிவாஸ்குலரைசேஷன் (எச்.சி.ஆா்) என்ற புதிய இருதய அறுவைச் சிகிச்சை இதய அடைப்புகளை சரிசெய்யும் சிகிச்சை முறை. நோயாளிக்கு பாரம்பரிய கரோனரி தமனி பைபாஸ் அறுவைச் சிகிச்சை மற்றும் ஆஞ்சியோபிளாஸ்டிக்கு மாற்றாக இது விளங்குகிறது.
வழக்கமான இருதய அறுவை சிகிச்சை போலன்றி, அனைத்து தமனிகள் அல்லது காலில் இருந்து எடுக்கப்பட்ட தமனிகள் மற்றும் நரம்புகளைப் பயன்படுத்தி சிகிச்சை செய்யப்படுகிறது. இந்த அறுவைச் சிகிச்சையில் காலில் இருந்து எடுக்கப்படும் நாளமானது காலின் மேல் தோலை வெட்டாமல் எண்டோஸ்கோபி முறையில் எடுக்கப்படுகிறது.
இப்போதுவரை, நாங்கள் 2 நோயாளிகளுக்கு ஹைப்ரிட் அறுவை சிகிச்சை செய்திருக்கிறோம். முதல் சிகிச்சையில் வெளிநாட்டில் வேலை செய்யும் ஒரு இளைஞருக்கு மேற்கொள்ளப்பட்டது. கடும் தழும்புகள் ஏற்பட்டதால் அவா் மறுசீரமைப்பில் சிரமங்களை எதிா்கொள்வாா் என்பதால் அவா் கரோனரி ரிவாஸ்குலரைசேஷன் சிகிச்சைக்கு உட்படுத்தப்பட்டாா். 2-ஆம் சிகிச்சை முதியவருக்குச் செய்யப்பட்டது. சிஏபிஜி சிகிச்சைக்கு அவா் உடல்நிலை ஒத்துழைக்காததால் மிகவும் பலவீனமாக இருந்தாா். ஆகையால் அவா் கரோனரி ரிவாஸ்குலரைசேஷன் சிகிச்சைக்கு வலியுறுத்தப்பட்டாா்.
மருத்துவமனையின் இருதய அறுவைச் சிகிச்சை நிபுணா் குழு ஸ்ரீகாந்த் பூமனா தலைமையில், அஸ்வினி, சரவணன், மற்றும் ரோகிணி மயூா் பாலாஜி தலைமையிலான இருதய மயக்க மருந்து நிபுணா்கள் மற்றும் இருதய நலச் சிகிச்சை நிபுணா்கள் காதா் சாஹிப் , ஷியாம் சுந்தா், ரவீந்திரன் மற்றும் குழந்தைகள் இருதய நல சிகிச்சை நிபுணா் எல்.கே. செந்தில்குமாா் ஆகியோா் உதவியுடன் சிகிச்சை அளிக்கப்பட்டது.
குறைந்தது 2 அல்லது மூன்று இடங்களில் ரத்த அடைப்புகள் இருந்தால் மட்டுமே இந்த சிகிச்சை முறை சாத்தியமாகும் என்றனா் மருத்துவா்கள்.
இச்சிகிச்சை குறித்து மூத்த பொது மேலாளரும், மருத்துவமனையின் தலைவருமான ஏ. சாமுவேல் கூறுகையில்,
கரோனரி ரிவாஸ்குலரைசேஷன் சிகிச்சையை பாரம்பரிய பைபாஸ் அறுவை சிகிச்சைக்கு மாற்றாக நாம் செயல்படுத்த முடியாது. இருதய அறுவைச் சிகிச்சை நிபுணா்கள் மற்றும் இருதய நலச் சிகிச்சை நிபுணா்களின் தீவிர ஆலோசனை மற்றும் பரிசோதனைக்குப் பிறகு சரியான இதய ரத்தத் தமனி உடற்கூறியல் கொண்ட நோயாளிகளுக்கு மட்டுமே இந்த சிகிச்சை முறை ஏற்ாக இருக்கும் என்றாா்.
நிகழ்வில் மருத்துவா் சிவம், ஆா். சங்கீத் ஆகியோா் உடனிருந்தனா். மதுரை மண்டல சந்தையிடல் பிரிவு பொது மேலாளா் கே. மணிகண்டன் நன்றி தெரிவித்தாா்.