சா்வதேச தபால்கள் சேவையில் திருச்சி மத்திய மண்டலத்துக்கு நடப்பு நிதியாண்டு ரூ. 5.75 கோடி வருவாய் கிடைத்துள்ளது என்றாா் அதன் தலைவா் ஆ. கோவிந்தராஜன்.
திருச்சி தலைமை அஞ்சல் அலுவலகத்தில் புதன்கிழமை நடைபெற்ற குடியரசு தின விழாவில் தேசியக் கொடியேற்றி அவா் பேசியது:
கரோனா காலத்திலும் மத்திய மண்டல அஞ்சல் அலுவலகம் சிறப்பாகப் பணியாற்றியுள்ளது. 2015 முதல் தற்போது வரை திருச்சி அஞ்சல் மண்டலத்தில் மட்டும் 6.58 லட்சம் பெண் குழந்தைகள் செல்வமகள் திட்டத்தில் இணைக்கப்பட்டுள்ளனா்.
மேலும், நடப்பு நிதியாண்டில் 7.65 லட்சம் அஞ்சலச் சேமிப்புக் கணக்குகளும் தொடங்கப்பட்டுள்ளன. கிராமிய அஞ்சல் ஆயுள் காப்பீட்டில் 37 ஆயிரம் போ் இணைக்கப்பட்டுள்ளனா். சா்வதேச தபால் சேவையில் மட்டும் 21,644 தபால்களை கையாண்டு ரூ. 5.75 கோடி வருவாய் ஈட்டியுள்ளது.
திருச்சி, தஞ்சாவூா் தலைமை அஞ்சலங்களில் பாா்சல் பேக்கிங் மையம் சிறப்பாகச் செயல்படுகிறது. காரைக்கால், கும்பகோணம், தெப்பக்குளம் ஆகியவற்றைத் தொடா்ந்து அனைத்து தலைமை மற்றும் முக்கிய துணை அலுவலகங்களிலும் பேக்கி சேவை மையம் அறிமுகப்படுத்தப்படவுள்ளது.
கடந்த 8 மாதங்களில் 1. 88 லட்சம் பாா்சல்கள் பாதுகாப்பான முறையில் கையாண்டு 2.32 கோடி வருவாய் ஈட்டியுள்ளது. பாா்சல் டிராக்கிங் வசதியும் அறிமுகப்படுத்தப்பட்டுள்ளது. இதுமட்டுமல்லாது திருச்சி மண்டலத்தில் 387 ஆதாா் சேவை மையங்களைச் சிறப்பாக செயல்படுத்தி வருகிறது. ஆன்லைன் வங்கி சேவை வசதியும் அறிமுகம் செய்யப்பட்டுள்ளது என்றாா் அவா்.
விழாவில் சிறப்பாக பணியாற்றிய அஞ்சலக ஊழியா்கள் பாராட்டுச் சான்றிதழ், பரிசு வழங்கிக் கெளரவிக்கப்பட்டனா். அனைத்துப் பிரிவு அலுவலா்கள், அஞ்சலக ஊழியா்கள் மற்றும் குடும்பத்தினா் கலந்து கொண்டனா்.