கடந்த ஆகஸ்ட் மாதத்தில் இந்திய வாகனங்களின் விற்பனை இதுவரை இல்லாத அளவுக்கு வீழ்ச்சியடைந்துள்ளது.
இதுகுறித்து இந்திய வாகன உற்பத்தியாளர்கள் சங்கம் (எஸ்ஐஏஎம்) வெளியிட்டுள்ள புள்ளிவிவரங்கள் தெரிவிப்பதாவது:
இந்திய வாகனச் சந்தையின் அனைத்துப் பிரிவுகளும் கடந்த ஆகஸ்ட் மாதத்தில் சரிவைச் சந்தித்துள்ளன.
வாகன விற்பனை தொடர்பான புள்ளிவிவரங்களை எஸ்ஐஏஎம் சேகரித்த 1997-98-ஆம் ஆண்டுக்குப் பிறகு இதுவரை இல்லாத அளவுக்கு அனைத்து ரக வாகனங்களின் விற்பனையும் வீழ்ச்சியடைந்துள்ளது.
கார்கள், இரு சக்கர வாகனங்கள், வர்த்தக வாகனங்கள் ஆகியவற்றின் விற்பனை கடந்த ஆகஸ்ட் மாதத்தில் 18,21,490 வாகனங்களாக இருந்தது. இது, கடந்த 2018-ஆம் ஆண்டு விற்பனையான 23,82,436 வாகனங்களோடு ஒப்பிடுகையில் 23.55 சதவீதம் குறைவாகும்.
முந்தைய ஜூலை மாதத்தில் அனைத்து ரக வாகனங்களின் விற்பனை, 18,25,148-ஆக இருந்தது. முந்தைய ஆண்டின் ஜூலை மாதத்தோடு ஒப்பிடுகையில் இந்த விற்பனை 18.71 சதவீதம் குறைவாக இருந்தது. அது, கடந்த 19 ஆண்டுகளில் காணப்படாத மிகப் பெரிய வீழ்ச்சியாக இருந்தது.
இந்த நிலையில், ஆகஸ்ட் மாத வாகன விற்பனை, இதுவரை இல்லாத அளவுக்கு வீழ்ச்சியடைந்துள்ளது என்று எஸ்ஐஏஎம்-மின் புள்ளிவிவரங்கள் தெரிவிக்கின்றன.