தகவல் தொழில்நுட்ப வன்பொருள் தயாரிப்பு நிறுவனமான டிவிஎஸ் எலக்ட்ரானிக்ஸ் முதல் காலாண்டு வருவாயாக ரூ.29.32 கோடியை ஈட்டியுள்ளது. இதுகுறித்து அந்த நிறுவனம் மேலும் கூறியுள்ளதாவது:
கொவைட்-19 பெருந்தொற்று மற்றும் அதன் விளைவாக அமல்படுத்தப்பட்ட பொது முடக்கம் நிறுவனத்தின் வழக்கமான வா்த்தக செயல்பாடுகளில் கடந்த மாா்ச் கடைசி வாரத்திலிருந்து கடும் பாதிப்புகளை ஏற்படுத்தியுள்ளது. அதன் எதிரொலியாக, நிறுவனம் நடப்பு நிதியாண்டின் ஏப்ரல்-ஜூன் முதல் காலாண்டில் ஈட்டிய வருவாய் கடந்த நிதியாண்டுடன் ஒப்பிடுகையில் பாதிக்கும் கீழ் குறைந்து ரூ.29.32 கோடியானது. கடந்த 2019-20 நிதியாண்டில் வருவாய் ரூ.63.42 கோடியாக காணப்பட்டது. கடந்த நிதியாண்டின் முதல் காலாண்டில் நிறுவனம் ரூ.1.97 கோடி நிகர லாபம் ஈட்டியிருந்த நிலையில், நடப்பு நிதியாண்டில் ரூ.9.75 கோடி இழப்பு ஏற்பட்டது என டிவிஎஸ் எலக்ட்ரானிக்ஸ் தெரிவித்துள்ளது.