அதானி கிரீன் எனா்ஜி நிறுவனம் ஜூன் காலாண்டில் ரூ.21.75 கோடி நிகர லாபத்தைப் பெற்றுள்ளது. இதுகுறித்து பங்குச் சந்தையிடம் அந்த நிறுவனம் தெரிவித்துள்ளதாவது:
அதானி கிரீன் எனா்ஜி நடப்பு 2020-21-ஆம் நிதியாண்டின் ஏப்ரல்-ஜூன் காலாண்டில் ரூ.878.14 கோடியை மொத்த வருவாயாக ஈட்டியது. இது, கடந்த நிதியாண்டின் இதே காலகட்டத்தில் நிறுவனம் ஈட்டிய வருவாய் ரூ.675.23 கோடியுடன் ஒப்பிடுகையில் மிக அதிகம்.வருவாய் அதிகரித்ததன் விளைவாக, நிறுவனம் நடப்பு நிதியாண்டின் ஜூன் காலாண்டில் ரூ.21.75 கோடி நிகர லாபத்தை பதிவு செய்துள்ளது. அதேசமயம், கடந்த 2019-20 நிதியாண்டின் ஏப்ரல்-ஜூன் காலாண்டில் நிறுவனம் ரூ.97.44 கோடி நிகர இழப்பைச் சந்தித்திருந்தது. நடப்பு நிதியாண்டின் முதல் காலாண்டில், நிறுவனத்தின் நிகர ஏற்றுமதி (மின்சாரம்) 1,382 மில்லியன் யூனிட்டுகளாக இருந்தது. இது, கடந்த நிதியாண்டின் இதே காலகட்டத்துடன் ஒப்பிடுகையில் 24 சதவீதம் அதிகமாகும்.