இந்தியச் சந்தையில் கடந்த 2 ஆண்டுகளாக இழப்பைச் சந்தித்து வந்த சொகுசு காா் தயாரிப்பு நிறுவனமான மொ்சிடிஸ்-பென்ஸ், கடந்த மாா்ச் 31-ஆம் தேதியில் நிறைவடைந்த நிதியாண்டில் வரிக்குப் பிந்தைய லாபமாக ரூ.441.4 கோடியை ஈட்டியுள்ளது.
இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது: 2020-21 மற்றும் 2019-20-ஆம் நிதியாண்டுகளில் நிறுவனம் முறையே ரூ. 107.1 கோடி மற்றும் ரூ. 86.5 கோடியை வரிக்குப் பிந்தைய இழப்பாக பதிவு செய்தது.
இந்த நிலையில் 2021-22-ஆம் நிதியாண்டில் நிறுவனம் ரூ.441.4 கோடியை வரிக்குப் பிந்தைய லாபம் ஈட்டியுள்ளது.
அந்த நிதியாண்டில் நிறுவனத்தின் செயல்பாட்டு வருவாய் ரூ.6,188.5 கோடியாக இருந்தது. 2021-ஆம் ஆண்டு மாா்ச் 31-இல் நிறைவடைந்த நிதியாண்டில், கரோனா நெருக்கடி காரணமாக காா்களின் விற்பனையில் பின்னடைவு ஏற்பட்டது. இதன் விளைவாக நிறுவனத்தின் செயல்பாட்டு வருவாய் அப்போது ரூ.3,639 கோடியாகக் குறைந்தது. அதற்கு முந்தைய நிதியாண்டில் அது ரூ.4,819 கோடியாக இருந்தது என்று அந்த அறிக்கையில் குறிப்பிடப்பட்டுள்ளது.