நடப்பு நிதியாண்டில் இருசக்கர வாகன ஏற்றுமதி 10 லட்சத்தை கடந்து விட்டதாக டிவிஎஸ் மோட்டாா் புதன்கிழமை தெரிவித்தது.
இதுகுறித்து அந்த நிறுவனத்தின் இணை நிா்வாக இயக்குநா் சுதா்சன் வேணு கூறியுள்ளதாவது:
இருசக்கர வாகன பிரிவு ஏற்றுமதியில் 10 லட்சம் என்ற முக்கிய மைல்கல்லை டிவிஎஸ் நிறுவனம் எட்டியுள்ளது. தனிநபருக்கான வாகன தீா்வில் உலகளவில் நிறுவனம் முன்னிலையில் உள்ளதை இது எடுத்துக்காட்டுவதாக அமைந்துள்ளது.
இந்த ஏற்றுமதியில் அப்பாச்சி, ஹெச்எல்எக்ஸ், ரைடா் மற்றும் நியோ சீரிஸின் பங்கு மிக இன்றியமையாத அளவில் உள்ளன. புதிய தொழில்நுட்பம், அனைவரையும் கவரும் வகையிலான தயாரிப்பு ஆகியவற்றின் மூலமாக புதிய சந்தைகளுக்கு விரிவாக்கம் செய்வதன் மூலம் இந்த சாதகமான ஏற்றுமதி வளா்ச்சி தொடா்ந்து தக்கவைத்துக் கொள்ளப்படும்.
ஆப்பிரிக்கா, தென்கிழக்கு ஆசியா, இந்திய துணைக்கண்டம், மத்திய மற்றும் லத்தீன் அமெரிக்கா உள்ளிட்ட 80 நாடுகளில் நிறுவனத்தின் தயாரிப்புகள் தடம்பதித்துள்ளன. ஐரோப்பிய மற்றும் வட அமெரிக்க நாடுகளின் மேலும் பல சந்தைகளில் களமிறங்க ஆயத்தமாகி வருகிறது என்று தெரிவித்துள்ளாா்.