நாட்டின் மிகப்பெரிய பொதுத் துறை வங்கியான பாரத ஸ்டேட் வங்கி (எஸ்பிஐ) கடன் மற்றும் டெபாசிட்டுக்கான வட்டியை உயா்த்தியுள்ளதாக செவ்வாய்க்கிழமை அறிவித்தது.
இதுகுறித்து அந்த வங்கியின் வலைதளத்தில் தெரிவிக்கப்பட்டுள்ளதாவது:
ரூ.2 கோடிக்கும் குறைவான டெபாசிட்டிற்கான வட்டி 0.20 சதவீதம் அதிகரிக்கப்பட்டுள்ளது. அதன்படி, 211 நாள்கள்- ஓராண்டுக்கும் குறைவான டெபாசிட்டிற்கான வட்டி விகிதம் 4.40 சதவீதத்திலிருந்து 4.60 சதவீதமாக அதிகரிக்கப்பட்டுள்ளது. இந்த திட்டத்தில் மூத்தகுடிமக்களுக்கு வழங்கப்படும் வட்டி 4.90 சதவீதத்திலிருந்து உயா்ந்து 5.10 சதவீதமாக இருக்கும். மாற்றியமைக்கப்பட்ட இந்த வட்டி விகிதம் ஜூன் 14-ஆம் தேதியிலிருந்து அமலுக்கு வந்துள்ளது.
அதேபோன்று, வழங்கப்படும் கடன்களுக்கான அடிப்படை (எம்சிஎல்ஆா்) வட்டி விகிதமும் 0.20 சதவீதம் வரை அதிகரிக்கப்பட்டுள்ளது. அதன்படி, முன்பிருந்த ஓரண்டாக்கான எம்சிஎல்ஆா் வட்டி விகிதம் 7.20 சதவீதத்திலிருந்து 7.40 சதவீதமாக உயா்த்தப்பட்டுள்ளது. இது, ஜூன் 15-ஆம் தேதியிலிருந்து அமலுக்கு வரும் என எஸ்பிஐ தெரிவித்துள்ளது.
வாகனம், வீட்டு வசதி, தனிநபா் உள்ளிட்ட பெரும்பாலான வாடிக்கையாளா்கள் பெறும் கடன் அனைத்தும் எம்சிஎல்ஆா் உடன் தொடா்புடையதாகவே இருப்பதால் அவா்கள் செலுத்தும் மாதாந்திர தவணைத் தொகை கணிசமாக அதிகரிக்கும் நிலை ஏற்பட்டுள்ளது.