பொதுத் துறையைச் சோ்ந்த ஸ்டீல் அத்தாரிடி ஆஃப் இந்தியா (செயில்) நிறுவனத்தின் நிகர லாபம் கடந்த டிசம்பா் காலாண்டில் 65 சதவீத சரிவைச் சந்தித்துள்ளது.
இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது: கடந்த டிசம்பா் மாதத்துடன் நிறைவடைந்த நடப்பு நிதியாண்டின் 3-ஆவது காலாண்டில் நிறுவனத்தின் நிகர லாபம் ரூ.542.18 கோடியாக பதிவு செய்யப்பட்டுள்ளது.
கடந்த நிதியாண்டின் இதே காலாண்டில் நிகர லாபம் ரூ.1,528.54 கோடியாக இருந்தது. அதனுடன் ஒப்பிடுகையில் தற்போது நிகர லாபம் 65 சதவீதம் சரிந்துள்ளது.
மதிப்பீட்டு காலாண்டில் நிறுவனத்தின் மொத்த செலவினங்கள் ரூ.24,825.11 கோடியாக உள்ளது. கடந்த நிதியாண்டின் இதே காலகட்டத்திய மொத்த செலவினங்களான ரூ.23,209.88 கோடியுடன் ஒப்பிடுகையில் இது அதிகமாகும்.
எனினும், 2021-ஆம் நிதியாண்டின் 3-ஆவது காலாண்டில் ரூ.25,398.37 கோடியாக இருந்த நிறுவனத்தின் வருவாய், நடப்பு நிதியாண்டின் இதே காலாண்டில் ரூ.25,140.16 கோடியாகக் குறைந்துவிட்டது என்று அந்த அறிக்கையில் தெரிவிக்கப்பட்டுள்ளது.