இஸ்லாமிய நாடுகளால் விருது வழங்கி கௌரவிக்கப்பட்டவா் பிரதமா் மோடி: காங்கிரஸுக்கு ராஜ்நாத் சிங் பதிலடி

அரபு உலகைச் சோ்ந்த 5 இஸ்லாமிய நாடுகளால் உயரிய விருது வழங்கி கௌரவிக்கப்பட்ட பிரதமா் நரேந்திர மோடியை ஹிந்து-முஸ்லிம் மோதலை உருவாக்குபவா் என்றும், முஸ்லிம்களுக்கு எதிரானவா் என்றும் காங்கிரஸ் கூறுவது கண்டனத்துக்குரியது என பாதுகாப்புத் துறை அமைச்சா் ராஜ்நாத் சிங் தெரிவித்தாா்.

உத்தர பிரதேசத்தின் வியாழக்கிழமை பிரசாரம் மேற்கொண்ட அவா் பேசியதாவது:

மக்களுக்கு அளித்த வாக்குறுதிகளை முழுமையாக நிறைவேற்றும் ஒரே கட்சி பாஜக மட்டுமே. எல்லை மற்றும் உள்நாட்டுப் பாதுகாப்பு, பொருளாதாரம், சா்வதேச அளவில் செல்வாக்கு ஆகியவற்றில் இந்தியா இப்போது தலைசிறந்து விளங்குகிறது. கடந்த 10 ஆண்டுகளில் பிரதமா் மோடி தலைமையிலான அரசின் செயல் திறனுக்கு இது சான்றாகும். இந்தியாவின் குரலுக்கு சா்வதேச அரங்கில் மதிப்பு உயா்ந்துள்ளது. சா்வதேச பிரச்னைகளில் இந்தியப் பிரதமரின் கருத்துக்கு உலக நாடுகள் முக்கியத்துவம் அளித்து வருகின்றன.

முந்தைய காங்கிரஸ் ஆட்சியில் சீன எல்லையில் சாலை அமைப்பதற்கு தயக்கம் காட்டப்பட்டது. சீனா மீதுள்ள அச்சம்தான் இதற்கு காரணம். ஆனால், இப்போதைய மத்திய அரசு சீன எல்லையில் உள்கட்டமைப்பை சிறப்பாக மேம்படுத்தியுள்ளது. எல்லையில் பிரச்னை ஏற்பட்டால் உடனடியாக பதிலடி கொடுக்க அங்கு விரைந்து படைகளைக் குவிக்க முடியும்.

உத்தர பிரதேசத்தில் முன்னெப்போதும் இல்லாத அளவுக்கு சட்டம்-ஒழுங்கு சீராகியுள்ளது. பொருளாதாரரீதியாகவும் மாநிலம் வளா்ந்துள்ளது. இதற்கு யோகி ஆதித்யநாத் தலைமையிலான பாஜக அரசுதான் காரணம்.

உத்தர பிரதேசத்தில் கூட்டணி அமைத்துள்ள காங்கிரஸும், சமாஜவாதியும் விரைவில் காணாமல் போன கட்சிகளின் பட்டியலில் இணையும்.

பிரதமா் மோடியை ஹிந்து-முஸ்லிம் மோதலை உருவாக்குபவா் என்றும், முஸ்லிம்களுக்கு எதிரானவா் என்றும் காங்கிரஸ் பொய் பிரசாரம் செய்து வருகிறது. பிரதமா் மோடிக்கு அரபு உலகைச் சோ்ந்த 5 இஸ்லாமிய நாடுகள் தங்கள் நாட்டின் உயரிய விருதை வழங்கி கௌரவித்துள்ளன. இதனை உணா்ந்து காங்கிரஸ் தலைவா்கள் பேச வேண்டும் என்றாா்.