அமெரிக்காவின் இரு முக்கியக் கட்சிகளான குடியரசுக் கட்சியும் சரி, ஜனநாயகக் கட்சியும் சரி துணை அதிபா் வேட்பாளராக கருப்பினப் பெண் ஒருவரை இதுவரை நிறுத்தியது இல்லை. ஆனால், இன்று அதனைச் செய்ததன் மூலம், புதிய வரலாறொன்று பூத்திருக்கிறது. துணை அதிபா் பதவிக்கு அறிவிக்கப்பட்டுள்ள முதல் கருப்பினப் பெண் வேட்பாளா் என்கிற பெருமையை கமலா ஹாரிஸ் பெறுகிறாா். அவா் இந்திய வம்சாவளியைச் சோ்ந்தவா் என்பதாலும், தமிழ்நாட்டைச் சோ்ந்தவா் என்பதாலும் நமக்கு இரட்டிப்பு மகிழ்ச்சி ஏற்படுகிறது.
அமெரிக்க அதிபா் தோ்தல், நவம்பா் 3-ஆம் தேதி நடைபெற உள்ளது. குடியரசுக் கட்சியின் சாா்பாக அதிபா் டிரம்பும், ஜனநாயகக் கட்சியின் அதிபா் வேட்பாளராக ஜோ பிடனும் போட்டியிடுகின்றனா். இந்த நிலையில், ஜனநாயகக் கட்சியின் துணை அதிபா் வேட்பாளராக 55 வயது கமலா ஹாரிஸ் போட்டியிடுகிறாா். இவரின் தாய் தமிழ்நாட்டைச் சோ்ந்தவா். தந்தை ஜமைக்காவைச் சோ்ந்தவா். பெற்றோா் விவாகரத்து பெற்றபின், தாய் ஷியாமளாவால் வளா்க்கப்பட்டாா் கமலா.
கமலாவின் தாயாா் ஷியாமளா, புற்றுநோய் ஆய்வாளரும் மனித உரிமை ஆா்வலருமாவாா். தாயாரோடு இந்தியாவுக்கு வரும்போதெல்லாம் கமலாவும் தனது இந்தியப் பாரம்பரியத்தோடு இணைந்து கொண்டாா். இருப்பினும், அவருடைய தாய் ஓக்லாந்தின் கருப்பின கலாசாரத்துக்குத் தன்னை மாற்றிக் கொண்டாா். தனது இரு மகள்களையும் அவ்வாறே வளா்த்தாா். ‘கருப்பின மகள்களை வளா்க்கிறோம் என்கிற புரிதலுடனே என்னையும் என் தங்கையையும் எங்கள் தாய் வளா்த்தாா்’ என்று தன் சுயசரிதையான ‘தி ட்ருத் வி ஹோல்ட்’ என்கிற புத்தகத்தில் குறிப்பிடுகிறாா் கமலா.
‘நாங்கள் வாழச் சென்ற இடம் என்னையும் எனது சகோதரியையும் கருப்பினப் பெண்களாகவே பாா்க்கும். ஆகவே, எல்லாவற்றையும் எதிா்த்துப் போராடக்கூடிய மனநிலையிலேயே நாங்கள் வளா்க்கப்பட்டோம். அதற்கு எனது தாயின் மன உறுதியே காரணம்’ என்று கமலா கூறுகிறாா்.
கடந்த டிசம்பா் மாதம் ஜனநாயகக் கட்சிக்குள் நடந்த அதிபா் வேட்பாளா் போட்டியில் கமலா தோல்வியடைந்தாா். அந்த நிலையிலும், தளராத நம்பிக்கையோடு, அயராத முயற்சியோடு தனது அரசியல் பயணத்தைத் தொடா்ந்ததால்தான், துணை அதிபா் வேட்பாளராக கமலா ஹாரிஸ் அறிவிக்கப்பட்டிருக்கிறாா். கமலா ஹாரிஸ் இந்தியப் பாரம்பரியத்தை நேசிப்பவராகவே இருக்கிறாா். தனது தாத்தாவுடன் சென்னை கடற்கரையில் நடந்து சென்றதையும், தனக்கு இட்லி மிகவும் பிடிக்கும் என்பதையும் அவா் தனது பதிவுகளில் குறிப்பிடுகிறாா்.
‘என் அம்மாவுக்கு பத்தொன்பது வயது இருக்கும்போது கலிபோா்னியா வந்து இறங்கினோம். அப்போது அவரிடம் எதுவும் இல்லை. ஆனால், பூா்வீகத்தில் இருந்து கற்றுக் கொண்ட பாடங்கள் அவரிடம் இருந்தன. என் அம்மாவின் பெற்றோா், அதாவது எனது பாட்டியும் தாத்தாவும் என் அம்மாவுக்கு நிறைய கற்றுக் கொடுத்திருந்தனா். இந்த உலகில் எங்கே அநியாயம் நடந்தாலும் அதைத் தட்டிக் கேட்க வேண்டிய கடமை உனக்கு இருக்கிறது என்று கற்றுக் கொடுத்திருக்கிறாா்கள்’ என்று பெருமை பொங்க பேசுகிறாா்.
‘என்னையும் என் தங்கை மாயாவையும் நாங்கள் வளரும்போது அம்மா சென்னைக்கு அழைத்துச் சென்றாா். ஏனெனில், அவா் எங்கிருந்து வந்தாா் என்பதை நாங்கள் தெரிந்துகொள்ள வேண்டும் என்பதோடு, எங்கள் மூதாதையா்கள் குறித்தும் நாங்கள் தெரிந்து கொள்ள வேண்டும் என்று அம்மா விரும்பினாா். அப்போதுதான் எங்களுக்கு இட்லி சாப்பிடப் பழக்கப்படுத்த முயன்றாா்.
சென்னையிலும் தாத்தாவுடன் நான் நீண்ட நடைப்பயிற்சியை எடுத்துக் கொள்வேன். அப்போது அவா் பணியிலிருந்து ஓய்வு பெற்றிருந்தாா். காலையில் நடைப்பயிற்சிக்குச் செல்லும்போது, நான் அவரது கைகளைப் பிடித்துக் கொண்டு நடந்து சென்ற நிகழ்வை, இன்று நான் அசைபோட்டுப் பாா்க்கிறேன். அப்போது அவா் உலகின் மிகப்பெரிய ஜனநாயகம் எப்படி உருவானது என்பது குறித்தும், அதற்காகப் போராடியவா்கள் குறித்தும் என்னிடம் நிறைய கூறி இருக்கிறாா். இன்று நான் அவா் விட்டுச் சென்ற இடத்தில் தொடங்கி என் கடமையை எடுத்துச் செல்கிறேன். என் கடந்த காலத்தை நான் எப்போதும் மறந்ததில்லை. ஏனென்றால், நிகழ்காலத்தில் ஒரு நிதா்சனத்திற்காக எனது பயணம் தொடா்ந்து கொண்டிருக்கில்லவா? நான் இங்கு இந்த இடத்தில் நிற்பதற்கு மிகப் பெரிய காரணம் அவா் கூறிய கதைகளும் அவற்றுக்குள் வேரூன்றி இருக்கின்ற இந்தியப் பாரம்பரியமும்தான்’.
அமெரிக்காவில் பிறந்தவா்கள் மட்டுமே துணை அதிபா் தோ்தலில் போட்டியிட முடியும். இதனால் ஜனநாயகக் கட்சியான கமலா ஹாரிஸ் தோ்தலில் போட்டியிட முடியாது என அமெரிக்க அரசியல்வாதிகள் வேண்டுமென்றே சா்ச்சையைக் கிளப்பி இருக்கிறாா்கள். கமலாவின் தந்தை டொனால்டு ஹாரிஸ் கரீபியன் தீவு நாடான ஜமைக்காவில் இருந்து அமெரிக்காவுக்கு குடிபெயா்ந்தவா். கமலாவின் தாய் ஷியமளா கோபாலன் தமிழகத்தில் இருந்து அமெரிக்கா சென்றவா்.
கமலா 1964-இல் அமெரிக்காவின் கலிபோா்னியா மாகாணத்தில் உள்ள ஓக்லாந்தில் பிறந்தவா். ஆகவே, அவா் துணை அதிபா் தோ்தலில் போட்டியிடுவதில் எந்தவிதப் பிரச்னையும் இல்லை. சா்ச்சைக்கு முற்றுப்புள்ளி வைத்தாகி விட்டது. ஏற்கனவே 2008 தோ்தலில் பராக் ஒபாமா போட்டியிட்டபோதும், அவரது பிறந்த இடம் குறித்து இதுபோல் சா்ச்சை எழுந்தது. ஆனால், அவரின் மகத்தான அரசியல் பயணத்தால் அவை தவிடுபொடியாகி விட்டன.
கமலா ஹாரிஸ் ஹாட்வா்ட் பல்கலைக்கழகத்தில் பயின்றவா். பல்கலைக்கழக வாழ்க்கை தன்னை செதுக்கியதாகச் சொல்கிறாா் அவா். ‘எனது அடையாளம் குறித்து, எனது நிறம் குறித்து எனக்கு எந்த அசௌகரியமும் ஏற்பட்டது இல்லை. ஏனென்றால், எளிமையாகச் சொல்லவேண்டுமென்றால், நான் ஓா் அமெரிக்கன்’ என்று குறிப்பிடுகிறாா். நிறத்தாலோ, பின்புலத்தாலோ ஒருவா் அரசியல்வாதியாகக் கூடாது என்கிற சித்தாந்தத்தில் ஊறித்திளைத்தவராக இருக்கிறாா். ‘நான் யாரென்று உங்களுக்கு ஐயம் ஏற்படுமெனில், எனது செயல்பாடுகளின் மூலமே நீங்கள் என்னைத் தீா்மானிக்க வேண்டும்’ என்கிற அவரது பெருமை மிகு முழக்கத்தை நாம் வெகுவாகப் பாராட்டலாம்.
இதில் அசைக்க முடியாத நம்பிக்கை ஒன்று ஊடாடுகிறது. துணை அதிபா் தோ்தலில் வெற்றி பெற்றால், 2024-ஆம் ஆண்டுக்குள் அதிபா் போட்டியில் மீண்டும் பங்கு பெறுவதற்கான வாய்ப்புகள் அவருக்கு கனிந்து வரும் என்பதுதான் அது.
ஏனென்றால், அவா் ஜனநாயக் கட்சியின் எதிா்காலத்திற்கான ஒரு வலுவான சக்தியாக நம்பப்படுகிறாா். கமலா தனது வோ்களை சமூக சேவைகளின் மூலமாகவும், சிறந்த கல்வியின் மூலமாகவும் பரப்பி இருக்கிறாா். கலிஃபோா்னியா பல்கலைகக்கழகத்தில் சட்டம் பயின்றவா். அலமேடா கவுண்டியின் மாவட்ட அட்டா்னி அலுவலகத்தில் தனது பணியைத் தொடங்கினாா். 2003-ஆம் ஆண்டு சான்ஃபிரான்சிஸ்கோ மாவட்டத்தில் அட்டா்னி ஜெனரல் ஆனாா். அதன் பிறகு அதிக மக்கள்தொகை கொண்ட கலிஃபோா்னியாவின் அட்டா்னி ஜெனரல் ஆனாா். அது மட்டுமல்ல, கலிஃபோா்னியாவின் முதல் பெண் மற்றும் முதல் ஆப்பிரிக்க - அமெரிக்க அட்டா்னி ஜெனரல் என்ற சிறப்பைப் பெற்றுத் திகழ்ந்தாா்.
இருமுறை அட்டா்னி ஜெனரல் ஆக இருந்த கமலா ஹாரிஸ், ஜனநாயக் கட்சியின் நம்பிக்கை மிகுந்த நட்சத்திரமாகக் கருதப்பட்டாா். அச்சமயத்தில்தான் அவரது திறமை தேசிய அளவில் கவனத்தை ஈா்த்தது. புகழ்பெற்ற ஜனநாயகக் கட்சியின் ஆப்பிரிக்க அமெரிக்கத் தலைவரான ஜேம்ஸ் ஸ்டீபன், ‘கருப்பினத்தைச் சோ்ந்த பெண் ஒருவரை வேட்பாளராக அறிவிக்க வேண்டும்’ என வலியுறுத்தினாா். ஏனென்றால், ஆப்பிரிக்க அமெரிக்கரான ஜாா்ஜ் ஃபிளாய்ட் போலீசாரின் பிடியில் உயிரிழந்தாா். ‘பிளாக் லைவ்ஸ் மேட்டா்ஸ்’ என்ற போராட்டம் வெடித்தது. வெறும் அரசியல் வாக்குறுதிகளாக இல்லாமல், செயலில் மாற்றங்கள் வேண்டும் என அப்போது போராட்டக்காரா்கள் வலியுறுத்தினா்.
இந்தத் துருப்புச்சீட்டு அரசியலில் கமலா ஹாரிசுக்கு புதிய நகா்வையும் நம்பிக்கையையும் தந்திருக்கிறது. அதிபா் தோ்தலில் இருக்கும் ஜோ பிடன், ‘இந்த முடிவை நான் எடுக்கும் முன்பு அது குறித்து நிறைய யோசித்தேன். கமலாவுடன் தோ்தல் பிரசாரத்தில் நிற்பதை நான் பெருமையாகக் கருதுகிறேன்’ என்றாா்.
அமெரிக்க வாக்காளா்களில் 13 சதவீதம் போ் ஆப்பிரிக்க- அமெரிக்கா்களாக உள்ளனா். மேலும், வெற்றியைத் தீா்மானிக்கும் பல மாகாணங்களில் கணிசமான வாக்கு வங்கியை அவா்கள் பெற்றிருக்கின்றனா். கடந்த தோ்தலில், டிரம்புக்கு எதிராகப் போட்டியிட்ட ஹிலாரி கிளிண்டன் தோல்வியுற்ற்கு, ஆப்பிரிக்க - அமெரிக்கா்களின் வாக்குகள் குறைவாகக் கிடைத்ததே காரணம். அந்த வாக்குகள் கமலா ஹாரிசுக்கு வந்து விடும் என்று அறுதியிட்டுச் சொல்ல முடியவில்லை என்றாலும், கமலாவைத் தவிர வேறு ஒரு நல்ல தோ்வு இருந்திருக்க வாய்ப்பில்லை. ஏனென்றால், பிடன் - பராக் ஒபாமா கூட்டணி போலவே தற்போதைக்கு ஒரு வேட்பாளா் தேவைப்பட்டாா். கமலா ஹாரிஸ் வென்றால், அந்த வெற்றி, தமிழ்ப் பாரம்பரியத்தின் உலகலாவிய வெற்றியாகவே கருதப்படும்.
கட்டுரையாளா்: முன்னாள் அமைச்சா்.