நாட்டின் 36 மாநிலங்கள்/யூனியன் பிரதேசங்களைச் சேர்ந்த 543 மக்களவைப் பிரதிநிதிகளைத் தேர்ந்தெடுக்க இத்தேர்தல் நடைபெறுகிறது.
மக்களவையுடன் சேர்த்து ஆந்திரம், அருணாசல பிரதேசம், ஒடிஸா, சிக்கிம் ஆகிய 4 மாநில சட்டப்பேரவைக்குத் தேர்தலும் 16 மாநிலங்களில் 35 சட்டப்பேரவைத் தொகுதிகளுக்கு இடைத்தேர்தலும் நடைபெறுகிறது.
இத்தேர்தலில் 96.8 கோடி பேர் வாக்களிக்க தகுதி பெற்றுள்ளனர். 85 லட்சம் பெண்கள் உள்பட 1.8 கோடி பேர் முதல் முறை வாக்காளர்கள் ஆவர்.
20-29 வயதில் 19.47 கோடி வாக்காளர்கள் உள்ளனர். 12 மாநிலங்களில் ஆண் வாக்காளரைவிட பெண் வாக்காளர்கள் அதிகம் உள்ளனர்.
85 வயதுக்கும் மேற்பட்ட மூத்த குடிமக்கள் மற்றும் மாற்றுத்திறனாளிகள் படிவம் 12டி-யின் மூலம் வீட்டிலிருந்தே வாக்களிக்கும் நடைமுறை முதல்முறையாக அறிமுகப்படுத்தப்பட்டுள்ளது.
நாடு முழுவதும் 10.5 லட்சம் வாக்குப்பதிவு மையங்கள் அமைக்கப்பட்டுள்ளன. 55 லட்சம் மின்னணு வாக்குப்பதிவு இயந்திரங்கள் பயன்படுத்தப்பட உள்ளன.
தேர்தல் மற்றும் பாதுகாப்புப் பணியில் 1.5 கோடி அலுவலர்கள் மற்றும் பாதுகாப்புப் படை வீரர்கள் ஈடுபட உள்ளனர்.
ஏப்ரல் 19 முதல் ஜூன் 1-ஆம் தேதி வரை 7 கட்டங்களாக தேர்தல் நடைபெறுகிறது.
21 மாநிலங்களின் 102 தொகுதிகளுக்கு முதல் கட்டமாக ஏப்.19-ஆம் தேதியும் 13 மாநிலங்களின் 89 தொகுதிகளுக்கு 2-ஆம் கட்டமாக ஏப்.26-ஆம் தேதியும் 12 மாநிலங்களின் 94 தொகுதிகளுக்கு 3-ஆம் கட்டமாக மே 7-ஆம் தேதியும் வாக்குப்பதிவு நடைபெறுகிறது.
10 மாநிலங்களின் 96 தொகுதிகளுக்கு 4-ஆம் கட்டமாக மே 13-ஆம் தேதியும் 8 மாநிலங்களின் 49 தொகுதிகளுக்கு 5-ஆம் கட்டமாக மே 20-ஆம் தேதியும் 7 மாநிலங்களின் 57 தொகுதிகளுக்கு 6-ஆம் கட்டமாக மே 25-ஆம் தேதியும் 8 மாநிலங்களின் 57 தொகுதிகளுக்கு 7-ஆம் கட்டமாக ஜூன் 1-ஆம் தேதியும் வாக்குப்பதிவு நடைபெறுகிறது.
தேர்தலில் பதிவான வாக்குகள் ஜூன் 4-ஆம் தேதி எண்ணப்படுகின்றன. அருணாசல பிரதேசம், சிக்கிம் மாநிலங்களுக்கான வாக்கு எண்ணிக்கை ஜூன் 2-ஆம் தேதி நடைபெறுகிறது. அவ்விரு மாநில சட்டப்பேரவைகளின் பதவிக்காலம் ஜூன் 2-ஆம் தேதி முடிவுக்கு வருவதால், தேர்தல் நடவடிக்கைகள் அன்றே நிறைவடைய வேண்டும் என்பதால் அங்கு முன்கூட்டியே வாக்கு எண்ணிக்கை நடைபெறுகிறது.
தொகுப்பு: மா.பிரவின்குமார்