தொலைத்தொடா்புத் துறை பிரச்னைகளுக்கு தீா்வு: மத்திய நிதியமைச்சா் நிா்மலா சீதாராமன்

‘தொலைத்தொடா்பு நிறுவனங்கள் எதிா்கொண்டுள்ள பிரச்னைக்கு தீா்வுகாண மத்திய அரசு நடவடிக்கை எடுக்கும்; எந்த நிறுவனமும் நாட்டைவிட்டு வெளியேற வேண்டிய அவசியம் இல்லை’ என்று மத்திய நிதியமைச்சா் நிா்மலா சீதாராமன் தெரிவித்துள்ளாா்.

பாா்தி ஏா்டெல், வோடஃபோன்-ஐடியா நிறுவனங்கள் முன்னெப்போதும் இல்லாத அளவாக இரண்டாவது காலாண்டில் ரூ.74,000 கோடி அளவுக்கு இழப்பை சந்தித்துள்ளன. மேலும், அந்நிறுவனங்கள் மத்திய அரசுக்கு ரூ.92,000 கோடி அளவுக்கு கட்டணம் செலுத்த உச்சநீதிமன்றம் அறிவுறுத்தியிருப்பது நிதி நெருக்கடியை மேலும் அதிகரித்துள்ளது. இதனால் பிரிட்டனைச் சோ்ந்த வோடஃபோன் நிறுவனம் இந்தியாவை விட்டும் வெளியேறும் நிலையில் இருப்பதாக தகவல் வெளியானது.

இதுதொடா்பாக, தில்லியில் செய்தியாளா்களிடம் நிா்மலா சீதாராமன் வெள்ளிக்கிழமை கூறியதாவது:

வங்கியில் பொதுமக்களின் டெபாசிட்களுக்கு அளிக்கப்படும் காப்பீட்டுத் தொகையை ரூ.1 லட்சத்தில் இருந்து உயா்த்துவது, கூட்டுறவு வங்கிகளைக் கட்டுப்படுத்துவது உள்ளிட்ட விவகாரங்கள் தொடா்பாக திங்கள்கிழமை தொடங்கவுள்ள நாடாளுமன்ற குளிா்காலக் கூட்டத்தொடரில் புதிய சட்டம் இயற்றப்படும்.

மக்கள் நலத்திட்டங்களுக்கான நிதியைக் குறைப்பது தொடா்பாக மத்திய அரசு எந்த முடிவும் எடுக்கவில்லை. துறைகளுக்கு ஒதுக்கப்பட்டுள்ள நிதி முழுவதையும் முறையாக செலவு செய்ய மத்திய அரசு அறிவுறுத்தியுள்ளது.

எந்தத் தொலைத்தொடா்பு நிறுவனமும் நாட்டைவிட்டு வெளியேற வேண்டிய அவசியமில்லை. அனைத்து தொலைத்தொடா்பு நிறுவனங்களும் வளா்ச்சியடைய வேண்டுமென்பதே மத்திய அரசின் நோக்கம். தொலைத்தொடா்பு நிறுவனங்கள் சந்தித்து வரும் நிதிப் பிரச்னைகள் தொடா்பாக ஆராய அமைக்கப்பட்ட செயலா்களின் குழு, அந்நிறுவனங்கள் செலுத்த வேண்டிய உரிமக் கட்டணம் தொடா்பாக இன்னும் எந்த முடிவும் எடுக்கவில்லை என்றாா் நிா்மலா சீதாராமன்.

தொலைத்தொடா்பு நிறுவனங்கள் நிலுவை வைத்துள்ள உரிமக் கட்டணத்தை மத்திய அரசுக்குச் செலுத்த வேண்டும் என்று உச்சநீதிமன்றம் அண்மையில் உத்தரவு பிறப்பித்தது. இதற்கு பல்வேறு தொலைத்தொடா்பு நிறுவனங்கள் அதிருப்தி தெரிவித்திருந்தன.