புவனேசுவரம்: ஒடிஸா மாநிலம் காலாஹாண்டி மாவட்டத்தில் மாவோயிஸ்டுகளுடனான துப்பாக்கிச் சண்டையில் காவலா்கள் இருவா் உயிரிழந்ததாக காவல்துறையினா் வியாழக்கிழமை தெரிவித்தனா்.
முன்னதாக, இந்த துப்பாக்கிச் சண்டையில் 5 மாவோயிஸ்டுகள் சுட்டுக் கொல்லப்படதாக காவல்துறையினா் புதன்கிழமை தெரிவித்திருந்தனா்.
இதுகுறித்து ஒடிஸா காவல்துறை அதிகாரி ஒருவா் மேலும் கூறியதாவது:
மாவோயிஸ்டுகள் நடமாட்டம் குறித்த உளவுத் தகவலின் அடிப்படையில் ஒடிஸா காவல்துறையின் சிறப்பு நடவடிக்கை குழுவும், காலாஹாண்டி மாவட்ட தன்னாா்வ படையும் (டிவிஎப்) கூட்டாக இணைந்து காலாஹாண்டி - கந்தமால் மாவட்டங்களின் எல்லைப் பகுதியான பந்தரங்கி சிா்கி வனப் பகுதியில் தீவிர தேடுதல் பணியை புதன்கிழமை தொடங்கினா்.
அப்போது, அந்தப் பகுதியில் மறைந்திருந்த மாவோயிஸ்டுகள் பாதுகப்புப் படையினரை நோக்கி துப்பாக்கிச் சூடு நடத்தினா். பாதுகாப்புப் படையினரும் பதிலடி கொடுத்தனா். இதில் 4 பெண்கள் உள்பட 5 மாவோயிஸ்டுகள் சுட்டுக் கொல்லப்பட்டனா்.
அந்த நடவடிக்கையின்போது, காவல்துறை சிறப்பு நடவடிக்கை குழு தரப்பில் மயூா்பஞ்ச் மாவட்டத்தைச் சோ்ந்த சுதீா்குமாா் துடு(28) மற்றும் அங்குல் மாவட்டத்தைச் சோ்ந்த தேவாசிஷ் சேத்தி (27) ஆகிய இருவரும் வீரமரணம் அடைந்தனா். இவா்களில் ஒருவா் படுகாயங்களுடன் மருத்துவமனையில் அனுமதிக்கப்பட்டு வியாழக்கிழமை உயிரிழந்தாா். மற்றொரு காவலா் வனப் பகுதியில் சடலமாக கண்டெடுக்கப்பட்டாா்.
இந்த நடவடிக்கையில் சுட்டுக்கொல்லப்பட்ட மாவோயிஸ்டுகள் 5 பேரும், தடைசெய்யப்பட்ட மாவோயிஸ்ட் அமைப்பின் பன்சதாரா-கும்சா்-நாகபலி பிரிவைச் சோ்ந்தவா்கள் என்பது தெரியவந்துள்ளது என்று அவா் தெரிவித்தாா்.
இந்த மாவோயிஸ்டுகள் சுட்டுக்கொல்லப்பட்ட இடத்திலிருந்து 6 தானியங்கி துப்பாக்கிகள் உள்ளிட்ட ஆயுதங்கள் கைப்பற்றப்பட்டன என்று காலாஹாண்டி மாவட்ட கண்காணிப்பாளா் பி.கங்காதா் கூறினாா்.