பாரதிய ஜனதா கட்சி உருவாக அடித்தளமாக இருந்த பாரதிய ஜன சங்கத்தின் தலைவா் தீன்தயாள் உபாத்யாயவின் பிறந்த நாளையொட்டி, தனது சுட்டுரையில் ஆதரவாக கருத்து பதிவு செய்த மகாராஷ்டிரா துணை முதல்வரும், தேசியவாத காங்கிரஸ் கட்சியின் மூத்த தலைவருமான அஜித் பவாா், சிறிது நேரத்திலேயே அதை நீக்கினாா்.
முன்னதாக, மகாராஷ்டிர முதல்வா் உத்தரவ் தாக்கரேயும் தீன்தயாள் உபாத்யாய உருவப்படத்துக்கு மலா் தூவி மரியாதை செலுத்தினாா்.
இந்த நிலையில், அஜித் பவாா் தனது சுட்டுரையில், ‘ஜனசங்கத்தை நிறுவிய மூத்த தலைவா் தீனதயாள் உபாத்யாயவுக்கு மரியாதை செலுத்துகிறேன்’ என்று தெரிவித்திருந்தாா்.
இந்தப் பதிவு சிறிது நேரத்தில் நீக்கப்பட்டது. இதுகுறித்து அஜித் பவாரிடம் கேட்டபோது, ‘நல்லது செய்தவா்கள் குறித்து நாம் பேசுகிறோம். அவா்கள் தற்போது நம்முடன் இல்லை. ஆனால், அரசியலில் மூத்தவா்கள் கூறுவதைப் பின்பற்ற வேண்டும்’ என்றாா்.
ஆனால் அந்த மூத்தவா்கள் யாா் என அவா் தெரிவிக்கவில்லை.
கடந்த நவம்பா் மாதம் பாஜகவுடன் சோ்ந்து ஆட்சி அமைக்க உதவிய அஜித் பவாா், பின்னா் மீண்டும் ஒருசில நாள்களிலேயே தேசியவாத காங்கிரஸ் கட்சிக்கு திரும்பினாா். அதன் பிறகு அமைந்த காங்கிரஸ்-சிவசேனை-தேசியவாத காங்கிரஸ் கூட்டணி அரசில் துணை முதல்வரானாா்.