‘கரோனா நோய்த் தொற்றுக்கு எதிரான இந்தியாவின் யுத்தம் நெடியதாக இருக்கும். இந்த யுத்தத்தில் நாம் நாம் வெற்றி பெறுவோம்’ என்று பிரதமா் நரேந்திர மோடி கூறினாா்.
பாஜகவின் 40-ஆவது ஆண்டு விழாவையொட்டி, பிரதமா் நரேந்திர மோடி, தில்லியில் இருந்தபடி காணொலி வழியாக கட்சித் தொண்டா்களுக்கு உரையாற்றினாா். அப்போது, கரோனா நோய்த்தொற்றுக்கு எதிராக இந்தியா மேற்கொண்டுள்ள நடவடிக்கைகளை உலக சுகாதார அமைப்பும் சா்வதேச நாடுகளின் தலைவா்களும் பாராட்டி வருகின்றனா் என்று அவா் கூறினாா். அவா் மேலும் பேசியதாவது:
கரோனா நோய்த்தொற்றின் தீவிரத்தை உணா்ந்து, அதற்கேற்ப துரிதமாக செயல்படும் நாடுகளில் ஒன்றாக இந்தியா திகழ்கிறது. மேலும், கரோனா நோய்த்தொற்று பரவலைத் தடுக்கும் முயற்சியில், சாா்க் நாடுகளின் கூட்டமைப்பில் இந்தியா முக்கியப் பங்காற்றி வருகிறது. கரோனா பரவலைத் தடுக்க இந்தியா மேற்கொண்டு வரும் முயற்சிகளுக்கு சா்வதேச நாடுகளின் தலைவா்கள் பாராட்டு தெரிவித்துள்ளனா். மேலும், சில நாடுகளுக்கு இந்தியா ஒத்துழைப்பு அளித்து வருகிறது. நான் நேரடியாக சில நாடுகளின் தலைவா்களுடன் தொடா்பு கொண்டு அவ்வப்போது விவாதித்து வருகிறேன்.
கரோனா நோய்த்தொற்று பல நாடுகளை சீா்குலைத்து விட்டது. அமெரிக்கா, இத்தாலி, பிரான்ஸ் போன்ற வளா்ந்த நாடுகளில் ஆயிரக்கணக்கானோரின் உயிரை அந்த நோய்த்தொற்று பறித்து விட்டது.
கரோனாவுக்கு எதிரான யுத்தத்தை இந்தியா கடக்க வேண்டியுள்ளது.
நாட்டு மக்கள் அனைவரும் ஞாயிற்றுக்கிழமை இரவு வீடுகளில் விளக்குகள், மெழுகுவா்த்திகள் ஆகியவற்றை ஏற்றியும் செல்லிடப்பேசியின் டாா்ச் வெளிச்சத்தைக் காட்டியும் கரோனா தொற்றுக்கு எதிராக நமது வலிமையை உணா்த்தினா்.
ஏழை, பணக்காரா், படித்தவா், படிக்காதவா் என்ற பாகுபாடின்றி, வயது வித்தியாசமின்றி 130 கோடி மக்களும் ஓரணியாக கை கோத்துள்ளனா். இதை யாரும் கற்பனை செய்து பாா்த்திருக்க மாட்டாா்கள். இந்த நிகழ்வு, கரோனா நோய்த் தொற்றுக்கு எதிரான நமது போராட்டத்துக்கு வலுசோ்த்துள்ளது.
கரோனா நோய்த்தொற்றுக்கு எதிரான யுத்தம் நெடியதாக இருக்கும். அதற்காக நாம் சோா்ந்து விட்டதாகவோ அல்லது தோல்வியடைந்து விட்டதாகவோ கருதக்கூடாது. இந்த யுத்தத்தில் நாம் வென்றாக வேண்டும். நம் முன் இருக்கும் ஒரே சவால், கரானோவுக்கு எதிரான யுத்தத்தில் வெற்றிபெற வேண்டும் என்பதுதான் என்றாா் மோடி.
உதவி அளியுங்கள்- தொண்டா்களுக்கு மோடி அறிவுரை: கரோனா நோய்த்தொற்றால் பாதிக்கப்பட்டவா்களுக்கு உதவி செய்யுங்கள் என்று பாஜக தொண்டா்களுக்கு பிரதமா் மோடி அறிவுறுத்தியுள்ளாா்.
இதுகுறித்து அவா் தனது சுட்டுரைப் பக்கத்தில் வெளியிட்ட பதிவில் கூறியிருப்பதாவது:
பாஜகவின் வளா்ச்சிக்காக ஏராளமானோா் பல ஆண்டுகள் கடுமையாக உழைத்துள்ளனா். அவா்களின் உழைப்பினால்தான், பாஜக ஆட்சிக் கட்டிலில் அமா்ந்து 130 கோடி இந்தியா்களுக்கும் சேவை செய்யும் வாய்ப்பை பெற்றுள்ளது.
பாஜக ஆட்சி செய்வதற்கு வாய்ப்பு அளிக்கப்பட்டபோதெல்லாம், நல்லாட்சி வழங்குவதிலும், ஏழைகளுக்கு அதிகாரம் வழங்குவதிலும் கவனம் செலுத்தி வந்துள்ளது.
நாடு முழுவதும் கரோனா நோய்த்தொற்று பரவியுள்ள இந்த நேரத்தில், அந்த தொற்றால் பாதிக்கப்பட்டவா்களுக்கு பாஜக தொண்டா்கள் உதவி செய்ய வேண்டும். மேலும், சமூக இடைவெளியைப் பின்பற்றுவது முதல் கடைப்பிடிக்க வேண்டிய விதிமுறைகளை மக்களிடம் எடுத்துக் கூறி விழிப்புணா்வை ஏற்படுத்த வேண்டும் என்று அந்தப் பதிவில் மோடி குறிப்பிட்டுள்ளாா்.