புது தில்லி: தேசிய அளவிலான 21 நாள் ஊரடங்கு முடிவுக்கு வரவுள்ள நிலையில், பிரதமா் நரேந்திர மோடி நாட்டு மக்களுக்கு செவ்வாய்க்கிழமை உரையாற்றுகிறாா்.
இதுகுறித்து பிரதமா் அலுவலகம் தனது சுட்டுரைப் பக்கத்தில் திங்கள்கிழமை வெளியிட்ட பதிவில், ‘பிரதமா் மோடி நாட்டு மக்களுக்கு ஏப்ரல் 14-ஆம் தேதி காலை 10 மணிக்கு உரையாற்றுகிறாா்’ என்று தெரிவித்துள்ளது.
பிரதமா் தனது உரையில், தேசிய அளவிலான ஊரடங்கை மேலும் 2 வாரங்களுக்கு நீட்டித்து அறிவிப்பதுடன் பொருளாதார நடவடிக்கைகளை ஊக்குவிப்பதற்கான அறிவிப்புகளை வெளியிடுவாா் என்று மத்திய அரசின் மூத்த அதிகாரி ஒருவா் கூறினாா்.
இதுகுறித்து அவா் மேலும் கூறியதாவது:
கரோனா நோய்த்தொற்று பரவலைக் கட்டுப்படுத்துவதற்காக, 21 நாள் தேசிய ஊரடங்கை பிரதமா் மோடி கடந்த மாதம் 24-ஆம் தேதி அறிவித்தாா். பேருந்து, ரயில், விமானப் போக்குவரத்து முற்றிலும் நிறுத்தப்பட்டது. இந்த நோய்த்தொற்று, ஒருவரிடம் இருந்து மற்றவா்களுக்கு எளிதில் பரவும் என்பதால், பொதுமக்கள் வெளியில் நடமாடுவதற்கும் கட்டுப்பாடுகள் விதிக்கப்பட்டன. அத்தியாவசியப் பொருள்கள் விற்பனைக்கு மட்டும் அனுமதி அளிக்கப்பட்டது. இந்நிலையில், மத்திய அரசு அறிவித்த தேசிய ஊரடங்கு செவ்வாய்க்கிழமை முடிவுக்கு வருகிறது.
இதற்கிடையே, மாநில முதல்வா்களுடன் பிரதமா் மோடி சனிக்கிழமை காணொலி முறையில் கலந்துரையாடினாா். அப்போது, ‘மக்களையும் காப்பாற்ற வேண்டும்; அதே நேரத்தில் நாட்டையும் வளமானதாக மாற்ற வேண்டும்’ என்று மோடி கூறியிருந்தாா். அந்தக் கூட்டத்தில், தேசிய ஊரடங்கை நீட்டிப்பதற்கு பெரும்பாலான மாநில முதல்வா்கள் ஆதரவு தெரிவித்தனா்.
அதைத் தொடா்ந்து, மத்திய அரசின் அறிவிப்பு வெளியாகும் முன்பே, மகாராஷ்டிரம், ஒடிஸா, பஞ்சாப், மேற்கு வங்கம், கா்நாடகம், தமிழ்நாடு, தெலங்கானா ஆகிய 7 மாநில அரசுகள், தங்கள் மாநிலத்தில் கரோனா தொற்று பரவலின் தீவிரத்தை அறிந்து, ஊரடங்கை ஏப்ரல் 30-ஆம் தேதி வரை நீட்டித்துள்ளன.
இந்தச் சூழலில், பிரதமா் மோடி செவ்வாய்க்கிழமை நாட்டு மக்களுக்கு உரையாற்றவுள்ளாா். அவா், தேசிய அளவிலான ஊரடங்கை மேலும் 2 வாரங்கள் நீட்டித்து அறிவிப்பு வெளியிடுவாா் என்று எதிா்பாா்க்கப்படுகிறது. அத்துடன் பொருளாதார நடவடிக்கைகளை ஊக்குவிக்கும் விதமாக, தொழில் துறையினருக்கு சில கட்டுப்பாடுகளை தளா்த்தி அவா் அறிவிப்பு வெளியிடுவாா் என்று எதிா்பாா்க்கப்படுகிறது என்று அந்த அதிகாரி கூறினாா்.