‘வா்த்தக ரீதியில் அமெரிக்காவை இந்தியா நல்லவிதமாக நடத்தவில்லை’ என்று குற்றம்சாட்டியுள்ள அந்நாட்டு அதிபா் டொனால்ட் டிரம்ப், தனது இந்தியப் பயணத்தின்போது, இருதரப்பு வா்த்தக ஒப்பந்தம் கையெழுத்தாக வாய்ப்பில்லை என்று குறிப்பிட்டாா்.
இந்தியாவில் வரும் 24, 25 ஆகிய தேதிகளில் டிரம்ப் சுற்றுப்பயணம் மேற்கொள்ளவிருக்கிறாா். அமெரிக்க அதிபரான பிறகு, அவா் இந்தியாவுக்கு வருவது இதுவே முதல்முறையாகும்.
டிரம்ப்பின் இந்த பயணத்தின்போது, இருதரப்பு வா்த்தக ஒப்பந்தம் கையெழுத்தாக வாய்ப்புள்ளதாக ஊடகங்களில் தகவல் வெளியான நிலையில், வாஷிங்டனில் செய்தியாளா்களிடம் இதுதொடா்பாக டிரம்ப் கூறியதாவது:
இந்தியாவுடன் மிகப் பெரிய அளவிலான வா்த்தக ஒப்பந்தத்தை மேற்கொள்வது தொடா்பான பணிகள் நடைபெற்று வருகின்றன. ஆனால், அமெரிக்க அதிபா் தோ்தலுக்கு (நவம்பா்) முன்பாக அந்த ஒப்பந்தம் கையெழுத்தாக வாய்ப்பில்லை என்று கருதுகிறேன். அதன் பின்னா், இந்தியாவுடன் வா்த்தக ஒப்பந்தம் ஏற்படும் என்றாா் அவா்.
இந்திய-அமெரிக்க வா்த்தக உறவுகள் தொடா்பான கேள்விக்கு பதிலளித்த டிரம்ப், ‘இருதரப்பு வா்த்தக உறவுகள் மகிழ்ச்சியளிக்கும் வகையில் இல்லை. வா்த்தக ரீதியில் அமெரிக்காவை இந்தியா நல்லவிதமாக நடத்தவில்லை’ என்று குற்றம்சாட்டினாா்.
அதேசமயம், பிரதமா் நரேந்திர மோடியை தனிப்பட்ட முறையில் தனக்கு பிடிக்கும் என்று கூறிய டிரம்ப், இந்தியப் பயணத்தை ஆவலுடன் எதிா்நோக்கி உள்ளதாக குறிப்பிட்டாா்.
ஆமதாபாதில் புதிதாக கட்டப்பட்டுள்ள பிரம்மாண்ட விளையாட்டரங்கில் பிரதமா் மோடியுடன் தான் பங்கேற்கவிருக்கும் நிகழ்ச்சியையும் ஆவலுடன் எதிா்பாா்த்திருப்பதாக அவா் கூறினாா்.
சரக்கு மற்றும் சேவைகளின் வா்த்தகத்தில், இந்தியாவின் முதன்மையான கூட்டாளியாக அமெரிக்கா உள்ளது. அதற்கு அடுத்த இடத்தில் சீனா உள்ளது. இந்தியா, அமெரிக்கா இடையிலான சரக்கு வா்த்தகம் சுமாா் 62 சதவீதமாகவும், சேவைகள் வா்த்தகம் சுமாா் 38 சதவீதமாகவும் உள்ளது.
கடந்த ஆண்டின் முதல் மூன்று காலாண்டுகளில் 45.3 பில்லியன் அமெரிக்க டாலா்கள் (சுமாா் ரூ.3.24 லட்சம் கோடி) மதிப்பிலான பொருள்கள் மற்றும் சேவைகளை இந்தியாவுக்கு அமெரிக்கா ஏற்றுமதி செய்துள்ளது. இந்த காலகட்டத்தில் இந்தியாவிடமிருந்து 65.5 பில்லியன் அமெரிக்க டாலா்கள் (சுமாா் ரூ.4.69 லட்சம் கோடி) மதிப்பிலான பொருள்கள் மற்றும் சேவைகளை இறக்குமதி செய்துள்ளது.
இந்தியாவுடான வா்த்தக பற்றாக்குறையை தொடா்ந்து சுட்டிக்காட்டி வரும் அமெரிக்கா, வேளாண் உற்பத்தி பொருள்கள், பால் பொருள்கள், மருத்துவ உபகரணங்கள் உள்ளிட்ட துறைகளில் சந்தை அனுமதியை இந்தியாவிடம் கேட்டு வருகிறது. மேலும், சில பொருள்களுக்கான இறக்குமதி வரியையும் குறைக்கக் கோருகிறது. அதேசமயம், குறிப்பிட்ட வகை உருக்கு மற்றும் அலுமினியம் உள்ளிட்ட பொருள்களுக்கான அதிக வரி விதிப்பிலிருந்து இந்தியாவுக்கு விலக்கு அளிக்க வேண்டும் என்று இந்திய தரப்பில் வலியுறுத்தப்பட்டு வருகிறது.
‘ஹெளடி மோடி’ போல் ‘நமஸ்தே டிரம்ப்’ நிகழ்ச்சி
பிரதமா் மோடி கடந்த ஆண்டு அமெரிக்கா சென்றபோது, ஹூஸ்டன் நகரில் ‘ஹெளடி மோடி’ (மோடி நலமா) என்ற பெயரில் சுமாா் 50,000 போ் பங்கேற்ற பிரம்மாண்ட நிகழ்ச்சி நடைபெற்றது. இதில், மோடியும், அதிபா் டிரம்ப்பும் பங்கேற்றுப் பேசினா்.
அதேபாணியில், குஜராத் மாநிலம், ஆமதாபாதில் புதிதாக கட்டப்பட்டுள்ள பிரம்மாண்ட விளையாட்டரங்கில் ‘நமஸ்தே டிரம்ப்’ என்ற நிகழ்ச்சி வரும் 24-ஆம் தேதி நடைபெறவுள்ளது.
மேலும், வா்த்தகம், பாதுகாப்பு உள்ளிட்ட துறைகளில் இருதரப்பு உறவுகளை வலுப்படுத்துவது குறித்து பிரதமா் மோடியும், அமெரிக்க அதிபா் டொனால்ட் டிரம்ப்பும் 25-ஆம் தேதி விரிவான பேச்சுவாா்த்தை நடத்தவுள்ளனா். டிரம்ப்புக்கு பிரதமா் மோடி மதிய விருந்தும், குடியரசுத் தலைவா் ராம்நாத் கோவிந்த் மாலை விருந்தும் அளிக்கவுள்ளதாக வெளியுறவுச் செயலா் ஹா்ஷ் வா்தன் ஷ்ரிங்லா தெரிவித்தாா்.
மத்திய அரசு பதிலளிக்க காங்கிரஸ் வலியுறுத்தல்
இந்தியாவுடனான வா்த்தக உறவுகள் தொடா்பாக அமெரிக்க அதிபா் டொனால்ட் டிரம்ப் தெரிவித்த கருத்துகளுக்கு மத்திய அரசு பதிலளிக்க வேண்டும் என்று காங்கிரஸ் வலியுறுத்தியுள்ளது.
இதுதொடா்பாக அக்கட்சியின் செய்தித் தொடா்பாளா் மணீஷ் திவாரி கூறுகையில், ‘இந்தியப் பயணத்தை முன்னிட்டு, அதிபா் டிரம்ப் தெரிவித்த கருத்துகள் இந்தியாவின் நற்பெயருக்கு களங்கம் ஏற்படுத்துபவையாக உள்ளன. இது தீவிரமான விஷயமாகும். இதுதொடா்பாக வெளியுறவு அமைச்சகம் உரிய பதிலை அளிக்க வேண்டும்’ என்றாா்.