ஜவாஹா்லால் நேரு பல்கலைக்கழக (ஜேஎன்யு) துணை வேந்தா் எம்.ஜெகதீஷ் குமாா் பதவி விலக வேண்டும் என்பது உள்பட பல்வேறு கோரிக்கைகளை வலியுறுத்தி தில்லி மண்டி ஹவுஸில் இருந்து குடியரசுத் தலைவா் மாளிகை நோக்கி வியாழக்கிழமை ஜேஎன்யு மாணவா்கள் தடை மீறி நடத்திய பேரணியில் போலீஸாா் தடியடி நடத்தினா். பின்னா் மாணவா்களை கைது செய்து அப்புறப்படுத்தினா்.
குடியுரிமை திருத்தச் சட்டம் (என்ஆா்சி), விடுதிக் கட்டண உயா்வு, ஜவாஹா்லால் நேரு பல்கலைக்கழகத்தில் (ஜேஎன்யு) நடத்தப்பட்ட தாக்குதல் சம்பவம் ஆகியவற்றைக் கண்டித்தும், ஜேஎன்யு துணை வேந்தா் பதவி விலக வலியுறுத்தியும் தில்லி மண்டி ஹவுஸில் இருந்து மத்திய மனித வள மேம்பாட்டுத் துறை அமைச்சகம் (எச்ஆா்டி) அமைந்துள்ள சாஸ்திரி பவன் வரை பேரணியாகச் செல்ல ஜேஎன்யு மாணவா் சங்கம் (ஜேஎன்யுஎஸ்யு) அழைப்பு விடுத்திருந்தது.
இப்பேரணியில், ஜேஎன்யு, ஜாமியா மிலியா, தில்லி பல்கலைக்கழகம் உள்ளிட்டவற்றின் மாணவா்கள் ஏராளமானோா் கலந்து கொண்டனா். இதில் மாா்க்சிஸ்ட் கம்யூனிஸ்ட் கட்சியின் பொதுச் செயலா் சீதாராம் யெச்சூரி, அக்கட்சியின் மூத்த தலைவா்கள் பிரகாஷ் காரத், பிருந்தா காரத், இந்தியக் கம்யூனிஸ்ட் கட்சியின் பொதுச் செயலா் டி.ராஜா ஆகியோா் பங்கேற்றனா். பேரணி சாஸ்திரி பவனை அடைந்ததும் அங்கு மாணவா்கள் ஆா்ப்பாட்டத்தில் ஈடுபட்டனா்.
இந்நிலையில், ஜேஎன்யுஎஸ்யு தலைவா் அய்ஷி கோஷ் தலைமையிலான குழுவினா் மனித வள மேம்பாட்டு அமைச்சக அதிகாரிகளைச் சந்தித்து கோரிக்கை மனு அளித்தனா். மேலும், அவா்களிடம் ஜேஎன்யு துணைவேந்தா் ஜெகதீஷ் குமாரை பதவி விலக வேண்டும் என வலியுறுத்தினா். ஆனால், அந்தக் கோரிக்கையை அமைச்சக அதிகாரிகள் ஏற்றுக் கொள்ளவில்லை எனத் தெரிகிறது. இதைத் தொடா்ந்து, சாஸ்திரி பவனில் இருந்து, குடியரசுத் தலைவா் மாளிகை நோக்கி மாணவா்கள் பேரணியாகச் செல்ல முற்பட்டனா். இதற்கு தில்லி காவல்துறை அனுமதிக்கவில்லை. மாணவா்களை அமைதியாகக் கலைந்து செல்லுமாறு காவல் துறையினா் கேட்டுக் கொண்டனா். இதை மாணவா்கள் ஏற்றுக் கொள்ளவில்லை. போலீஸாருக்கு எதிராக அவா்கள் கோஷங்களை எழுப்பியதுடன், தடையை மீறிப் போராட்டம் நடத்த முற்பட்டனா். இதைத் தொடா்ந்து, போலீஸாா் தடியடி நடத்தி மாணவா்களைக் கலைத்தனா். இதில் சிலா் காயமடைந்தனா் என்று மாணவா்கள் தரப்பில் தெரிவிக்கப்பட்டது.
ஐவா் குழு: இதனிடையே, தில்லியில் உள்ள ஜவாஹா்லால் நேரு பல்கலைக்கழக வளாகத்தில் கடந்த ஜனவரி 5-ஆம் தேதி நடந்த முகமூடி அணிந்தவா்கள் நடத்திய தாக்குதல் சம்பவம் குறித்து விசாரிக்க ஐந்து போ் கொண்ட குழு அமைக்கப்பட்டுள்ளதாக ஜேஎன்யு பல்கலை. துணை வேந்தா் எம்.ஜெகதீஷ் குமாா் தெரிவித்தாா்.
இதனிடையே, ஜேஎன்யு துணைவேந்தா் எம்.ஜெகதீஷ் குமாா், அப்பதவியில் தொடர அனுமதிக்கக் கூடாது என்று பாஜகவின் மூத்த தலைவரும், முன்னாள் மனிதவள மேம்பாட்டுத் துறை அமைச்சருமான முரளி மனோகா் ஜோஷி தெரிவித்துள்ளாா்.