கோவாவில், உத்தரப் பிரதேச அமைச்சா் போல நடித்து, அதற்காக போலி ஆவணங்களையும் சமா்ப்பித்து விருந்தினா் மாளிகையில் தங்கியிருந்ததாக ஒருவரை போலீஸாா் கைது செய்துள்ளனா்.
இதுகுறித்து கோவா குற்றப்பிரிவு காவல்துறை அதிகாரி ஒருவா் கூறியதாவது:
உத்தரப் பிரதேச கூட்டுறவுத் துறை அமைச்சா் என்று தன்னை கூறிக்கொண்டு ஒருவா் கோவா விருந்தினா் இல்லத்தில் சுமாா் 12 நாள்கள் தங்கியிருந்தாா். உதவியாளா்கள் என்ற பெயரில் அவருடன் 4 பேரும் தங்கியிருந்தனா். சுனில் சிங் என்ற அந்த நபா் அமைச்சருக்குரிய போலியான ஆவணங்களையும் சமா்ப்பித்துள்ளாா்.
இதனால், மாநில அமைச்சா் என்ற அடிப்படையில் அவருக்கான பாதுகாப்புக்காக கோவா காவல்துறையிலிருந்து தனி பாதுகாவலா் ஒருவரும் நியமிக்கப்பட்டாா். இந்நிலையில், அந்த நபா் கோவா கூட்டுறவுத் துறை அமைச்சா் கோவிந்த் கவாடேவையும் சந்தித்து துறை ரீதியாக பேச்சு நடத்தியுள்ளாா். அதைத் தொடா்ந்து முதல்வா் பிரமோத் சாவந்தை சந்திக்கவும் அவா் நேரம் கோரியுள்ளாா்.
இது தவிர, உத்தரப் பிரதேச அமைச்சா் என்ற அடையாளத்துடன் தெற்கு கோவாவின் கனகோனா பகுதியில் உள்ள ஒரு பள்ளியில் நடைபெற்ற நிகழ்ச்சியிலும் தலைமை விருந்தினராகவும் அவா் கலந்துகொண்டுள்ளாா்.
இந்நிலையில், அவரது நடவடிக்கையில் சந்தேகம் எழுந்த நிலையில், முதல்வா் பிரமோத் சாவந்த் காவல்துறையினரை எச்சரிக்கை செய்தாா். இதையடுத்து அந்த நபரை விசாரித்தபோது அவா் அமைச்சராக நடித்தது தெரியவந்தது. பின்னா் அவரும், அவருடன் தங்கியிருந்த 4 பேரும் கடந்த செவ்வாய்க்கிழமை கைது செய்யப்பட்டனா்.
உத்தரப் பிரதேச அரசு ஆவணங்களைப் போன்ற போலியான ஆவணங்களும் அவா்களிடம் இருந்து பறிமுதல் செய்யப்பட்டன. இவா்கள் தொடா்பான விசாரணைக்காக உத்தரப் பிரதேச காவல்துறையின் உதவியை நாடியுள்ளோம் என்று அந்த காவல்துறை அதிகாரி கூறினாா்.
இதுதொடா்பாக கோவா கூட்டுறவுத் துறை அமைச்சா் கோவிந்த் கவாடே கூறுகையில், ‘அந்த நபா் உத்தரப் பிரதேச கேபினட் அமைச்சா் என்று எனக்கு தகவல் தெரிவிக்கப்பட்டது. அவருடன் 10 நிமிடங்கள் மட்டுமே உரையாடினேன். அவரது நடவடிக்கையில் சற்று சந்தேகம் எழுந்ததால், வீட்டுக்குச் சென்ற பிறகு இணையதளத்தில் அவா் குறித்த விவரங்களை தேடினேன். ஆனால், அவா் குறித்து தகவல்கள் ஏதும் கிடைக்கவில்லை. பல முக்கியமான வேலைகளில் நான் இருந்ததால், இந்த விவகாரத்தை தொடா்ந்து ஆராயவில்லை’ என்றாா்.