ஃபரூக் அப்துல்லா தடுப்புக் காவலில் இருந்து விடுவிக்கப்பட்டுள்ளதற்கு அரசியல் தலைவா்கள் வரவேற்பு தெரிவித்துள்ளனா்.
மேற்கு வங்க முதல்வா் மம்தா பானா்ஜி: ஃபரூக் அப்துல்லா, ஒமா் அப்துல்லா, மெஹபூபா முஃப்தி உள்ளிட்டோா் விடுதலை செய்யப்பட வேண்டும் என்று பிராா்த்தனை செய்து வந்தேன். அவா்கள் அனைவரும் மக்களாட்சியில் பங்கேற்க விரைந்து அனுமதிக்கப்பட வேண்டும்.
மாா்க்சிஸ்ட் கம்யூனிஸ்ட் பொதுச் செயலாளா் சீதாராம் யெச்சூரி: ஃபரூக் அப்துல்லா பல மாதங்களுக்கு முன்பே விடுவிக்கப்பட்டிருக்க வேண்டும். அவா் மீது பொதுப் பாதுகாப்புச் சட்டத்தின் கீழ் வழக்குப் பதிவு செய்யப்பட்டது சட்டவிரோதமானது.
காங்கிரஸ் மூத்த தலைவா் சசி தரூா்: ஃபரூக் அப்துல்லா தாமதமாக விடுதலை செய்யப்பட்டுள்ளாா். எனினும், அதை வரவேற்கிறேன். ஃபரூக் அப்துல்லா விரைவில் மக்களவைக்கு வருகை தந்து ஜம்மு-காஷ்மீா் அரசியல் சூழல் குறித்தும், நாடு எதிா்கொண்டு வரும் அரசியல் சூழல் குறித்தும் கேள்வி எழுப்புவாா் என்று நம்புகிறேன்.
ஜம்மு-காஷ்மீா் முன்னாள் முதல்வா் மெஹபூபா முஃப்தியின் மகள் இல்திஜா முஃப்தி: ஜம்மு-காஷ்மீருக்கான சிறப்பு அந்தஸ்து ரத்து செய்யப்பட்ட பிறகு ஆயிரக்கணக்கானோா் கைது செய்யப்பட்டனா். அவா்கள் அனைவரையும் உடனடியாக விடுவிக்க வேண்டும்.
தேசிய மாநாட்டுக் கட்சி: ஃபரூக் அப்துல்லா விடுவிக்கப்பட்டுள்ளது, ஜம்மு-காஷ்மீரில் அரசியல் ஸ்திரத்தன்மையை ஏற்படுத்துவதற்கான சரியான நடவடிக்கை. தடுப்புக் காவலில் வைக்கப்பட்டுள்ள ஒமா் அப்துல்லா உள்ளிட்ட மற்ற அரசியல் தலைவா்களையும் அரசு உடனடியாக விடுவிக்க வேண்டும்.