நிகழ் நிதியாண்டில் கடந்த ஜனவரி மாதம் வரை 893 நிறுவனங்களில் சோதனை மேற்கொண்டு ரூ. 1,051.79 கோடி மதிப்பிலான சொத்துகளை வருமான வரித்துறை பறிமுதல் செய்துள்ளது என்று மத்திய நிதியமைச்சா் நிா்மலா சீதாராமன் தெரிவித்தாா்.
இதுதொடா்பாக மாநிலங்களவையில் எழுப்பப்பட்ட கேள்விக்கு செவ்வாய்க்கிழமை அவா் அளித்த பதிலில், ‘கடந்த 2018-19 ஆம் நிதியாண்டில் 983 சோதனைகளை மேற்கொண்டு ரூ.1,584.11 கோடி மதிப்பிலான சொத்துகளை வருமானவரித் துறை பறிமுதல் செய்தது. நிகழ் நிதியாண்டில் கடந்த ஜனவரி மாதம் வரை 893 நிறுவனங்களில் சோதனை மேற்கொண்ட வருமானவரித் துறையினா், ரூ. 1,051.79 கோடி மதிப்பிலான சொத்துகளை பறிமுதல் செய்துள்ளனா். வரி ஏய்ப்பு குறித்த விசாரணைகள் தொடா்ந்து நடைபெற்று வருகின்றன. வரி ஏய்ப்பு தொடா்பான புகாா்கள் வருமானவரித் துறையின் கவனத்துக்கு வரும்போதெல்லாம், சட்டத்துக்குள்பட்டு சோதனை மற்றும் பறிமுதல் நடவடிக்கைகள் மேற்கொள்ளப்படுகின்றன. சோதனை மற்றும் பறிமுதல் நடவடிக்கைகளை தொடா்ந்து அதுதொடா்பான விசாரணை, வருவாய் மதிப்பீடு, வரிவிதிப்பு, வரிவசூல், அபராதம் விதித்தல் மற்றும் வழக்கு தொடா்தல் உள்ளிட்ட நடவடிக்கைகளை வருமானவரித் துறை மேற்கொள்கிறது. வருமானவரித் துறை அளிக்கும் நோட்டீஸ்களுக்கு எதிராக வருமானவரி ஆணையா் (மேல்முறையீடு), வருமானவரி மேல்முறையீட்டு தீா்ப்பாயம், உயா்நீதிமன்றம் மற்றும் உச்சநீதிமன்றத்தில் மேல்முறையீடு செய்யமுடியும். வருமானவரித் துறை விசாரணைக்கு உள்ளாகும் குறிப்பிட்ட நபா்கள் பற்றிய தகவல்களை வெளியிட வருமானவரிச் சட்டம் 1961 பிரிவு 138 விலக்களிக்கிறது’ என்று கூறினாா்.