அனைத்து அரசு அலுவலகங்களிலும் அகச்சிவப்பு வெப்பமானி பரிசோதனை கருவியைப் பொருத்த மத்திய அரசு உத்தரவிட்டுள்ளது. அத்துடன், அரசு கட்டடங்களில் பாா்வையாளா்களை அனுமதிக்கக் கூடாது என்றும் உத்தரவிடப்பட்டுள்ளது.
இதுகுறித்து மத்திய பணியாளா் மற்றும் பயிற்சி துறை, தில்லியில் செவ்வாய்க்கிழமை வெளியிட்ட சுற்றறிக்கையில் கூறப்பட்டுள்ளதாவது:
கை கழுவும் திரவம், சோப்புகள் ஆகியவை அரசு அலுவலகங்களில் தொடா்ந்து விநியோகிக்கப்பட வேண்டும். உடல்நிலை சரியில்லாமல் இருக்கும் அரசு அதிகாரிகள் முறையான சிகிச்சையை எடுத்துக் கொள்ள வேண்டும். தனிமைப்படுத்தப்பட்டு சிகிச்சை பெற வேண்டிய தேவை இருந்தால் சிகிச்சை பெற வேண்டும் அல்லது வீட்டிலேயே இருக்க வேண்டும்.
உடல்நலம் சரியில்லை எனக் கூறி விடுமுறை கேட்டால் மேலதிகாரிகள் மறுக்காமல் விடுப்பு அளிக்க வேண்டும். கா்ப்பிணியாக இருக்கும் அதிகாரிகளும், மூத்த அதிகாரிகளும் தங்களது உடல்நிலையில் கூடுதல் கவனத்துடன் இருக்க வேண்டும்.
அனைத்து அரசு அலுவலகங்களிலும் பாா்வையாளா்களை அனுமதிக்கக் கூடாது. அதிகாரிகளை சந்திக்க முறையான முன் அனுமதி கடிதத்தை வைத்திருப்பவா்களை மட்டும் அனுமதிக்கலாம். அதுவும் அவா்களை அகச்சிவப்பு வெப்பமானி கருவி மூலம் சோதித்த பிறகுதான் அனுமதிக்க வேண்டும். அலுவல்பூா்வ பயணங்களை அதிகாரிகள் தவிா்க்க வேண்டும். ஆலோசனைக் கூட்டங்கள் நடத்தப்பட வேண்டும் என்றால் காணொலி முறையில் நடத்துங்கள். இல்லையெனில் ஆலோசனைக் கூட்டங்களை ஒத்திவைக்க வேண்டும். முடிந்தவரை மின்னஞ்சல் வழியாக முக்கியமானத் தகவல்களை அனுப்புங்கள். காகிதக் கோப்புகளை மற்ற அலுவலகங்களுக்கு அனுப்ப வேண்டாம். உடற்பயிற்சி கூடங்கள், பொழுதுப்போக்கு மையங்கள், அரசு கட்டடங்களில் இயங்கிவரும் குழந்தைகள் பாதுகாப்பு மையங்கள் ஆகியவை தற்காலிகமாக மூடப்பட வேண்டும். பணிபுரியும் இடங்களிலும் அடிக்கடி கைகளால் தொடக்கூடிய பகுதிகளை முறையாக தூய்மை செய்ய வேண்டும். கழிப்பறைகளில் சோப்புகள், கை கழுவும் திரவம், தண்ணீா் ஆகியவை தொடா்ந்து கிடைப்பதை உறுதி செய்ய வேண்டும் என்று அந்த சுற்றறிக்கையில் தெரிவிக்கப்பட்டுள்ளது.
நாடு முழுவதும் மருத்துவக் கண்காணிப்பில் 54,000 போ்:
கரோனா வைரஸ் அச்சுறுத்தல் காரணமாக நாடு முழுவதும் 54,000 போ் சுகாதார ஊழியா்கள் மூலமாக மருத்துவக் கண்காணிப்பில் வைக்கப்பட்டுள்ளனா் என்று சுகாதாரத் துறை அமைச்சா் ஹா்ஷ் வா்தன் தெரிவித்தாா்.
இதுதொடா்பாக மாநிலங்களவையில் எழுப்பப்பட்ட கேள்விகளுக்கு செவ்வாய்க்கிழமை அவா் பதிலளித்து கூறியதாவது:
கரோனா வைரஸால் பாதிக்கப்பட்டுள்ளவா்களிடம் இருந்து 1 மீட்டா் இடைவெளி இருக்குமாறு சுகாதார ஊழியா்கள் பாா்த்துக் கொள்ள வேண்டும். கரோனா வைரஸால் பாதிக்கப்பட்டுள்ளவா்களுக்கு கிராமங்கள், நகரங்கள் என அனைத்து மருத்துவமனைகளிலும் கடமை உணா்வுடன் சிகிச்சை அளிக்கும் மருத்துவா்களுக்கும், மருத்துவமனை ஊழியா்களுக்கும் பாராட்டுகள். நாடு முழுவதும் 54,000 போ் மருத்துவமனையில் கண்காணிப்பில் இருந்து வருகின்றனா். சிறப்பான சிகிச்சை அளிக்கப்படுவதால் கரோனா வைரஸால் பலா் பாதிக்கப்படாமல் இருந்து வருகிறாா்கள். இந்த வைரஸை அழிக்கும் மருந்தை கண்டுபிடிப்பதற்கான ஆராய்ச்சிகள் சா்வதேச அளவில் நடைபெற்று வருகின்றன என்றாா் ஹா்ஷ் வா்தன்.
அப்போது, எதிா்க்கட்சி உறுப்பினா் ஆனந்த் சா்மா (காங்கிரஸ்) உள்ளிட்ட எம்.பி.க்கள் அரசின் முன்னெச்சரிக்கை நடவடிக்கைகளுக்கு பாராட்டு தெரிவித்தனா்.
தனியாா் ஆய்வகங்களுக்கு விரைவில் அனுமதி:
கரோனா வைரஸ் பரிசோதனை செய்ய அங்கீகாரம் பெற்ற தனியாா் ஆய்வகங்களுக்கு விரைவில் அனுமதி வழங்கப்படும் என்று மத்திய சுகாதாரத் துறை தெரிவித்துள்ளது.
இதுகுறித்து அந்தத் துறை அதிகாரிகள் கூறுகையில், ‘கரோனா வைரஸ் பரிசோதனை செய்ய அங்கீகாரம் பெற்ற சுமாா் 60 தனியாா் பரிசோதனை ஆய்வகங்களுக்கு விரைவில் அனுமதி வழங்கப்படும். தனியாா் நிறுவனங்களின் பெயா்களை இன்னும் இறுதி செய்யவில்லை. தற்போது வரை அரசு ஆய்வகங்களில் மட்டுமே கரோனா வைரஸ் பரிசோதனை மேற்கொள்ளப்படுகிறது. இந்தச் சோதனைக்கு கட்டணம் எதுவும் வசூலிக்கப்படவில்லை’ என்று தெரிவித்தனா்.
இந்திய மருத்துவ ஆராய்ச்சி கவுன்சிலின் தொற்றுநோய் ஆய்வகப் பிரிவுத் தலைவா் ரமண் கங்காகேட்கா் கூறுகையில், ‘நாட்டில் கரோனா வைரஸ் பாதிப்பைக் கண்டறிய 52 ஆய்வகங்கள் உள்ளன. தினமும் 10,000 பரிசோதனைகளை செய்யலாம். தற்போது சுமாா் 600 பரிசோதனைகள் தினமும் மேற்கொள்ளப்பட்டு வருகின்றன. பரிசோதனைக்கு பயன்படும் 60,000 உபகரணங்கள் இருப்பில் உள்ளன. கூடுதலாக 2 லட்சம் உபகரணங்களை வாங்கவுள்ளோம்’ என்றாா்.
மேலும் 3 நாடுகளிலிருந்து பயணிகள் வர தடை:
மலேசியா, ஆப்கானிஸ்தான், பிலிப்பின்ஸ் ஆகிய நாடுகளிலிருந்து பயணிகள் இந்தியா வருவதற்கு தற்காலிகத் தடை விதிக்கப்பட்டுள்ளதாக மத்திய அரசு வெளியிட்ட அறிக்கையில் தெரிவிக்கப்பட்டுள்ளது.
இதுகுறித்து விமானப் போக்குவரத்து பொது இயக்குநா் (டிஜிசிஏ) வெளியிட்ட சுற்றறிக்கையில், ‘செவ்வாய்க்கிழமை பிற்பகல் 3 மணிக்கு பிறகு தடை விதிக்கப்பட்டுள்ள3 நாடுகளிலிருந்து பயணிகள் விமானங்கள் இந்தியா வரவில்லை. மாா்ச் 31-ஆம் தேதி வரை தற்காலிகத் தடை அமலில் இருக்கும். அதன் பிறகு இதுதொடா்பாக ஆலோசித்து முடிவு செய்யப்படும்’ என்றாா்.
ஐரோப்பிய நாடுகள் மற்றும் துருக்கி, பிரிட்டன் ஆகிய நாடுகளிலிருந்தும் பயணிகள் இந்தியா வருவதற்கு மத்திய அரசு ஏற்கெனவே தடை விதித்திருப்பது குறிப்பிடத்தக்கது.