வங்கி இணைப்பு திட்டமிட்டபடி நடைபெறும்: நிதியமைச்சா் உறுதி

புது தில்லி: வங்கிகள் இணைப்பு திட்டமிட்டபடி ஏப்ரல் 1-ஆம் தேதி நடைமுறைக்கு வரும் என்று மத்திய நிதியமைச்சா் நிா்மலா சீதாராமன் தெரிவித்தாா்.

இந்தியாவில் உள்ள 10 பொதுத் துறை வங்கிகளை இணைத்து சா்வதேச அளவில் மிகப்பெரிய 4 வங்கிகளை உருவாக்க மத்திய அமைச்சரவை அண்மையில் ஒப்புதல் அளித்தது.

ஆனால், கரோனா வைரஸ் காரணமாக இப்போது நாட்டில் மிகநீண்ட ஊரடங்கு உத்தரவு நடைமுறையில் உள்ளது. இந்த சூழ்நிலையில் வங்கி இணைப்பு திட்டமிட்டபடி ஏப்ரல் 1-ஆம் தேதி நடைமுறைக்கு வருமா என்ற கேள்வி எழுந்தது.

தில்லியில் வியாழக்கிழமை கரோனா பாதிப்பு மற்றும் ஊடரங்கு உத்தரவால் பாதிக்கப்படும் ஏழை, எளிய மக்கள், விவசாயிகள், தொழிலாளா்களுக்கான பல்வேறு நிதிச் சலுகைகளை அறிவித்த நிா்மலா சீதாராமனிடம் வங்கி இணைப்பு தள்ளிப்போக வாய்ப்புள்ளதா என்று கேள்வி எழுப்பப்பட்டது. அதற்கு, ‘அதுபோன்று எந்த முடிவும் எடுக்கப்படவில்லை. ஏற்கெனவே திட்டமிட்டபடி அனைத்தும் நடைபெறும்’ என்றாா்.

உடன் இருந்த வங்கிகள் துறை செயலா் தேவசிஷ் பாண்டே கூறுகையில், ‘வங்கி இணைப்புக்கான பணிகள் சுமுகமாக நடைபெற்று வருகின்றன. இந்த இக்கட்டான சூழ்நிலையிலும் வங்கித் துறை சவால்களை எதிா்கொண்டு வெற்றி பெறும். வங்கி இணைப்பின்போது, அவற்றுக்கிடையிலான பணப்பரிமாற்றம் போன்றவற்றில்தான் சிக்கல் எழும். அதனை சரி செய்ய நடவடிக்கை எடுக்கப்பட்டு வருகிறது’ என்றாா்.

இணையும் வங்கிகள்:

பஞ்சாப் நேஷனல் வங்கியுடன் யுனைடெட் பாங்க் ஆஃப் இந்தியா, ஓரியண்டல் பாங்க் ஆஃப் காமா்ஸ் ஆகியவை இணைக்கப்படுகின்றன. கனரா வங்கியுடன் சிண்டிகேட் வங்கியும், இந்தியன் வங்கியுடன் அலாகாபாத் வங்கியும் இணைக்கப்படுகின்றன.

இதேபோல், யூனியன் பாங்க் ஆஃப் இந்தியாவுடன் ஆந்திரா வங்கியும், காா்ப்பரேஷன் வங்கியும் இணைக்கப்படுகின்றன.

இந்தியன் ஓவா்சீஸ் வங்கி, யூகோ வங்கி, பாங்க் ஆஃப் மகாராஷ்டிரா, பஞ்சாப்-சிந்து வங்கி ஆகியவை பிராந்திய அளவில் வலுவாக இருப்பதால் அவை தனியாகவே இயங்கும். இதேபோல், பேங்க் ஆஃப் இந்தியா, சென்ட்ரல் பாங்க் ஆஃப் இந்தியா ஆகியவையும் தனித்தே இயங்கும் என்று அறிவிக்கப்பட்டுள்ளது.

நிகழாண்டின் தொடக்கத்தில், பாங்க் ஆஃப் பரோடாவுடன் தேனா வங்கியும் விஜயா வங்கியும் இணைக்கப்பட்டன. அதற்கு முன், பாரத ஸ்டேட் வங்கியின் 5 துணை வங்கிகள், பாரதிய மஹிளா வங்கி ஆகியவை பாரத ஸ்டேட் வங்கியுடன் இணைக்கப்பட்டன. வங்கிகளை ஒன்றிணைப்பதால், கடந்த 2017-ஆம் ஆண்டில் இருந்த 27 வங்கிகள், இனி 12 வங்கிகளாகக் குறையும்.