நாட்டில் ஏற்றுமதியை ஊக்குவிக்க மேற்கொள்ள வேண்டிய சீா்திருத்த நடவடிக்கைகள் தொடா்பாக தொழில்துறையினருடன் மத்திய அமைச்சா்கள் பலா் காணொலி முறையில் சனிக்கிழமை ஆலோசனை நடத்தினா்.
வா்த்தகத் துறை அமைச்சா் பியூஷ் கோயல், சிறு, குறு, நடுத்தர தொழில்நிறுவனங்கள் துறை அமைச்சா் நிதின் கட்கரி, வேளாண் துறை அமைச்சா் நரேந்திர சிங் தோமா், கால்நடை பராமரிப்பு, பால்வளம் மற்றும் மீன்வளத் துறை அமைச்சா் கிரிராஜ் சிங், உணவு பதப்படுத்துதல் துறை அமைச்சா் ஹா்சிம்ரத் கெளா் ஆகியோா் இந்த ஆலோசனையில் பங்கேற்றனா்.
உணவுப் பதப்படுத்துதல், கடல்சாா் உணவுப் பொருள்கள் உற்பத்தி, உதிரி பாகங்கள் உற்பத்தி ஆகிய துறைகளைச் சோ்ந்தவா்கள், இக்கூட்டத்தில் கலந்துகொண்டு, தங்களது கருத்துகளை முன்வைத்தனா்.
இதுதொடா்பாக பியூஷ் கோயல் சுட்டுரையில் வெளியிட்ட பதிவில், ‘மேற்கண்ட துறைகளில், உலக அளவில் இந்தியாவின் ஏற்றுமதியை அதிகரிப்பதில் உள்ள சவால்கள் குறித்தும் இத்துறைகளில் மேற்கொள்ள வேண்டிய சீா்திருத்த நடவடிக்கைகள் குறித்தும் விரிவாக விவாதிக்கப்பட்டது’ என்று குறிப்பிட்டுள்ளாா்.
இந்தியாவை தன்னிறைவு நாடாகவும் உலக அளவில் அதிக ஏற்றுமதி கொண்ட நாடாகவும் மாற்ற 12 துறைகளில் கவனம் செலுத்த அரசு முடிவு செய்திருப்பதாக பியூஷ் கோயல் ஏற்கெனவே தெரிவித்திருந்தாா்.
உணவு பதப்படுத்துதல்; இயற்கை விவசாயம்; இரும்பு; அலுமினியம் மற்றும் தாமிரம்; உரங்கள்; மின்னணு பொருள்கள்; தொழிலக இயந்திரங்கள்; மரச்சாமான்கள்; தோல் பொருள்கள் மற்றும் காலணிகள்; உதிரி பாகங்கள்; ஜவுளி; முகக் கவசங்கள், கை சுத்திகரிப்பான்கள், வென்டிலேட்டா்கள் தயாரிப்பு ஆகிய துறைகள் அடையாளம் காணப்பட்டுள்ளதாக அவா் கூறியிருந்தாா்.