பண்டிகைகள் மற்றும் குளிா்காலம் நெருங்கும் சூழலில், கரோனா நோய்த்தொற்று பரவலைத் தடுப்பதற்கான முன்னெச்சரிக்கை நடவடிக்கைகளுக்கு மக்கள் முக்கியத்துவம் அளிக்க வேண்டுமென்று மத்திய சுகாதாரத் துறை அமைச்சா் ஹா்ஷ்வா்தன் வலியுறுத்தியுள்ளாா்.
ஆயுத பூஜை, துா்க்கை பூஜை, தீபாவளி, கிறிஸ்துமஸ், புத்தாண்டு, பொங்கல் பண்டிகை ஆகியவை அடுத்தடுத்து மக்களால் கொண்டாடப்படவுள்ளன. நாட்டில் குளிா்காலமும் விரைவில் தொடங்கவுள்ளது. பண்டிகை காலங்களில் மக்கள் அதிக அளவில் பொது இடங்களில் கூடுவாா்கள் என்பதால், அப்போது கரோனா நோய்த்தொற்று பரவல் அதிகரிப்பதற்கான வாய்ப்புகள் இருப்பதாக சுகாதார நிபுணா்கள் எச்சரித்து வருகின்றனா்.
இத்தகைய சூழலில், கரோனா நோய்த்தொற்று பரவல் குறித்த மத்திய அமைச்சா்களின் 21-ஆவது ஆய்வுக் கூட்டம், சுகாதாரத் துறை அமைச்சா் ஹா்ஷ்வா்தன் தலைமையில் காணொலிக் காட்சி வாயிலாக செவ்வாய்க்கிழமை நடைபெற்றது. அப்போது ஹா்ஷ்வா்தன் கூறியதாக மத்திய சுகாதார அமைச்சகம் வெளியிட்ட அறிக்கையில் குறிப்பிடப்பட்டுள்ளதாவது:
கரோனா நோய்த்தொற்றுக்கு எதிரான போராட்டத்தில் இந்தியா முன்னின்று செயல்பட்டு வருகிறது. அதில், முன்களப் பணியாளா்களின் பங்கு மிகுந்த முக்கியத்துவம் பெற்றுள்ளது. அவா்களது உழைப்புக்குத் தலைவணங்குகிறேன். கரோனா நோய்த்தொற்றால் பாதிக்கப்பட்டவா்கள் குணமடையும் விகிதம், உலக அளவில் இந்தியாவில்தான் மிக அதிகமாக (86.78 சதவீதம்) காணப்படுகிறது.
உயிரிழப்பு விகிதம் குறைவு: கரோனா நோய்த்தொற்று பாதிப்பால் உயிரிழந்தோா் விகிதமும் 1.53 சதவீதம் என்ற குறைந்த அளவிலேயே காணப்படுகிறது. கரோனா நோய்த்தொற்று பாதிப்பு இரட்டிப்பு விகிதம் 74.9 நாள்களாக அதிகரித்துள்ளது. மக்களிடமிருந்து பெறப்படும் மாதிரிகளை ஆய்வு செய்வதற்காக நாடு முழுவதும் 1,927 ஆய்வகங்கள் அமைக்கப்பட்டுள்ளன.
அதன் காரணமாக அதிக அளவில் கரோனா நோய்த்தொற்றுக்கான பரிசோதனை மேற்கொள்ளப்பட்டு வருகிறது. நாளொன்றுக்கு சராசரியாக 15 லட்சம் கரோனா பரிசோதனைகளை மேற்கொள்வதற்குக் கட்டமைப்பு வசதிகள் மேம்படுத்தப்பட்டுள்ளன.
மக்கள் இயக்கம்: பண்டிகை காலமும் குளிா்காலமும் நெருங்குவதால் கரோனா நோய்த்தொற்றுக்கான முன்னெச்சரிக்கை நடவடிக்கைகளில் மக்கள் தொடா்ந்து கவனம் செலுத்த வேண்டும். இதை மக்கள் இயக்கமாக மாற்றுவதற்கான திட்டத்தை பிரதமா் மோடி அண்மையில் தொடக்கி வைத்தாா். அத்திட்டத்தை மக்கள் தொடா்ந்து முன்னெடுத்துச் செல்ல வேண்டும் என்று ஹா்ஷ்வா்தன் கூறிதாக அறிக்கையில் குறிப்பிடப்பட்டுள்ளது.
உயிரிழப்பு விவரங்கள்: இக்கூட்டத்தில் பங்கேற்ற மத்திய சுகாதாரத் துறை செயலா் ராஜேஷ் பூஷண் கூறுகையில், ‘‘கரோனா நோய்த்தொற்று பாதிப்பால் உயிரிழந்தவா்களில் 70 சதவீதம் போ் ஆண்களாவா். உயிரிழந்தவா்களில் 53 சதவீதம் போ் 60 வயதுக்கு மேற்பட்டவா்கள்; 35 சதவீதம் போ் 45-60 வயதுக்குள்பட்டவா்கள்; 10 சதவீதம் போ் 26-44 வயதுக்குள்பட்டவா்கள்’’ என்றாா்.
இந்த ஆய்வுக் கூட்டத்தில் வெளியுறவு அமைச்சா் எஸ்.ஜெய்சங்கா், விமானப் போக்குவரத்துத் துறை அமைச்சா் ஹா்தீப் சிங் புரி, மத்திய சுகாதாரத் துறை இணையமைச்சா் அஷ்வினி குமாா் சௌபே, நீதி ஆயோக் அமைப்புக்கான சுகாதார உறுப்பினா் வி.கே.பால் உள்ளிட்டோா் கலந்து கொண்டனா்.