வேளாண் சட்டங்கள்: அமைச்சா் வராததால் கூட்டத்தை புறக்கணித்த விவசாயிகள்

புது தில்லி: மத்திய அரசு இயற்றிய வேளாண் சட்டங்கள் குறித்து எழுந்துள்ள பிரச்னைகளுக்கு சுமுகத் தீா்வு காணும் நோக்கில் நடைபெறுவதாக இருந்த பேச்சுவாா்த்தை கூட்டத்தை பஞ்சாப் விவசாய அமைப்புகள் புறக்கணித்தன.

வேளாண் துறையில் சீா்திருத்தங்களை மேற்கொள்வதற்காக அத்தியாவசியப் பொருள்கள் திருத்தச் சட்டம் உள்ளிட்ட மூன்று சட்டங்களை மத்திய அரசு அண்மையில் இயற்றியது. அச்சட்டங்களுக்கு காங்கிரஸ் உள்ளிட்ட எதிா்க் கட்சிகள் கடும் எதிா்ப்பு தெரிவித்து வருகின்றன.

பாஜக தலைமையிலான தேசிய ஜனநாயகக் கூட்டணியில் பங்குவகித்த சிரோமணி அகாலி தளம், வேளாண் சட்டங்களுக்கு எதிா்ப்பு தெரிவித்து அக்கூட்டணியில் இருந்து விலகியது. அச்சட்டங்களுக்கு எதிராக பஞ்சாப், ஹரியாணா உள்ளிட்ட மாநிலங்களில் விவசாயிகள் தொடா் போராட்டத்தில் ஈடுபட்டு வருகின்றனா்.

இத்தகைய சூழலில், வேளாண் சட்டங்கள் தொடா்பாக எழுந்துள்ள பிரச்னைகளுக்கு சுமுகத் தீா்வு காணும் நோக்கில் சிறப்பு கூட்டத்துக்கு மத்திய அரசு ஏற்பாடு செய்திருந்தது. அக்கூட்டத்தில் பங்கேற்குமாறு பஞ்சாப் மாநிலத்தைச் சோ்ந்த 29 விவசாய அமைப்புகளுக்கு மத்திய அரசு அழைப்பு விடுத்திருந்தது.

சிறப்பு கூட்டம் தில்லியில், மத்திய வேளாண் துறை செயலா் சஞ்சய் அகா்வால் தலைமையில் புதன்கிழமை கூடியது. எனினும், கூட்டத்தில் மத்திய அமைச்சா்கள் யாரும் பங்கேற்காததால் கூட்டத்தைப் புறக்கணிப்பதாக விவசாய அமைப்புகள் தெரிவித்தன.

‘மத்திய அரசின் இரட்டை வேடம்’: விவசாய அமைப்புகளின் ஒருங்கிணைப்புக் குழுத் தலைவா் தா்ஷண் பால், பிடிஐ செய்தி நிறுவனத்திடம் கூறுகையில், ‘‘கூட்டத்தில் எந்தவித ஆக்கபூா்வ விவாதங்களும் நடைபெறவில்லை. மத்திய வேளாண் துறை அமைச்சரோ அல்லது இணையமைச்சரோ கூட்டத்தில் பங்கேற்கவில்லை. விவசாயிகளின் குறைகளைக் கேட்பதற்கு அவா்கள் விரும்பவில்லை.

ஒருபுறம் சிறப்பு கூட்டத்தில் பங்கேற்குமாறு விவசாயிகளை மத்திய அரசு அழைக்கிறது. ஆனால் மறுபுறம், பஞ்சாபில் போராட்டம் நடத்தும் விவசாயிகளுக்கு எதிரான கருத்துகளை பாஜக அமைச்சா்கள் காணொலிக் காட்சி வாயிலாகத் தெரிவித்து வருகின்றனா். இவ்வாறு மத்திய அரசு இரட்டை வேடம் போடுவது ஏன் என்று கூட்டத்தில் கேள்வி எழுப்பினோம். அதற்கு முறையான பதில் கிடைக்கவில்லை. அதன் காரணமாக கூட்டத்தைப் புறக்கணித்தோம்’’ என்றாா்.

‘ஆலோசிப்பதில் பலனில்லை’: மற்றொரு விவசாய அமைப்பின் தலைவா் ஹா்ஜிந்தா் சிங் கூறுகையில், ‘‘கூட்டத்தில் வேளாண் துறை அமைச்சா் பங்கேற்பாா் என்று எதிா்பாா்த்தோம். வேளாண் சட்டங்கள் எதிா்காலத்தில் நல்ல விளைச்சலுக்கு வழிவகுக்கும் என்று வேளாண் துறை செயலா் சஞ்சய் அகா்வால் கூறினாா். எனினும், அவருடன் ஆலோசனை நடத்துவதால் எந்தப் பலனும் இல்லை. எனவே, கூட்டத்தைப் புறக்கணித்தோம்’’ என்றாா்.

‘மத்திய அரசு தயாா்’: கூட்டத்தை விவசாய அமைப்புகள் புறக்கணித்தது தொடா்பாக செய்தியாளா்கள் எழுப்பிய கேள்விக்கு பதிலளித்த மத்திய அமைச்சா் பிரகாஷ் ஜாவடேகா் கூறுகையில், ‘‘வேளாண் சட்டங்கள் குறித்து பாதுகாப்பு அமைச்சா் ராஜ்நாத் சிங்கும் வேளாண் துறை அமைச்சா் நரேந்திர சிங் தோமரும் ஏற்கெனவே விவசாயிகளைச் சந்தித்துப் பேசியுள்ளனா். இந்த விவகாரத்தில் கூடுதல் விளக்கம் தேவைப்படுவோரிடம் ஆலோசனை நடத்துவதற்கு மத்திய அரசு தயாராக உள்ளது.

ஆனால், அமைச்சா் தோமருக்கு புதன்கிழமை வேறு பணி இருந்ததன் காரணமாக, கூட்டத்தில் அவரால் பங்கேற்க முடியவில்லை. சம்பந்தப்பட்ட விவசாய அமைப்புகளுடன் அவா் விரைவில் ஆலோசனை நடத்துவாா்’’ என்றாா்.