புது தில்லி: நாடு முழுவதும் கரோனா தொற்றால் பாதிக்கப்பட்டோர் எண்ணிக்கை 60 லட்சத்தைக் கடந்துள்ளது. அதே சமயம், குணமடைந்தோர் எண்ணிக்கையும் 50 லட்சத்தைக் கடந்துள்ளது.
இதுகுறித்து மத்திய சுகாதாரத் துறை அமைச்சகம் வெளியிட்ட அறிக்கையில் கூறப்பட்டிருப்பதாவது:
திங்கள்கிழமை காலை வரையிலான 24 மணி நேரத்தில் புதிதாக 82,170 பேருக்கு கரோனா உறுதிசெய்யப்பட்டது. இதனால், பாதிக்கப்பட்டோர் எண்ணிக்கை 60,74,702 - ஆக அதிகரித்தது. இதேபோன்று மேலும் 74,893 பேர் குணமடைந்ததால், கரோனாவில் இருந்து மீண்டு வந்தவர்களின் எண்ணிக்கை 50,16,520 - அதிகரித்தது.
திங்கள்கிழமை காலை வரையிலான 24 மணி நேரத்தில் மேலும் 1,039 பேர் உயிரிழந்ததால், இதுவரை பலியானோர் எண்ணிக்கை 95,542 - ஆக அதிகரித்தது. இதில், அதிகபட்சமாக மகாராஷ்டிரத்தில் 35,571 பேரும், கர்நாடகத்தில் 8,582 பேரும், ஆந்திரத்தில் 5,708 பேரும், உத்தர பிரதேசத்தில் 5,594 பேரும், தில்லியில் 5,235 பேரும் கரோனாவுக்கு உயிரிழந்தனர்.
நாடு முழுவதும் 9,62,640 பேர் சிகிச்சை பெற்று வருகின்றனர். குணமடைந்தோர் விகிதம் 82.58 - ஆக அதிகரித்துள்ளது. உயிரிழப்பு விகிதம் 1.57 சதவீதமாகக் குறைந்துள்ளது.
இந்திய மருத்துவ ஆராய்ச்சிக் கவுன்சிலின் தகவல்படி, இதுவரை 7.20 கோடி கரோனா மாதிரிகள் பரிசோதிக்கப்பட்டுள்ளன. ஞாயிற்றுக்கிழமை ஒரே நாளில் மட்டும் 7.09 லட்சம் மாதிரிகள் பரிசோதிக்கப்பட்டன என்று அந்த அறிக்கையில் தெரிவிக்கப்பட்டுள்ளது.