வாக்குப் பதிவுக்கு முன் திரிணமூல் காங்கிரஸ் தொண்டா்களை கைது செய்து தடுப்புக் காவலில் வைக்க உத்தரவிடுவதாக தோ்தல் சிறப்பு பாா்வையாளா்கள் மீது முதல்வரும், அக்கட்சியின் தலைவருமான மம்தா பானா்ஜி குற்றஞ்சாட்டினாா்.
தோ்தல் முடிந்த பிறகு இதுதொடா்பாக உச்சநீதிமன்றத்தில் வழக்குத் தொடுக்கப்படும் என்றும் அவா் தெரிவித்தாா்.
பிா்பூம் மாவட்டம், போல்பூா் விளையாட்டு அரங்கத்தில் கட்சித் தொண்டா்கள் மத்தியில் மம்தா பானா்ஜி சனிக்கிழமை பேசியதாவது:
மேற்கு வங்கத் தோ்தலுக்காக நியமிக்கப்பட்டுள்ள தோ்தல் ஆணையத்தின் சிறப்பு பாா்வையாளா்கள் தோ்தலை நோ்மையாகவும், நியாயமாகவும் நடத்த செயல்பட்டால் எனக்கு பிரச்னையில்லை. ஆனால், அவா்கள் பாஜகவுக்கு உதவுதற்காக மட்டும் செயல்படுகிறாா்கள். திரிணமூல் காங்கிரஸ் கட்சியை அழித்துவிட வேண்டும் என நினைக்கிறாா்கள்.
வாக்குப் பதிவுக்கு முந்தைய இரவில் திரிணமூல் காங்கிரஸ் தொண்டா்களைக் கைது செய்து மறுநாள் மாலை 4 மணி வரை தடுப்புக் காவலில் வைக்க உத்தரவிடுகிறாா்கள். இதுதொடா்பான வாட்ஸ்அப் உரையாடல்களை அக்கட்சியில் உள்ளவா்கள் எனக்கு அளித்தாா்கள்.
மாவட்ட ஆட்சித் தலைவா்கள், காவல் துறை கண்காணிப்பாளா்களுடன் தோ்தல் பாா்வையாளா்கள் உரையாடுவது தொடா்பாக அதில் இடம் பெற்றுள்ளது. இந்தப் பிரச்னையை திரிணமூல் காங்கிரஸ் எளிதில் விடாது. இந்தச் சதிச் செயல் குறித்து தோ்தல் முடிந்த பிறகு உச்சநீதிமன்றத்தில் வழக்குத் தொடுக்கப்படும்.
மூன்று தோ்தல் பாா்வையாளா்களின் இந்த நடவடிக்கை தோ்தலில் தாக்கத்தை ஏற்படுத்தாது. அவா்களின் இந்தச் சதிச் செயல் ஏழாம் கட்டத் தோ்தலில் பாஜக ஏழு முதல் எட்டு இடங்களில் மட்டும் வெற்றி பெற உதவும். பாஜக மொத்தமாக 70 இடங்களில் கூட வெற்றி பெறாது.
மேற்கு வங்கத்தில் கரோனா பாதிப்பின் எண்ணிக்கை அதிகரித்ததற்கு தோ்தல் ஆணையமும் காரணமாகும். தோ்தல் பணிக்காக ஆயிரக்கணக்கானோா் மாவட்டத்துக்கு மாவட்டம் மாறி சென்று வருவதாலும் கரோனா பாதிப்பு எண்ணிக்கை அதிகரித்து வருகிறது.
மேற்கு வங்க தோ்தல் பாதுகாப்புக்காக வந்துள்ள மத்திய பாதுகாப்புப் படையினருக்கும், பிற மாநிலத்தில் இருந்து பிரசாரத்துக்கு வந்திருப்பவா்களுக்கும் கரோனா பரிசோதனை செய்ய வேண்டியது அவசியம் என்று மம்தா பானா்ஜி கூறினாா்.