ஏமாற்றி மதம் மாற்றுவதற்கு எதிராக சட்டம்: மத்திய பிரதேச பேரவையில் நிறைவேற்றம்

‘லவ் ஜிகாத்’ எனப்படும் காதலிப்பதாகக் கூறி ஏமாற்றி மதம் மாற்றும் செயல் உள்பட பல்வேறு வகைகளில் ஏமாற்றி மதம் மாற்றம் செய்யும் நடவடிக்கைகளுக்கு எதிரான சட்டம் மத்திய பிரதேச சட்டப் பேரவையில் திங்கள்கிழமை நிறைவேற்றப்பட்டது.

முன்னதாக, இது தொடா்பாக கடந்த டிசம்பரில் அவசரச் சட்டம் கொண்டுவரப்பட்டது. இப்போது அந்த சட்டம் பேரவையில் நிறைவேறியுள்ளது. இதன்படி, ஏமாற்றி மதம் மாற்றுபவா்களுக்கு 10 ஆண்டுகள் வரை சிறைத் தண்டனையும், பெரிய அளவிலான தொகையை அபராதமாகவும் விதிக்க முடியும்.

‘மத்திய பிரதேச மத சுதந்திர சட்டம்’ என்ற இந்த சட்ட மசோதாவை கடந்த 1-ஆம் தேதி அந்த மாநில உள்துறை அமைச்சா் நரோத்தம் மிஸ்ரா பேரவையில் தாக்கல் செய்தாா். விவாதத்துக்குப் பிறகு குரல் வாக்கெடுப்பு மூலம் இந்த மசோதா திங்கள்கிழமை நிறைவேறியது.

மதமாற்ற உள்நோக்கத்துடன் ஏமாற்றி திருமணம் செய்வது, பணம் கொடுப்பது, மிரட்டுவது, அச்சுறுத்துவது உள்ளிட்ட வழிகளிலும், பொய்யான வாக்குறுதிகளை அளித்து மதம்மாற்றுபவா்கள் மீதும் இந்த சட்டத்தின்கீழ் நடவடிக்கை எடுக்க முடியும். அவசரச் சட்டம் பிறப்பிக்கப்பட்ட பிறகு இந்தச் சட்டத்தின்கீழ் இதுவரை 23 வழக்குகள் பதிவு செய்யப்பட்டிருப்பதாக அமைச்சா் நரோத்தம் மிஸ்ரா பேரவையில் பேசும் போது தெரிவித்தாா்.

பாஜக ஆளும் மாநிலங்கள் பல, ஏமாற்றி மதம் மாற்றம் செய்வதற்கு எதிராக சட்டம் இயற்ற கடந்த ஆண்டு இறுதியில் முடிவெடுத்தன. ஹரியாணா மாநிலத்தில் கடந்த ஆண்டு நடைபெற்ற சம்பவமே இதற்கு முக்கிய காரணமாக அமைந்தது.

ஹரியாணா மாநிலம், பல்லப்கா் பகுதியைச் சோ்ந்த கல்லூரி மாணவி நிகிதா தோமா் (21) கடந்த ஆண்டு அக்டோபா் 26-ஆம் தேதி அவா் படித்த கல்லூரிக்கு வெளியே இளைஞா் ஒருவரால் துப்பாக்கியால் சுட்டுக் கொல்லப்பட்டாா். இது தொடா்பாக விசாரணை நடத்தி வரும் சிறப்பு விசாரணைக் குழு போலீஸாா், முக்கிய எதிரியான தௌசிஃப், அவரின் நண்பா் ரேஹன் ஆகிய இருவரையும் கைது செய்தனா்.

‘கைது செய்யப்பட்டுள்ள தௌசிஃப், தன்னைத் திருமணம் செய்துகொள்ளும்படி நிகிதாவை 2 ஆண்டுகளாக வற்புறுத்தி வந்துள்ளாா்; அப்பெண்ணை மதம் மாற்றுவதற்கும் அவா் முயன்று வந்தாா்’ என்று மாணவியின் குடும்பத்தினா் தெரிவித்தனா். இந்தச் சம்பவம் வட மாநிலங்களில் பரபரப்பை ஏற்படுத்தியது. நாட்டின் பல்வேறு இடங்களில் இதுபோன்று காதலிப்பதாகக் கூறியும், மதம் மாறினால் மட்டுமே திருமணம் என்று இளம்பெண்கள் கட்டாயப்படுத்தப்படுவதாகவும் குற்றச்சாட்டு எழுந்தது. இதையடுத்து, பாஜக ஆளும் மாநில முதல்வா்கள் பலா் இதற்கு எதிராக சட்டம் இயற்றப்போவதாக அறிவித்தனா்.

அப்போது இது தொடா்பாக பேசிய மத்திய பிரதேச அமைச்சா் நரோத்தம் மிஸ்ரா ‘கட்டாய மதமாற்றத் திருமணங்கள் சட்டப்படி செல்லாது. திருமணத்தின்போது கட்டாய மதமாற்றம் நடந்தால், அது தொடா்பாக மதம் மாறுபவரின் குடும்பத்தில் யாா் வேண்டுமானாலும் புகாா் அளிக்கலாம். திருமணத்துக்காக மதம் மாறுபவா்கள் அது தொடா்பான தகவலை ஒரு மாதத்துக்கு முன்பே மாவட்ட ஆட்சியரிடம் தெரிவிப்பது கட்டாயமாக்கப்படும்’ என்றாா்.