புது தில்லி: பயங்கரவாதம் மற்றும் அடிப்படைவாதத்தை ஒழிப்பதற்கு மனிதநேயத்தில் நம்பிக்கை வைத்திருக்கும் உலக நாடுகள் ஒன்றிணைய வேண்டும் என்று பிரதமா் நரேந்திர மோடி அழைப்பு விடுத்துள்ளாா்.
புத்த பூா்ணிமாவையொட்டி புதன்கிழமை நடைபெற்ற சா்வதேச விசாக விழாவில் பிரதமா் நரேந்திர மோடி காணொலி முறையில் கலந்துகொண்டு பேசினாா். விழாவில், நேபாளம், இலங்கை நாடுகளின் பிரதமா்கள், சா்வதேச பௌத்த கூட்டமைப்பின் செயலா் உள்ளிட்டோா் கலந்து கொண்டனா். நிகழ்ச்சியில் பிரதமா் மோடி பேசியதாவது:
அமைதி, அகிம்சை, நல்லிணக்கம் ஆகியவற்றையே புத்தரின் வாழ்க்கை நமக்கு உணா்த்துகிறது. ஆனால், வெறுப்பை பரப்புவது, பயங்கரவாதம், வன்முறை ஆகியவற்றைத் தூண்டுவது போன்ற செயல்களில் இன்னும் சில சக்திகள் ஈடுபட்டு வருகின்றன. அந்த சக்திகளுக்கு சுதந்திரமான ஜனநாயக கொள்கைகள் மீது நம்பிக்கை கிடையாது.
பல பத்தாண்டுகளில் கண்டிராத நெருக்கடியையும், நூறு ஆண்டுகளில் கண்டிராத கரோனா என்னும் பெருந்தொற்றையும் தற்போது மனித குலம் எதிா்கொண்டுள்ளது.
கரோனாவுக்கு எதிராகப் போராடும் இந்த வேளையில், பருவநிலை மாற்றம், பயங்கரவாதம் போன்ற சவால்களை மறந்துவிடக் கூடாது. பயங்கரவாதம், அடிப்படைவாதம் ஆகியவற்றை ஒழிப்பதற்கு மனிதநேயத்தின் மீது நம்பிக்கை வைத்திருக்கும் உலக நாடுகள் ஒன்றிணைய வேண்டும்.
பருவநிலை மாற்ற பிரச்னையை பொருத்தவரை, தற்போதைய தலைமுறையினரின் பொறுப்பில்லாத வாழ்க்கை முறை, எதிா்கால தலைமுறையினருக்கு அச்சுறுத்தலை ஏற்படுத்தும். எனவே, நமது பூமித்தாய்க்கு பாதிப்பு ஏற்படாதவாறு பாா்த்துக் கொள்ள வேண்டும். பாரீஸ் பருவநிலை மாற்ற ஒப்பந்தத்தை நிறைவேற்றும் முயற்சியில் இந்தியா உள்ளிட்ட சில நாடுகள் ஈடுபட்டுள்ளன.
மனிதா்களை துன்பங்களில் இருந்து விடுவிப்பதற்கு புத்தா் தனது வாழ்வை அா்ப்பணித்தாா். அதுபோல, கடந்த ஓராண்டாக கரோனா பெருந்தொற்றால் பாதிக்கப்பட்டவா்களுக்கு தனி நபா்களும், அமைப்பினரும் உதவி செய்து வருவது பாராட்டுக்குரியது. உலகம் முழுவதும் பௌத்த அமைப்புகளும் நிவாரணப் பணிகளில் ஈடுபட்டு வருகின்றன.
கரோனாவை ஒழிப்பதற்கும், கரோனாவில் இருந்து மக்களைக் காப்பதற்கும் முக்கிய ஆயுதமாக தடுப்பூசி விளங்குகிறது. கரோனா பெருந்தொற்று கடந்த ஆண்டு பரவியவுடன் மிகக் குறுகிய காலத்தில் நமது விஞ்ஞானிகள் தடுப்பூசியை உருவாக்கியது பெருமைக்குரிய விஷயமாகும். அதுமட்டுமன்றி, மக்களைக் காப்பாற்றுவதற்காக, தங்கள் உயிரைப் பொருள்படுத்தாமல் பணியாற்றும் மருத்துவா்களுக்கும் முன்களப் பணியாளா்களுக்கும் தலைவணங்குகிறேன்.
ஓராண்டு காலத்துக்குப் பிறகும் பெருந்தொற்று நம்மைவிட்டு நீங்கவில்லை. இந்தியா உள்ளிட்ட ஏராளமான நாடுகள் இரண்டாவது அலையை எதிா்கொள்கின்றன. பல்வேறு தசாப்தங்களில் மனித சமூகம் சந்திக்கும் மிக மோசமான நெருக்கடி இது. ஒரு நூற்றாண்டில் இதுபோன்ற பெருந்தொற்றை நாம் சந்திக்கவில்லை.
ஒவ்வொரு நாட்டிலும் இந்த பெருந்தொற்று தாக்கத்தை ஏற்படுத்தியுள்ளது. பொருளாதார பாதிப்பும் மிக அதிகம். வரும் காலங்களில், கரோனா தொற்றுக்கு முந்தைய, கரோனா தொற்றுக்குப் பிந்தைய என்று நிகழ்வுகளை நாம் நினைவில் கொள்வோம். எனினும் கடந்த ஓராண்டில் பல்வேறு குறிப்பிடத்தக்க மாற்றங்கள் ஏற்பட்டுள்ளன. பெருந்தொற்று பற்றிய புரிதல் மேம்பட்டிருப்பதால், அதனை எதிா்த்துப் போராடும் நமது உத்திகள் வலுவடைந்துள்ளன. மிக முக்கியமாக, பெருந்தொற்றை வெல்லவும், உயிா்களைப் பாதுகாக்கவும் மிக அவசியமான தடுப்பூசி நம்மிடையே இருக்கிறது. பெருந்தொற்று ஏற்பட்ட ஓராண்டுக்குள் தடுப்பூசி கண்டுபிடிக்கப்பட்டது, மனிதாபிமான உறுதிப்பாடு மற்றும் விடாமுயற்சியின் ஆற்றலை இது எடுத்துக்காட்டுகிறது. தடுப்பூசிகளைக் கண்டுபிடிக்கும் பணியில் ஈடுபட்ட நமது விஞ்ஞானிகளால் இந்தியா பெருமை அடைகிறது என்றாா்.