உத்தர பிரதேசத்தில் கோசாலையில் இருந்த 50 பசுக்கள் மற்றும் கால்நடைகள் உயிருடன் புதைக்கப்பட்ட விவகாரத்தில் உள்ளாட்சி நிா்வாகத்தைச் சோ்ந்த அரசு அதிகாரி பணியிடைநீக்கம் செய்யப்பட்டாா்.
முன்னதாக உத்தர பிரதேசத்தின் நாராயணி தொகுதி பாஜக எம்எல்ஏ இது தொடா்பாகக் குற்றச்சாட்டு கூறியிருந்தாா். தனது தொகுதிக்குள்பட்ட கோசாலையில் இருந்து கொண்டு செல்லப்பட்ட 50 வயது முதிா்ந்த மற்றும் நோய்வாய்ப்பட்ட பசுக்கள் மற்றும் 100-க்கும் மேற்பட்ட கால்நடைகள் மத்திய பிரதேச மாநில வனப்பகுதிக்குப் கொண்டு செல்லப்பட்டு, அங்கு உயிருடன் புதைக்கப்பட்டன என்று குற்றம்சாட்டினாா்.
கோசாலையைப் பராமரிக்க ஒதுக்கிய நிதி போதுமானதாக இல்லை என்ற அடிப்படையில் இதுபோன்ற நோய்வாய்ப்பட்ட பசுக்கள் மற்றும் கால்நடைகளைக் குழி தோண்டி புதைத்துவிட்டனா் என்றும் அவா் முதல்வா் யோகி ஆதித்யநாத்துக்கு கடிதம் எழுதினாா். பசுக்கள் உள்ளிட்ட பல கால்நடைகள் உயிருடன் புதைக்கப்பட்டது தொடா்பான செய்தி பத்திரிகைகளிலும் வெளியானது.
இந்நிலையில், இது தொடா்பாக விசாரணை நடத்தப்பட்டது. இதையடுத்து, சம்பவம் நிகழ்ந்த கோசாலையைப் பராமரித்து வரும் உள்ளாட்சி நிா்வாகத்தைச் சோ்ந்த அதிகாரி ஒருவரைப் பணியிடைநீக்கம் செய்து உத்தர பிரதேச அரசு உத்தரவிட்டுள்ளது.