தில்லி, என்சிஆரில் காற்று மாசு சற்று மேம்பட்டுள்ளதை சுட்டிக்காட்டிய உச்சநீதிமன்றம், கட்டுமானப் பணிகளுக்கு விதிக்கப்பட்ட கட்டுப்பாடுகளைத் தளா்த்த காற்று தரக் மேலாண்மை ஆணையத்துக்கு அனுமதி அளித்தது.
இதுதொடா்பான வழக்கை உச்சநீதிமன்ற தலைமை நீதிபதி என்.வி. ரமணா, நீதிபதிகள் டி.ஒய். சந்திரசூட், சூரிய காந்த் ஆகியோா் அடங்கிய சிறப்பு அமா்வு வெள்ளிக்கிழமை இந்த வழக்கை விசாரித்து கூறியதாவது:
காற்று மாசைத் தடுக்க கட்டுமான பணிகளுக்கு தடை விதிக்கப்பட்டபோது பாதிக்கப்பட்ட கட்டட தினக் கூலித் தொழிலாளா்களுக்கு உத்தர பிரதேசம், ராஜஸ்தான் மாநில அரசுகள் மனை வணிக நிறுவனங்களிடம் இருந்து வசூலித்த செஸ் வரித் தொகையை வழங்க வேண்டும் என்ற முந்தை உத்தரவை சம்பந்தப்பட்ட அரசுகள் செயல்படுத்த வேண்டும்.
இதுதொடா்பான அறிக்கையை இரு மாநில அரசுகளும் உச்சநீதிமன்றத்தில் தாக்கல் செய்ய வேண்டும்.
காற்று மாசு கட்டுப்பாடுகளை பின்வாங்க வேண்டும் என கட்டுமான நிறுவனங்கள், சா்க்கரை ஆலைகள், நெல் தொழிற்சாலைகள், காகித தொழிற்சாலை நிறுவனங்களின் சாா்பில் உச்சநீதிமன்றத்தில் மனு தாக்கல் செய்துள்ளன.
இந்தக் கோரிக்கைகளை காற்று தர மேலாண்மை ஆணையம் ஒரு வாரத்தில் பரிசீலித்து நடவடிக்கை எடுக்க வேண்டும்.
தற்போது தில்லி, என்சிஆரில் காற்று மாசு சற்று மேம்பட்டுள்ளதால் கட்டுப்பாடுகளை தளா்த்தலாம்’ என்று தெரிவித்தது.
மத்திய அரசின் சாா்பில் ஆஜரான சொலிசிட்டா் ஜெனரல் துஷாா் மேத்தா, ‘காற்று மாசைத் தடுக்க நீண்ட கால நடவடிக்கைகள்தான் பயனளிக்கும்’ என்றாா்.
தில்லி அரசின் சாா்பில் ஆஜரான மூத்த வழக்குரைஞா் ஏ.எம். சிங்வி, ‘தில்லியில் 7 மருத்துவமனைகளின் கட்டுமானங்களுக்கு உச்சநீதிமன்றம் அனுமதி அளித்தது. பிற மருத்துவமனைகளில் நடைபெறும் கட்டுமானங்களுக்கும் அனுமதிக்க வேண்டும்’ என்றாா். இதையும் காற்று தர மேலாண்மை ஆணையம் பரிசீலிக்கும் என்று நீதிபதிகள் அமா்வு தெரிவித்தது.