குஜராத் மாநிலத்தில் உள்ளாட்சித் தோ்தல் வாக்குப் பதிவு ஞாயிற்றுக்கிழமை நடைபெற்ற நிலையில், ஆமதாபாத்தில் உள்ள ஒரு வாக்குச் சாவடியில் மத்திய உள்துறை அமைச்சா் அமித் ஷா தனது குடும்பத்தினருடன் வந்து வாக்குப் பதிவை செய்தாா்.
அப்போது ‘உள்ளாட்சித் தோ்தலில் பாஜக வெற்றிபெறும்’ என்று அவா் நம்பிக்கை தெரிவித்தாா்.
குஜராத் மாநிலத்தில் ஆமதாபாத், சூரத், வதோரா, ராஜ்கோட், ஜாம்நகா், பாவ்நகா் ஆகிய 6 மாநகராட்சிகளுக்கான தோ்தல் வாக்குப் பதிவு ஞாயிற்றுக்கிழமை நடைபெற்றது. இந்த 6 மாநகராட்சிகளும் கடந்த பல ஆண்டுகளாக பாஜக வசமே இருந்து வருகிறது.
இந்த நிலையில், ஆமதாபாத் மாநகராட்சி பகுதியில் வாக்காளராக பதிவு செய்துள்ள அமித் ஷா, நரன்புரா துணை மண்டல அலுவலகத்தில் அமைக்கப்பட்டிருந்த வாக்குச் சாவடிக்கு தனது குடும்பத்தினருடன் வந்து வாக்குப் பதிவை செய்தாா். வாக்குப் பதிவு செய்த பின்னா், அருகிலுள்ள காம்நாத் மஹாதேவ் கோயிலுக்கு குடும்பத்தினருடன் சென்று வழிபாடு நடத்தினாா்.
பின்னா் அவா் செய்தியாளா்களுக்கு அளித்த பேட்டியில், ‘பிரதமா் நரேந்திர மோடி தலைமையில் பாஜக நாடு முழுவதும் வெற்றியைப் பதிவு செய்து வருகிறது. பாஜகவின் வெற்றிப்பயணம் தொடங்கிய இடமான குஜராத் மாநிலம், பாஜகவின் கோட்டை என்பதை இந்த உள்ளாட்சித் தோ்தலில் மீண்டும் நிரூபிக்கும்’ என்று அவா் கூறினாா்.
அமித் ஷா வருகையையொட்டி அந்த வாக்குச் சாவடியில் பலத்த போலீஸ் பாதுகாப்பு போடப்பட்டிருந்தது. வாக்கு எண்ணிக்கை வரும் செவ்வாய்க்கிழமை நடைபெற உள்ளது.
இந்தத் தோ்தலில் 42.21% வாக்குகள் பதிவானதாக மாநில தோ்தல் ஆணையத்தின் வலைதளத்தில் தெரிவிக்கப்பட்டது.
வாக்கு எண்ணிக்கை செவ்வாய்க்கிழமை (பிப்.23) நடைபெறவுள்ளது.
கரோனாவில் இருந்து மீண்டாா் குஜராத் முதல்வா் ரூபானி
குஜராத் முதல்வா் விஜய் ரூபானி (64) கரோனா தொற்றில் இருந்து மீண்டாா். அந்த மாநில முதல்வா் அலுவலகம் ஞாயிற்றுக்கிழமை வெளியிட்ட செய்தியில் இத்தகவல் தெரிவிக்கப்பட்டுள்ளது. முன்னதாக, கடந்த 15-ஆம் தேதி அவருக்கு கரோனா பாதிப்பு உறுதி செய்யப்பட்டது.
கடந்த 14-ஆம் தேதி வதோதராவில் நடைபெற்ற பொதுக் கூட்டத்தில் பங்கேற்ற அவா், மேடையில் பேசிக் கொண்டிருந்தபோதே திடீரென மயங்கி விழுந்தாா். அதையடுத்து, ஆமதாபாதில் உள்ள மருத்துவமனையில் முதல்வா் விஜய் ரூபானி அனுமதிக்கப்பட்டாா். அவருக்கு மருத்துவா்கள் தீவிர சிகிச்சை அளித்தனா். முதல்வருக்கு கரோனா நோய்த்தொற்று பாதிப்பு இருப்பதாக மருத்துவமனை அறிவித்தது. இதையடுத்து, அவருக்கு தொடா்ந்து சிகிச்சையளிக்கப்பட்டு வந்தது.
இந்நிலையில், அவருக்கு ஞாயிற்றுக்கிழமை நடத்தப்பட்ட ஆா்டி-பிசிஆா் பரிசோதனையில் கரோனாவில் இருந்து விடுபட்டது தெரியவந்தது. நீரிழிவு, ரத்த அழுத்தம் போன்ற இணை நோய்கள் எதுவும் அவருக்கு இல்லை. தொடா் பயணத்தால் ஏற்பட்ட உடல்சோா்வு, தூக்கமின்மை உள்ளிட்டவற்றின் காரணமாக முதல்வா் மயங்கி விழுந்தாா் என்று மாநில பாஜக ஏற்கெனவே தெரிவிக்கப்பட்டிருந்தது.