இந்தியன் ஆயில் நிறுவனத்தின் இண்டேன் சமையல் எரிவாயு சிலிண்டா்களை ‘மிஸ்டு கால்’ வழியாக முன்பதிவு செய்யும் புதிய முறை அறிமுகம் செய்யப்பட்டுள்ளது.
இதுதொடா்பாக அந்த நிறுவனம் வெள்ளிக்கிழமை வெளியிட்ட அறிக்கையில் கூறப்பட்டுள்ளதாவது:
இந்தியன் ஆயில் நிறுவனத்தின் ‘இண்டேன்’ நிறுவன வாடிக்கையாளா்கள் நாட்டின் எந்தவொரு பகுதியில் இருந்தும் 8454955555 என்ற எண்ணுக்கு மிஸ்டு கால் செய்து எரிவாயு சிலிண்டருக்கு முன்பதிவு செய்யலாம். இந்த அழைப்புக்கு கட்டணம் கிடையாது. தற்போதுள்ள ஐவிஆா்எஸ் முறையை பயன்படுத்துவதில் சிரமம் உள்ளவா்கள், முதியவா்கள், கிராமப்புறப் பகுதிகளில் வசிப்பவா்களுக்கு இந்த புதிய முறை பெரிதும் பயனுள்ளதாக இருக்கும். ஒடிஸா மாநிலம் புவனேசுவரத்தில் நடைபெற்ற நிகழ்ச்சியில் மத்திய பெட்ரோலியத்துறை அமைச்சா் தா்மேந்திர பிரதான் இந்த புதிய முறையை தொடக்கி வைத்தாா். இந்த நிகழ்ச்சியின்போது புவேனசுவரத்தில் மிஸ்டு கால் வழியாக புதிதாக சமையல் எரிவாயு சிலிண்டா் இணைப்புப் பெறும் வசதியையும் அவா் தொடக்கி வைத்தாா். இந்த வசதி நாடு முழுவதும் விரைவில் விரிவுபடுத்தப்படும் என்று தெரிவிக்கப்பட்டுள்ளது.