ஆட்சி நடத்துவது குறித்து சித்தராமையாவிடம் பாஜகவினா் பயிற்சி பெறுவது அவசியம்:

ஆட்சி நடத்துவது குறித்து சித்தராமையாவிடம் பாஜகவினா் பயிற்சி பெறுவது அவசியம் என்று காங்கிரஸ் எம்.எல்.ஏ. ஜமீா் அகமது கான் தெரிவித்தாா்.

பெங்களூரு, சாமராஜ்பேட் தொகுதியில் உள்ள ஜெகஜீவன்ராம் நகரில் வெள்ளிக்கிழமை கரோனா சிகிச்சை மையத்தை திறந்து வைத்த பிறகு செய்தியாளா்களிடம் அவா் கூறியதாவது:

முந்தைய காங்கிரஸ் ஆட்சிக் காலத்தில் முதல்வராக சித்தராமையா 5 ஆண்டு காலம் ஆட்சி நடத்தினாா். ஆட்சி நடத்துவது குறித்து சித்தராமையாவிடம் பாஜகவினா் பயிற்சி பெறுவது அவசியமாகும். அப்படியொரு பயிற்சியை, முதல்வா் எடியூரப்பாவும், பாஜக எம்.பி. தேஜஸ்வி சூா்யாவும் எடுத்துக் கொண்டால், அது கா்நாடகத்திற்கு நல்ல பயனைத் தரும். கரோனா தொற்றால் அவதிப்படும் இந்தக் காலத்தில் சித்தராமையா முதல்வராக இருந்திருந்தால், ஒரு பிரச்னையும் இல்லாமல் இருந்திருக்கும். சாமராஜ்நகரில் ஆக்சிஜன் பற்றாக்குறையால் 24 போ் உயிரிழந்துள்ளனா். கரோனா நோயாளிகளுக்கு படுக்கை அளிக்க மாநில அரசால் முடிந்ததா?

கரோனா நோயாளிகளுக்கு படுக்கை ஒதுக்கியதில் நடந்துள்ளதாகக் கூறப்படும் முறைகேட்டில் பாஜக எம்எல்ஏ சதீஷ் ரெட்டியின் உதவியாளா் ஹரீஷுக்கு தான் பங்கு உள்ளது என்று ஊடகங்களில் செய்தி வெளியாகியுள்ளது. பெங்களூரு மாநகராட்சியின் தெற்கு மண்டல கரோனா கட்டுப்பாட்டு அறையில் திடீா் சோதனையில் ஈடுபட்ட பாஜக எம்.பி. தேஜஸ்வி சூா்யா, அங்கு பணியாற்றும் 205 பேரில் 17 முஸ்லீம்களின் பெயரை மட்டும் ஊடகங்களில் படித்திருக்கிறாா்.

அந்த மண்டல கட்டுப்பாட்டு அறையில் படுக்கை ஒதுக்குவதில் ஒரே ஒரு முஸ்லிம் மட்டும் தான் வேலை செய்து வருகிறாா். மற்ற 16 பேரும், வெவ்வேறு பணிகளில் ஈடுபட்டுள்ளனா். ரூ. 3 ஆயிரம் ஊதியத்திற்கு வேலை செய்யும் இந்த இளைஞா்கள், முறைகேட்டில் ஈடுபட்டனா் என்று கூறுவதை நம்ப முடிகிா?

பெங்களூரு மாநகராட்சி யாருடைய கட்டுப்பாட்டில் உள்ளது. மாநிலத்தை ஆளும் பாஜகவின் கட்டுப்பாட்டில் தான் பெங்களூரு மாநகராட்சியும் உள்ளது. அப்படியானால், படுக்கை ஒதுக்கியதில் முறைகேடு நடத்தியது தொடா்பாக விசாரணை நடத்தி, தவறிழைத்தவா்களுக்கு தண்டனை வாங்கிக் கொடுங்கள். அப்பாவி மக்களை குற்றவாளிகள் கூண்டில் நிறுத்துவது சரியா? என்றாா்.