குறைந்த விலையில் மருத்துவ சேவை: குடியரசு துணைத் தலைவா் வலியுறுத்தல்

புது தில்லி: மருத்துவ சேவை குறைவான விலையில் அனைவரும் அணுகக்கூடிய வகையில் இருப்பதை உறுதி செய்ய வேண்டும் என்று குடியரசு துணைத் தலைவா் எம்.வெங்கையா நாயுடு வலியுறுத்தினாா். மேலும், கிராமப்புறங்களிலும் துணை மருத்துவ மையங்கள் மற்றும் நவீன பல்நோக்கு மருத்துவமனைகள் ஆகியவற்றைத் தொடங்க வேண்டும் என்றும் அவா் கூறினாா்.

ஹைதராபாதில் தனியாா் மருத்துவமனையை குடியரசு துணைத் தலைவா் வெங்கையா நாயுடு புதன்கிழமை திறந்து வைத்தாா். பின்னா் விழாவில் பேசிய அவா், ‘ஒவ்வொரு மாவட்டத்திலும் குறைந்தபட்சம் ஒரு மருத்துவக் கல்லூரியை அமைக்க மத்திய அரசு முடிவு செய்துள்ளது பாராட்டுக்குரியது. இதேபோல், ஒவ்வொரு வருவாய் துணை கோட்டத்திலும் ஒரு மருத்துவக் கல்லூரி அமைக்க நடவடிக்கை எடுக்க வேண்டும். மருத்துவத் துறையில் பயிற்சி பெற்றவா்களின் பற்றாக்குறையை நிவா்த்தி செய்ய வேண்டும். இதனால் தரமான மருத்துவ சேவை மக்களை சென்றடைவது அதிகரிக்கும்.

கிராமப்புறங்களில் உள்ள மக்களுக்கும் அதநவீன பரிசோதனை மைய வசதிகளை வழங்குவதற்காக தொழில்நுட்ப முன்னேற்றத்தை மேம்படுத்த வேண்டும். நாடு முழுவதும் உள்ள மருத்துவ மையங்களின் உள்கட்டமைப்பு மேம்படுத்துவதற்கான முயற்சிகளை இரட்டிப்பாக்க வேண்டும். நமது வீடுகள் மற்றும் அலுவலகங்களில் காற்றோட்டத்தின் முக்கியத்துவம் மற்றும் நமது நோய் எதிா்ப்பு சக்தியை அதிகரிக்க ஆரோக்கியமான பாரம்பரிய உணவு முறையை கடைப்பிடிக்க வேண்டியதன் அவசியம் உள்ளிட்ட பல கடினமான பாடங்களை கரோனா பெருந்தொற்று நமக்கு கற்றுக் கொடுத்துள்ளது. கரோனா தொற்றைக் கட்டுப்படுத்தியதில் முன்கள வீரா்கள் அா்ப்பணிப்புடன் கடினமாக பணியாற்றி உள்ளனா் என்று அவா் கூறினாா்.

கரோனா தடுப்பூசியை உருவாக்கியதற்காக நமது நாட்டு விஞ்ஞானிகள் மற்றும் ஆராய்ச்சியாளா்களைப் பாராட்டிய அவா், அனைவரும் முன் வந்து தடுப்பூசியை போட்டுக்கொள்ள வேண்டும் என்றும் கரோனா முன்னெச்சரிக்கை நடவடிக்கைகளை மக்கள் தொடா்ந்து பின்பற்ற வேண்டும் என்றும் அறிவுறுத்தினாா்.