புதுதில்லி: 'ரெப்போ ரேட்' எனும் வங்கிகளுக்கான குறுகிய கால கடன்களுக்கான ரெப்போ வட்டி விகிதத்தில் எந்த மாற்றமின்றி 4 சதவிகிதமாக தொடரும் என ரிசர்வ் வங்கி ஆளுநர் சக்தி கந்ததாஸ் தெரிவித்துள்ளார்.
வட்டி விகிதங்களில் மாற்றம் குறித்து இரு மாதங்களுக்கு ஒருமுறை நடைபெறும் நிதிக்கொள்கைக் குழு கூட்டம் இன்று தில்லியில் நடைபெற்றது. கூட்டத்தில் வட்டி விகிதங்களில் மாற்றமில்லை என முடிவு செய்யப்பட்டுள்ளது.
ரெப்போ வட்டி விகிதம் 4 சதவீதமாக தொடரும் என்றும் ரிவர்ஸ் ரெப்போ வட்டி விகிதமும் மாற்றமின்றி 3.35 சதவீதம் என்ற அளவிலேயே தொடரும், இதனால் வங்கிகளுக்கான வட்டி விகிதத்தில் மாற்றம் இருக்காது என்று ரிசர்வ் வங்கி ஆளுநர் சக்தி கந்ததாஸ் கூறியுள்ளார்.
இந்தியாவின் 2021-22 நிதியாண்டிற்கான ஜிடிபி வளர்ச்சிக்கான திட்டம் 9.5 சதவிகித்திலேயே தக்க வைக்கப்படுகிறது. 2 ஆவது காலாண்டில் 7.9 சதவிகிதமாகவும், 3 ஆவது காலாண்டில் 6.8 சதவிகிதமாகவும், 4 ஆவது காலாண்டில் 6.1 சதவிகிதமாகவும் இருக்கும். 2022-23 ஆம் நிதியாண்டின் முதல் காலாண்டுக்கான மொத்த ஜிடிபி வளர்ச்சி 17.2 சதவிகிதமாக இருக்கும் என கணிக்கப்பட்டுள்ளது.
நுகர்வோர் விலை குறியீட்டெண் (சிபிஐ) அடிப்படையில் கணக்கிடப்படும் நாட்டின் சில்லறைப் பணிவீக்கம் 2022 ஆம் நிதியாண்டில் 5.3 சதவிகிதமாக இருக்கும் என கணிக்கப்பட்டுள்ளது. 2022-23 ஆம் நிதியாண்டின் முதல் காலாண்டிற்கான சில்லறைப் பணிவீக்கம் 5.2 சதவிகிதமாக இருக்கும் என கணிக்கப்பட்டுள்ளதாக சக்திகாந்த தாஸ் தெரிவித்துள்ளார்.
ரெப்போ ரேட் என்பது ரிசர்வ் வங்கி, வங்கிகளுக்கு கொடுக்கும் கடனுக்கான வட்டி விகிதம் ஆகும். ரெப்போ ரேட் குறையும்போது, வங்கிகள் வாடிக்கையாளர்களுக்கு வழங்கும் கடனுக்கான வட்டி விகிதமும் குறையும்.