மனித உரிமைகள் மீறப்படுவதாகக் குறுகிய கண்ணோட்டத்துடன் கூறுவதன் வாயிலாக நாட்டின் மதிப்பை சீா்குலைக்க சிலா் முயற்சிப்பதாக பிரதமா் நரேந்திர மோடி குற்றஞ்சாட்டியுள்ளாா்.
தேசிய மனித உரிமைகள் ஆணையம் நிறுவப்பட்டதன் 28-ஆவது ஆண்டு விழா தில்லியில் செவ்வாய்க்கிழமை நடைபெற்றது. அதில் பிரதமா் மோடி பேசியதாவது:
ஒரே மாதிரியான நிகழ்வுகளை சிலா் வெவ்வேறு கண்ணோட்டத்தில் அணுகுகின்றனா். ஒரு நிகழ்வில் மனித உரிமைகள் மீறப்படுவதாகக் கூறும் அவா்கள், அதே மாதிரியான மற்றொரு நிகழ்வு குறித்து எதுவும் தெரிவிப்பதில்லை. அத்தகையோரால் மனித உரிமைகளுக்கே மிகப் பெரிய பாதிப்பு ஏற்பட்டுள்ளது.
தங்களுக்கு சாதகமான வகையில் மனித உரிமைகளை அவா்கள் வரையறுத்துக் கொள்கின்றனா். மனித உரிமைகள் மீறப்படுவதாகக் கூறி சிலா் நாட்டின் மதிப்பை சீா்குலைக்கவும் முயற்சிக்கின்றனா். அரசியல் ஆதாயத்துக்காக அவா்கள் செயல்பட்டு வருகின்றனா். அத்தகையோரிடம் மக்கள் கவனமாய் நடந்து கொள்ள வேண்டும்.
அரசியல் ஆதாயம் பெறும் நோக்கில் மனித உரிமைகள் விவகாரத்தை அணுகுவது, மனித உரிமைகளை மட்டுமல்லாமல் ஜனநாயகத்தையும் பாதிக்கிறது. மக்களுக்குப் பல்வேறு உரிமைகள் வழங்கப்பட்டுள்ள அதே வேளையில், அவா்களுக்கான கடமைகளையும் மனதில் கொள்ள வேண்டும்.
கரோனா காலத்திலும் ஏழைகளுக்கு உணவு தானியங்களை மத்திய அரசு இலவசமாக வழங்கியுள்ளது. முதியோா் உள்ளிட்டோருக்கு நிதியுதவி வழங்கப்பட்டுள்ளது. கரோனா தொற்றுக்கு எதிராகப் போராடும் அதே வேளையில், மக்களின் உரிமைகள் காக்கப்படுவதையும் மத்திய அரசு உறுதி செய்துள்ளது.
உரிமைகளுக்கான விழிப்புணா்வு: விவசாயிகளுக்கான நிதியுதவித் திட்டம், பயிா்க் காப்பீட்டுத் திட்டம் உள்ளிட்டவை திறம்படச் செயல்படுத்தப்பட்டன. கரோனா காலத்திலும் கூட உணவு தானியங்களின் உற்பத்தி வரலாறு காணாத வகையில் அதிகரித்தது. மத்திய அரசின் நடவடிக்கைகள் காரணமாக விவசாயிகள் மற்ற நபா்களிடம் இருந்து கடன் பெறுவது குறைந்துள்ளது.
அனைத்து வீடுகளிலும் கழிவறைகள் இருப்பதை மத்திய அரசு உறுதி செய்துள்ளது. குடும்பங்களுக்கு சமையல் எரிவாயு சிலிண்டா் இணைப்பு, மின்சார இணைப்பு ஆகியவை வழங்கப்பட்டுள்ளன. வீடில்லாத ஏழைகளுக்கு வீடு கட்டித் தரப்பட்டுள்ளது. இவை மக்களின் நம்பிக்கைகளை அதிகரித்து, மனித உரிமைகள் தொடா்பான விழிப்புணா்வையும் மேம்படுத்தியுள்ளன.
மனித உரிமைகளின் அடையாளம்: முத்தலாக் நடைமுறைக்கு எதிரான சட்டத்தை இயற்றி முஸ்லிம் பெண்களுக்கான உரிமையை மத்திய அரசு மீட்டுள்ளது. பணியில் உள்ள பெண்களுக்கு 26 வாரம் மகப்பேறு விடுமுறை கிடைப்பது உறுதி செய்யப்பட்டுள்ளது. பெண்களுக்கு எதிராகப் பாலியல் வன்கொடுமையில் ஈடுபடும் நபா்களுக்கான தண்டனைகள் கடுமையாக்கப்பட்டுள்ளன.
மூன்றாம் பாலினத்தவருக்கான உரிமைகளும் உறுதி செய்யப்பட்டுள்ளன. நாட்டுக்கான சுதந்திரப் போராட்டமும் வரலாறும் மனித உரிமைகளுக்கு அதிக அளவில் ஊக்கமளித்து வருகின்றன. உரிமைகளைப் பெறுவதற்கான வன்முறையற்ற போராட்டத்தை காந்தியடிகள் உலகத்துக்குக் கற்பித்தாா். மனித உரிமைகளுக்கான அடையாளமாக அவா் திகழ்கிறாா் என்றாா் பிரதமா் மோடி.
ஆணையத்துக்குப் பாராட்டு: நிகழ்ச்சியில் பேசிய மத்திய உள்துறை அமைச்சா் அமித் ஷா, ‘‘மக்களிடையே மனித உரிமைகள் தொடா்பான விழிப்புணா்வை ஏற்படுத்துவதில் ஆணையம் முக்கியப் பங்கு வகித்து வருகிறது. இதுவரை மனித உரிமைகள் சாா்ந்த 20 லட்சத்துக்கும் அதிகமான பிரச்னைகளுக்கு ஆணையம் தீா்வு கண்டுள்ளது. பாதிக்கப்பட்டவா்களுக்கு சுமாா் ரூ.205 கோடி இழப்பீடும் ஆணையத்தின் மூலம் கிடைத்துள்ளது.
ஏழைகள், விளிம்புநிலையில் உள்ள மக்களுக்கான நலத்திட்டங்களை மத்திய அரசு செயல்படுத்தி வருகிறது. நாட்டில் உள்ள 2 கோடி வீடுகளுக்கு நேரடியாகக் குழாய் மூலம் குடிநீா் வழங்கும் திட்டத்தை மத்திய அரசு திறம்படச் செயல்படுத்தி வருகிறது. அதன் வாயிலாக அவா்களது அடிப்படை உரிமை பாதுகாக்கப்படவுள்ளது’’ என்றாா்.
ஆணையத்தின் செயல்பாடுகள்: மனித உரிமைகள் பாதுகாப்புச் சட்டமானது கடந்த 1993-ஆம் ஆண்டு இயற்றப்பட்டது. அச்சட்டத்தின் அடிப்படையில் அதே ஆண்டு அக்டோபா் 12-ஆம் தேதி தேசிய மனித உரிமைகள் ஆணையம் நிறுவப்பட்டது. மனித உரிமைகளைக் காப்பதற்கான தளமாக அந்த ஆணையம் செயல்பட்டு வருகிறது.
நாட்டில் மனித உரிமைகள் மீறப்படுவது தொடா்பான விவகாரங்களை விசாரிப்பது, மனித உரிமைகள் மீறலால் பாதிக்கப்பட்டவா்களுக்கு இழப்பீடு வழங்குமாறு அரசுகளுக்குப் பரிந்துரைப்பது, மனித உரிமை மீறலில் ஈடுபடும் அரசு அதிகாரிகள் மீது நடவடிக்கை மேற்கொள்ளப் பரிந்துரைப்பது உள்ளிட்ட பணிகளை ஆணையம் மேற்கொண்டு வருகிறது.