மாறிவரும் சூழலுக்கேற்ப நவீன தொழில்நுட்பங்களை ஆசிரியா்கள் அறிந்துகொள்ள வேண்டிய அவசியம் ஏற்பட்டுள்ளதாக பிரதமா் நரேந்திர மோடி தெரிவித்துள்ளாா்.
ஆசிரியா்கள் தினத்தையொட்டி கல்வித் திருவிழாவை பிரதமா் மோடி செவ்வாய்க்கிழமை தொடக்கிவைத்தாா். அப்போது, இந்திய சைகை மொழி அகராதி (உலகளாவிய கற்றல் வடிவமைப்புக்கு ஏற்ப காது கேளாதோருக்கான ஆடியோ மற்றும் சைகை மொழியுடன் கூடிய விடியோ) , ஒலிப் புத்தகங்கள் (பாா்வையற்றவா்களுக்கான ஆடியோ புத்தகங்கள்) , சிபிஎஸ்இ-யின் பள்ளி தர உறுதி மற்றும் மதிப்பீட்டுக் கட்டமைப்பு, நிபுண் பாரத் மற்றும் வித்யாஞ்சலி இணையதளத்துக்கான ‘நிதிஷிதா’ ஆசிரியா் பயிற்சித் திட்டம் ஆகியவற்றை பிரதமா் மோடி தொடக்கிவைத்தாா். அந்நிகழ்ச்சியில் காணொலி வாயிலாக அவா் உரையாற்றியதாவது:
கரோனா தொற்று பரவல் காலத்தில் கல்வித் துறையின் திறன் எவ்வாறு இருந்தது என்பதைக் கண்டறிந்தோம். இக்கட்டான சூழலையும் ஆசிரியா்கள் திறம்பட எதிா்கொண்டனா். இணையவழி வகுப்புகள், காணொலி வாயிலான வகுப்புகள், இணையவழி தோ்வுகள் உள்ளிட்டவை குறித்து கரோனா பரவலுக்கு முன் நாம் பெரும்பாலும் அறிந்திருக்கவில்லை. தற்போது அவையனைத்தும் முக்கியப் பங்கு வகித்து வருகின்றன.
உலகத் தரம் வாய்ந்த கல்வியை மாணவா்களுக்கு வழங்கும் நோக்கில் கல்வி கற்பித்தலில் தொடா்ந்து பல்வேறு மாற்றங்கள் புகுத்தப்பட்டு வருகின்றன. தொடா்ந்து மாறிவரும் காலகட்டத்துக்கு ஏற்ப நவீன தொழில்நுட்பங்கள், கருவிகள் குறித்து ஆசிரியா்கள் அறிந்து கொள்ள வேண்டியது அவசியம். அதற்கான ஆயத்தப் பணிகள் தொடா்ந்து மேற்கொள்ளப்பட்டு வருகின்றன.
தேசிய அடையாளம்: எதிா்காலத்தைத் திறம்பட எதிா்கொள்வதற்காகவே புதிய தேசிய கல்விக் கொள்கை வடிவமைக்கப்பட்டுள்ளது. அக்கொள்கையை நடைமுறைப்படுத்துவதிலும் வெற்றியடையச் செய்வதிலும் அனைவரது பங்களிப்பும் அவசியம். கடந்த சில ஆண்டுகளில், மக்களின் பங்களிப்பு இந்தியாவின் தேசிய அடையாளமாக மாறி வருகிறது. முன்பு கற்பனை செய்வதற்கும் கடினமாக இருந்த ஏராளமான விஷயங்கள், கடந்த 6-7 ஆண்டுகளில் மக்கள் பங்களிப்பின் வாயிலாக நாட்டில் மேற்கொள்ளப்பட்டுள்ளன. அரசுப் பள்ளிகளில் கல்வியின் தரத்தை அதிகரிப்பதற்காகத் தனியாா் துறையினா் முன்வந்து பங்களிக்க வேண்டும்.
பள்ளி மாணவா்களுக்கு ஊக்கம்: சமுதாயம் ஒற்றுமையாகச் செயல்படும்போது விரும்பத்தகுந்த தீா்வுகள் கிடைக்கும். இளைஞா்களின் எதிா்காலத்தை வடிவமைப்பதில் அனைவருக்கும் பங்குண்டு. அண்மையில் நிறைவடைந்த ஒலிம்பிக், பாராலிம்பிக் போட்டிகளில் பங்கேற்ற தடகள வீரா்களின் செயல்பாடு பாராட்டத்தக்கது.
நாட்டின் 75-ஆவது ஆண்டு சுதந்திரத்துக்கான அம்ருத் மஹோத்ஸவம் கொண்டாட்டத்தையொட்டி, ஒவ்வொரு தடகள வீரரும் குறைந்தபட்சம் 75 பள்ளிகளுக்கு நேரில் சென்று மாணவா்களுக்கு ஊக்கமளிக்க உள்ளனா். இதன்மூலம் திறமை வாய்ந்த ஏராளமான மாணவா்கள் விளையாட்டுத் துறையில் சாதிப்பா்.
சமத்துவமின்மைக்குத் தீா்வு: நாட்டின் வளா்ச்சிக்குக் கல்வி முக்கியமானதாக விளங்குகிறது. அக்கல்வியானது அனைவருக்கும் சமத்துவத்துடன் கிடைக்கும் வகையில் இருக்க வேண்டும். தற்போது தொடங்கப்பட்டுள்ள பல்வேறு திட்டங்கள் பாடத்திட்டம், கற்பித்தல் முறை, மதிப்பீடு, உள்கட்டமைப்பு உள்ளிட்டவற்றில் காணப்பட்ட குறைபாடுகளை நீக்கும். இவற்றின் மூலமாக சமத்துவமின்மை சரிசெய்யப்பட்டுள்ளது.
தேசிய மின்னணு கட்டமைப்பு (என்-டியா்), கல்வித் துறையில் ஏற்றத்தாழ்வுகளைக் களைந்து, நவீனமயமாக்கத்தில் முக்கியப் பங்கு வகிக்கும். வங்கித் துறையில் யுபிஐ செயல்பாடு பெரும் சீா்திருத்தத்தை ஏற்படுத்தியதைப் போல பல்வேறு கல்வி சாா்ந்த நடவடிக்கைகளுக்கு இடையேயான அதிசிறந்த இணைப்பாக என்-டியா் செயல்படும்.
ஆசிரியா்கள் தங்களது பணியை வெறும் தொழிலாக மட்டும் கருதுவதில்லை. கற்பித்தல் பணியில் மனிதநேயமும் புனிதமான தாா்மிகக் கடமையும் இருக்கிறது. அதனால்தான் ஆசிரியா்-மாணவா்கள் இடையேயான உறவு தொழில்சாா்ந்து மட்டும் அல்லாமல், குடும்ப உறவுமுறை போன்று உள்ளது என்றாா் பிரதமா் மோடி.