முதுநிலை மருத்துவ படிப்புகளுக்கு நீட் தோ்வு: கடும் கட்டுப்பாடுகளுடன் நாடு முழுவதும் நடைபெற்றது

நாடு முழுவதும் கடுமையான கட்டுப்பாடுகளுடன் முதுநிலை மருத்துவப் படிப்புகளுக்கான நீட் தோ்வு சனிக்கிழமை நடைபெற்றது.

இந்தியா முழுவதும் அரசு மற்றும் தனியாா் மருத்துவக் கல்லூரிகள் மற்றும் நிகா்நிலைப் பல்கலைக்கழகங்களில் மருத்துவப் பட்டமேற்படிப்புகளான எம்டி, எம்எஸ் மற்றும் டிப்ளமோ படிப்புகளுக்கு தமிழகத்தில் சுமாா் 4 ஆயிரம் இடங்கள் உள்பட 30 ஆயிரத்துக்கும் மேற்பட்ட இடங்கள் உள்ளன. இந்த இடங்கள் நீட் தோ்வில் தகுதி பெறுவா்களைக் கொண்டு நிரப்பப்படுகிறது. 2021-22-ஆம் கல்வி ஆண்டு மாணவா் சோ்க்கைக்கான நீட் தோ்வு ஏப்ரல் 18-ம் தேதி நடைபெறும் என தேசிய தோ்வுகள் வாரியம் (என்டிஏ) அறிவித்திருந்தது. ஆனால், கரோனா பரவல் காரணமாக ஒத்திவைக்கப்பட்டது. இதையடுத்து, கரோனா தொற்று பாதிப்பு குறைந்ததால், ஒத்திவைக்கப்பட்ட தோ்வு செப். 11-ஆம் தேதி நடைபெறுவதாக அறிவிக்கப்பட்டது.

அதன்படி, தமிழகத்தில் சென்னை, கோவை, மதுரை, நெல்லை, சேலம், திருச்சி உள்பட நாடுமுழுவதும் 260 நகரங்களில் 800 மையங்களில் சனிக்கிழமை காலை 9 மணி முதல் பிற்பகல் 12.30 மணி வரை இணையவழியில் மூலம் நீட் தோ்வு நடைபெற்றது. தமிழகத்தில் மட்டும் எம்பிபிஎஸ் முடித்த சுமாா் 20,000 போ் உள்பட இந்தியா முழுவதும் 1.74 லட்சத்துக்கும் மேற்பட்டோா் நீட் தோ்வில் பங்கேற்றனா். செல்லிடப்பேசி, புளூடூத், பேனா, கைப்பை உள்ளிட்ட எதையும் எடுத்து வரக்கூடாது. காதணி, கடிகாரம், பிரேஸ்லெட், பெல்ட் போன்றவற்றை அணிந்து வரக்கூடாது என்ற கடுமையான கட்டுப்பாடுகள் விதிக்கப்பட்டிருந்ததால் மாணவா்கள் தீவிர சோதனைக்கு பின்னரே மையங்களுக்குள் அனுமதிக்கப்பட்டனா்.

முகக்கவசம், தனிமனித இடைவெளி, கிருமி நாசினி கொண்டு கைகளை சுத்தப்படுத்துதல் போன்ற கரோனா வழிக்காட்டு நெறிமுகளை பின்பற்றி தோ்வு நடைபெற்றது. நீட் தோ்வில் சரியான விடையை தோ்ந்தெடுக்கும் விதத்தில் மொத்தம் 200 கேள்விகள் கேட்கப்பட்டன. ஒரு கேள்விக்கு 4 மதிப்பெண் என மொத்தம் 800 மதிப்பெண்கள் வழங்கப்படுகிறது. தவறான பதிலுக்கு 1 மதிப்பெண் (நெகட்டிவ்) குறைக்கப்படும் என தெரிவிக்கப்பபட்டுள்ளது. நீட் தோ்வு முடிவுகளை அக்டோபா் முதல் வாரத்தில் இணைதளங்களில் வெளியிட என்டிஏ திட்டமிட்டுள்ளது.