இந்தியா முழுவதும் மக்களுக்கு எண்ம வடிவிலான சுகாதார அட்டையை வழங்கும் திட்டத்தை (ஆயுஷ்மான் பாரத் டிஜிட்டல் மிஷன்) பிரதமா் நரேந்திர மோடி திங்கள்கிழமை (செப்.27) தொடக்கி வைத்தாா்.
உடல் நலத் தகவல்களை...: மக்களின் உடல்நலன் சாா்ந்த விவரங்களை எண்ம வடிவாக்கும் நோக்கில் ஆயுஷ்மான் பாரத் எண்ம திட்டம் தொடங்கப்பட்டுள்ளது. இந்தத் திட்டம் சுகாதாரத் துறையில் புரட்சிகர மாற்றங்களை ஏற்படுத்தும் என்று பிரதமா் மோடி தெரிவித்தாா்.
நாடு முழுவதும்...: மேலே குறிப்பிட்ட ஆயுஷ்மான் பாரத் எண்ம திட்டத்தை பிரதமா் மோடி கடந்த ஆண்டு சுதந்திர தின உரையின்போது அறிவித்தாா். இந்தத் திட்டம் 6 யூனியன் பிரதேசங்களில் சோதனை அடிப்படையில் அமல்படுத்தப்பட்டது. அத்திட்டத்தை நாடு முழுவதும் தொடக்கி வைப்பதற்கான நிகழ்ச்சி தில்லியில் திங்கள்கிழமை நடைபெற்றது.
ஆயுஷ்மான் பாரத் எண்ம திட்டத்தை பிரதமா் மோடி தொடக்கி வைத்துப் பேசியதாவது:- நாட்டில் சுகாதார வசதிகள் அனைத்து மக்களுக்கும் சென்றடைய வேண்டும் என்ற நோக்கிலான நடவடிக்கைகளை மத்திய அரசு கடந்த 7 ஆண்டுகளாக மேற்கொண்டு வருகிறது. ஆயுஷ்மான் பாரத் எண்ம திட்டம் அந்த நடவடிக்கைகளை மேலும் வலுப்படுத்தும்.
சிகிச்சை விவரங்கள் பதிவு செய்யப்படும்: ஆயுஷ்மான் பாரத் எண்ம திட்டத்தின் கீழ் நாட்டு மக்களுக்கு எண்ம வடிவிலான சுகாதார அடையாள அட்டை வழங்கப்படும். உடல்நலன் சாா்ந்து மக்கள் எடுத்துக் கொள்ளும் சிகிச்சைகளின் விவரங்கள் அந்த அட்டையின் வாயிலாகப் பதிவு செய்யப்பட்டு தரவுகள் பாதுகாக்கப்படும்.
சிகிச்சை முறைகளை மேம்படுத்த...: உறுதியான தரவுகளை அளித்து மக்களுக்கான சிகிச்சை முறைகளை மேம்படுத்தவும், மக்களின் உயிரைக் காப்பதற்கும் இந்தத் திட்டம் பெரிதும் உதவும். தற்போதைய காலகட்டத்தில் தொழில்நுட்பம் மக்களுக்குப் பெரிதும் பலனளித்து வருகிறது.
சுகாதார சேவை விவரங்கள்: ஆயுஷ்மான் பாரத் எண்ம திட்ட செயலியின் மூலம் உடல்நலன் சாா்ந்த விவரங்களை மக்கள் எண்ம அடையாள அட்டையில் பதிவுசெய்து கொள்ளலாம். இத்திட்டத்தின் கீழ் சுகாதார சேவைகளை வழங்குவோா், மருத்துவ நிறுவனங்கள் உள்ளிட்டவற்றின் விவரங்களும் மக்களுக்குத் தெரியப்படுத்தப்படும்.
கரோனாவைக் கட்டுப்படுத்தியதில் செயலியின் பங்கு: நாட்டில் கரோனா தொற்று பரவலைக் கட்டுக்குள் கொண்டு வருவதில் ஆரோக்ய சேது செயலி முக்கியப் பங்கு வகித்தது. நாடு முழுவதும் சுமாா் 86 கோடி கரோனா தடுப்பூசி டோஸ்கள் செலுத்தப்பட்டுள்ளன. கோவின் இணையதளமும் செயலியும் இதில் முக்கியப் பங்கு வகித்தன.
தொழில்நுட்ப ரீதியில் ஒருங்கிணைப்பு: முன்னெப்போதும் இல்லாத அளவுக்குத் தொழில்நுட்ப வசதிகளை மத்திய அரசு பயன்படுத்தி வருகிறது. நாட்டில் உள்ள 130 கோடி போ் ஆதாா் அட்டையைப் பயன்படுத்தி வருகின்றனா். 118 கோடி போ் செல்லிடப்பேசியைப் பயன்படுத்தி வருகின்றனா். 43 கோடி போ் ஜன் தன் வங்கிக் கணக்குகளை வைத்துள்ளனா்.
இணையவழி சுகாதார சேவை: ஜன் தன்-ஆதாா்-செல்லிடப்பேசி ஆகியவற்றை ஒருங்கிணைத்து பல்வேறு திட்டங்களை மத்திய அரசு வெற்றிகரமாக நிறைவேற்றி வருகிறது. இதுபோன்ற ஒருங்கிணைப்பு உலகின் வேறெந்தப் பகுதியிலும் காணப்படவில்லை. ஆயுஷ்மான் பாரத் எண்ம திட்டமும் தடையற்ற இணையவழி சுகாதார சேவைகளை மக்களுக்கு வழங்கும். இத்திட்டத்தின் வாயிலாக மக்களிடம் இருந்து பெறப்படும் தரவுகளின் பாதுகாப்பு உறுதிசெய்யப்படும். அத்தரவுகளின் ரகசியத்தன்மையும் பாதுகாக்கப்படும். ஏழைகளுக்கும் நடுத்தர மக்களுக்கும் இத்திட்டம் பெரிதும் பலனளிக்கும்.
மருத்துவ சுற்றுலா மேம்படும்: மருத்துவத் துறையும் சுற்றுலாவும் ஒன்றுடன் ஒன்று தொடா்புடையவையாக உள்ளன. ஒருங்கிணைந்த சுகாதார வசதிகளை மேம்படுத்துவது மருத்துவ சுற்றுலாவுக்கான வாய்ப்புகளை அதிகரிக்கும். கோவா, ஹிமாசல பிரதேசம் ஆகிய மாநிலங்களில் தகுதியான நபா்கள் அனைவரும் முதல் தவணை கரோனா தடுப்பூசியை செலுத்திக் கொண்டுள்ளதால், சுற்றுலாப் பயணிகள் அந்த மாநிலங்களுக்குச் செல்வது அதிகரிக்கும்.
இலவச சிகிச்சை: நோய்த்தடுப்பு விவகாரங்களில் மத்திய அரசு அதிக கவனம் செலுத்தி வருகிறது. நோயால் பாதிக்கப்பட்டவா்களுக்கு மலிவான விலையில் சிகிச்சை கிடைப்பதும் உறுதி செய்யப்பட்டு வருகிறது. ஆயுஷ்மான் பாரத் மருத்துவக் காப்பீட்டுத் திட்டம் தொடங்கப்பட்டு 3 ஆண்டுகள் ஆகின்றன. அத்திட்டத்தின் கீழ் இதுவரை 2 கோடிக்கும் அதிகமானோா் மருத்துவமனைகளில் இலவசமாக சிகிச்சை பெற்றுள்ளனா். அவா்களில் பாதிக்கும் மேற்பட்டோா் பெண்கள் ஆவா். கிராமங்களில் ஆரம்ப சுகாதார மையங்கள் வலுப்படுத்தப்பட்டு வருகின்றன. 80,000-க்கும் அதிகமான சுகாதார மையங்கள் ஏற்கெனவே செயல்பாட்டில் உள்ளன.
மருத்துவக் கல்வியில் சீா்திருத்தம்: மருத்துவக் கல்வியில் மத்திய அரசு பல்வேறு சீா்திருத்தங்களை மேற்கொண்டு வருகிறது. மருத்துவா்கள், சுகாதாரப் பணியாளா்களின் எண்ணிக்கை அதிகரிக்கப்பட்டு வருகிறது. எய்ம்ஸ் உள்ளிட்ட நவீன மருத்துவ நிறுவனங்கள் நாடு முழுவதும் அமைக்கப்பட்டு வருகின்றன. 3 மக்களவைத் தொகுதிகளுக்கு ஒரு மருத்துவக் கல்லூரியை அமைப்பதற்கான பணிகள் மேற்கொள்ளப்பட்டு வருகின்றன என்றாா் பிரதமா் மோடி.