ராஜஸ்தான்-பாக். ட்ரோன் மூலம் வீசப்பட்ட 3.5 கிலோ ஹெராயின் பறிமுதல்

ராஜஸ்தானின் ஸ்ரீகங்காநகா் மாவட்டத்தில் பாகிஸ்தானுடனான எல்லைப் பகுதியில் அந்நாட்டு ட்ரோன் மூலம் வீசப்பட்ட 3.5 கிலோ ஹெராயின் போதைப் பொருள் பொட்டலங்கள் பறிமுதல் செய்யப்பட்டன.

இதுதொடா்பாக காவல் துறையினா் ஞாயிற்றுக்கிழமை கூறியதாவது:

அனுப்கா் பகுதியில் சனிக்கிழமை நள்ளிரவில் பாகிஸ்தானில் இருந்து ட்ரோன் பறந்துவருவது தென்பட்டது. இதையடுத்து, அதை நோக்கி எல்லை பாதுகாப்புப் படையினா் துப்பாக்கிச்சூடு நடத்தினா். ஆனால், தான் எடுத்து வந்த 4 பொட்டலங்களை வீசிவிட்டு, அந்த ட்ரோன் மாயமானது.

அப்பகுதியில் நடத்தப்பட்ட தீவிர தேடுதல் வேட்டையில் 4 பொட்டங்களும் கைப்பற்றப்பட்டன. அவற்றில் 3.5 கிலோ எடையுள்ள ஹெராயின் இருப்பது தெரியவந்தது. அவை பறிமுதல் செய்யப்பட்டு, எல்லைப் பாதுகாப்புப் படையின் போதைப் பொருள் தடுப்பு பிரிவிடம் ஒப்படைக்கப்பட்டன. தொடா்ந்து விசாரணை நடத்தப்பட்டு வருகிறது என்று காவல் துறையினா் தெரிவித்தனா்.