வடகிழக்கு பிராந்தியத்தில் போக்குவரத்து தொடா்புகளை வலுப்படுத்தும் வகையில், திரிபுராவில் 2 விரைவு ரயில்கள் சேவையை குடியரசுத் தலைவா் திரெளபதி முா்மு வியாழக்கிழமை கொடியசைத்து தொடக்கிவைத்தாா்.
அதன்படி, அகா்தலா-கோங்சாங் இடையிலான ஜன்சதாப்தி விரைவு ரயில் மற்றும் அகா்தலா-கொல்கத்தா விரைவு ரயில் சேவைகள் தொடங்கப்பட்டுள்ளன.
அகா்தலா ரயில் நிலையத்தில் நடைபெற்ற இந்நிகழ்ச்சியில் குடியரசுத் தலைவா் திரெளபதி முா்மு, மாநில முதல்வா் மாணிக் சாஹா, மத்திய அமைச்சா் பிரதிமா பெளமிக், மாநில போக்குவரத்து அமைச்சா் பிரனஜித் சிங்கா ராய் உள்ளிட்டோா் பங்கேற்றனா்.
திரிபுரா தலைநகா் அகா்தலா மற்றும் மணிப்பூரின் கோங்சாங் இடையிலான 600 கி.மீ. தொலைவை ஜன்சதாப்தி ரயில் 6 மணி நேரத்தில் அடையும். சாலை மாா்க்கமாக சென்றால், அகா்தலாவில் இருந்து கோங்சாங்குக்கு 15 மணி நேரமாகும்.
மற்றொரு விரைவு ரயில், கொல்கத்தாவில் இருந்து அஸ்ஸாம் மாநிலம் குவாஹாட்டி வரை இயக்கப்பட்டு வந்தது. இப்போது அகா்தலா வரை அதன் சேவை நீட்டிக்கப்பட்டுள்ளது.
திரிபுராவுக்கு புதன்கிழமை வருகை தந்த திரெளபதி முா்மு, உதய்பூரில் உள்ள சக்தி பீட தலமான திரிபுரேஸ்வரி கோயிலில் வியாழக்கிழமை வழிபட்டாா். பின்னா், அஸ்ஸாம் மாநிலம், குவாஹாட்டிக்கு அவா் புறப்பட்டுச் சென்றாா்.
குவாஹாட்டி ஐஐடி-க்கு வலியுறுத்தல்: குவாஹாட்டி ஐஐடி வளாகத்தில் பல்வேறு திட்டங்களை காணொலி முறையில் திரெளபதி முா்மு தொடக்கிவைத்தாா். பின்னா் பேசிய அவா், வடகிழக்கு பிராந்தியத்தில் இதர கல்வி நிறுவனங்களை மேம்படுத்தும் பணியை குவாஹாட்டி ஐஐடி முன்னெடுக்க வேண்டும் என்று வலியுறுத்தினாா்.