மூன்று நாகா தீவிரவாத அமைப்புகளுடன் செய்துகொண்டுள்ள சண்டை நிறுத்த ஒப்பந்தத்தை மத்திய அரசு மேலும் ஓராண்டுக்கு நீட்டித்துள்ளது.
இது தொடர்பாக மத்திய உள்துறை அமைச்சகம் வெளியிட்ட அறிக்கையில் இந்த ஒப்பந்தங்கள் நாகாலாந்து தேசிய சோஷலிஸ்ட் கவுன்சில்-என்கே (என்எஸ்சிஎன்-என்கே), நாகாலாந்து தேசிய சோஷலிஸ்ட் கவுன்சில்-சீர்திருத்தம் (என்எஸ்சிஎன்-ஆர்), நாகாலாந்து தேசிய சோஷலிஸ்ட் கவுன்சில் கே-காங்கோ (என்எஸ்சிஎன் கே-காங்கோ) ஆகிய அமைப்புகளுடன் செய்து கொள்ளப்பட்டவை என்று தெரிவித்துள்ளது.
என்எஸ்சிஎன்-என்கே, என்எஸ்சிசிஎன்-ஆர் அமைப்புகளுடன் 2022, ஏப்ரல் 28 முதல் 2023, ஏப்ரல் 27 வரையும், என்எஸ்சிஎன் கே-காங்கோ அமைப்புடன் 2022, ஏப்ரல் 18 முதல் 2023, ஏப்ரல் 17 வரையும் சண்டை நிறுத்த ஒப்பந்தத்தை ஓராண்டுக்கு நீட்டிக்க முடிவு செய்யப்பட்டுள்ளது என்று அந்த அறிக்கையில் தெரிவிக்கப்பட்டுள்ளது. இந்த ஒப்பந்தங்கள் கடந்த செவ்வாய்க்கிழமை கையொப்பமாகின.
கடந்த 2021, செப்டம்பர் 8-ஆம் தேதி, தீவிரவாதி நிகி சுமி தலைமையிலான நாகா தீவிரவாத அமைப்புடன் மத்திய அரசு சண்டை நிறுத்த ஒப்பந்தத்தில் கையொப்பமிட்டது.
இந்த அமைப்புகள் அனைத்தும் என்எஸ்சிஎன்-ஐஎம் மற்றும் என்எஸ்சிஎன்-கே ஆகிய பெரிய அமைப்புகளில் இருந்து பிரிந்து வந்தவையாகும்.
முக்கியமான நாகா தீவிரவாத அமைப்பான என்எஸ்சிஎன்-ஐஎம்முடன் பிரதமர் நரேந்திர மோடி முன்னிலையில் மத்திய அரசு ஒப்பந்தத்தில் கையொப்பமிட்டது.
கடந்த 18 ஆண்டுகளில் 80 சுற்றுகளாக நடத்தப்பட்ட பேச்சுவார்த்தையின் பயனாக இந்த உடன்பாடு எட்டப்பட்டது.
முதல் முறையாக 1997-இல் சண்டை நிறுத்த ஒப்பந்தம் கையொப்பமிடப்பட்டது.
முன்னதாக, இந்தியாவுக்கு 1947-இல் சுதந்திரம் கிடைத்தவுடன் நாகாலாந்தில் தீவிரவாதம் தொடங்கியது. எனினும், என்எஸ்சிஎன்-ஐஎம் தீவிரவாத அமைப்புடனான மத்திய அரசின் பேச்சுவார்த்தையில் உடன்பாடு ஏதும் ஏற்படவில்லை.
நாகாலாந்து மாநிலத்துக்கு தனிக் கொடியும் தனி அரசியல் சாசனமும் உருவாக்கப்பட வேண்டும் என்று அந்த அமைப்பு கோருவதே இதற்குக் காரணம். இந்தக் கோரிக்கையை ஏற்க மத்திய அரசு மறுத்துவிட்டது.