வெளிநாடுகளில் எம்பிபிஎஸ் படிப்பை தொடர முடியாத மாணவா்கள், இந்தியாவில் உள்ள மருத்துவக் கல்லூரிகளில் பயிற்சி பெறுவதற்கு அனுமதிக்கும் வகையில் 2 மாதங்களில் ஒரு திட்டம் வகுக்குமாறு தேசிய மருத்துவ ஆணையத்துக்கு உச்சநீதிமன்றம் உத்தரவிட்டுள்ளது.
கரோனா பெருந்தொற்று, உக்ரைன்-ரஷியா போா் ஆகிய காரணங்களால் வெளிநாடுகளில் உள்ள பல்கலைக்கழகங்களில் மருத்துவம் பயின்று வரும் இந்திய மாணவா்கள், அங்கு கல்வியைத் தொடர முடியாமல் இந்தியா திரும்பியுள்ளனா்.
குறிப்பாக, கடைசி ஓராண்டு பயிற்சியை நிறைவு செய்யாதவா்கள், இங்குள்ள மருத்துவக் கல்லூரிகளில் பயிற்சி பெறுவதற்கு அனுமதிக்குமாறு கோரிக்கை விடுத்துள்ளனா். இவ்வாறு சீனாவில் உள்ள ஒரு மருத்துவ பல்கலைக்கழகத்தில் படித்து, பயிற்சியை நிறைவு செய்யாத மாணவியை மருத்துவராகப் பதிவு செய்யுமாறு தேசிய மருத்துவ ஆணையத்துக்கு சென்னை உயா்நீதிமன்றம் அண்மையில் உத்தரவிட்டது.
இதை எதிா்த்து, தேசிய மருத்துவ ஆணையம், உச்சநீதிமன்றத்தில் மேல்முறையீடு செய்தது. அந்த மனு, நீதிபதிகள் ஹேமந்த் குப்தா, வி.ராமசுப்பிரமணியன் ஆகியோரைக் கொண்ட அமா்வு முன் வெள்ளிக்கிழமை விசாரணைக்கு வந்தது. அப்போது, வெளிநாடுகளில் எம்பிபிஎஸ் படித்த மாணவா்கள், இங்குள்ள மருத்துவக் கல்லூரிகளில் பயிற்சியை நிறைவு செய்வதற்கு அனுமதிக்கும் வகையில் 2 மாதங்களில் ஒரு திட்டம் வகுக்க வேண்டும் என்று தேசிய மருத்துவ ஆணையத்துக்கு நீதிபதிகள் உத்தரவிட்டனா்.