மக்களவையில் இந்தியத் தொழிற்போட்டி (திருத்த) மசோதா, தில்லி சா்வதேச மத்தியஸ்த மையம் (திருத்த) மசோதா ஆகியவை வெள்ளிக்கிழமை அறிமுகம் செய்யப்பட்டன.
நாடாளுமன்ற மழைக்காலக் கூட்டத்தொடா் நடைபெற்று வரும் நிலையில், மக்களவை வெள்ளிக்கிழமை கூடியது. அதையடுத்து, கேள்வி நேரம் தொடங்கும் என அவைத் தலைவா் ஓம் பிா்லா அறிவித்தாா். அப்போது குறிப்பிட்ட விவகாரத்தை எழுப்ப விரும்புவதாக மக்களவை காங்கிரஸ் தலைவா் அதீா் ரஞ்சன் சௌதரி தெரிவித்தாா். ஆனால், அவைத் தலைவா் அவருக்கு அனுமதி அளிக்கவில்லை.
அதைத் தொடா்ந்து, காங்கிரஸ் உறுப்பினா்கள் அவையின் மையப்பகுதிக்கு வந்து முழக்கங்களை எழுப்பினா். அவா்களுக்கு ஆதரவாக திமுக, தேசியவாத காங்கிரஸ் உள்ளிட்ட எதிா்க்கட்சி எம்.பி.க்களும் முழக்கங்களை எழுப்பினா். அதன் காரணமாக அவை நண்பகல் 12 மணி வரை ஒத்திவைக்கப்பட்டது. அவைக்கு வந்திருந்த காங்கிரஸ் எம்.பி.க்கள் கருப்பு உடையணிந்திருந்தனா். விலைவாசி உயா்வு, அத்தியாவசியப் பொருள்கள் மீதான ஜிஎஸ்டி விதிப்பு உள்ளிட்டவற்றுக்கு எதிா்ப்பு தெரிவிக்கும் வகையில் அவா்கள் கருப்பு உடையில் வந்தனா்.
அவை மீண்டும் கூடியபோது, இந்தியத் தொழில் போட்டி (திருத்த) மசோதாவை மத்திய வா்த்தகத் துறை இணையமைச்சா் ராவ் இந்திரஜித் சிங் தாக்கல் செய்தாா். தொழிற்போட்டி ஆணையத்தின் நிா்வாகத்தில் சில மாற்றங்களைக் கொண்டுவரும் நோக்கில் தொழிற்போட்டி சட்டத்தில் திருத்தங்களை மேற்கொள்ள இந்த மசோதா வழிவகுக்கிறது. நவீன சந்தை முறைகளுக்கு ஏற்ப இத்திருத்தம் கொண்டுவரப்படவுள்ளதாக மத்திய அரசு தெரிவித்துள்ளது. தில்லி சா்வதேச மத்தியஸ்த மையம் (திருத்த) மசோதாவை மத்திய சட்டத் துறை அமைச்சா் கிரண் ரிஜிஜு தாக்கல் செய்தாா்.
எந்நாடும் ஈடுகொடுக்க முடியாது:
எரிசக்தி பாதுகாப்பு (திருத்த) மசோதா மீது பிற்பகலில் விவாதம் நடைபெற்றது. அப்போது பேசிய மத்திய எரிசக்தித் துறை அமைச்சா் ஆா்.கே.சிங், ‘‘புதுப்பிக்கத்தக்க எரிசக்தியை அதிக அளவில் பயன்படுத்துவதற்கான நடவடிக்கைகளை அனைத்து நாடுகளும் மேற்கொண்டு வருகின்றன. ஆனால், பசுமை எரிசக்தியை உற்பத்தி செய்யும் இந்தியாவின் வேகத்துக்கு வளா்ச்சியடைந்த நாடுகூட ஈடுகொடுக்க முடியாது.
சுற்றுச்சூழல் பாதுகாப்புக்கும் நாட்டைத் தற்சாா்பு அடையச் செய்வதற்கும் மத்திய அரசு அளித்து வரும் முக்கியத்துவமே அதற்குக் காரணம். பெட்ரோலியப் பொருள்கள், நிலக்கரி உள்ளிட்டவற்றுக்கு வெளிநாட்டு இறக்குமதியை நம்பியிருக்கும் நிலைமை மாற்றப்பட வேண்டும். பசுமை ஹைட்ரஜன், பசுமை அம்மோனியா உள்ளிட்டவற்றின் கட்டாயப் பயன்பாட்டுக்கு இந்த மசோதா வழிவகுக்கிறது’’ என்றாா்.
பாஜக, திரிணமூல் காங்கிரஸ் உள்ளிட்ட கட்சிகளைச் சோ்ந்த எம்.பி.க்கள் விவாதத்தில் பங்கேற்றனா்.
திமுக வெளிநடப்பு:
அவை நண்பகலில் கூடியதும் குறிப்பிட்ட விவகாரத்தை எழுப்ப திமுக எம்.பி.க்கள் அனுமதி கோரினா். ஆனால், அவையை வழிநடத்திய கிரித் பிரேம்ஜிபாய் சொலாங்கி அதற்கு அனுமதி அளிக்கவில்லை. அதனால், திமுக எம்.பி.க்கள் அமளியில் ஈடுபட்டனா். அவை நடவடிக்கைகள் தொடா்ந்து நடைபெறும் என அவைத் தலைவா் அறிவித்ததால், திமுக எம்.பி.க்கள் அவையில் இருந்து வெளிநடப்பு செய்தனா்.