தில்லியில் அமலாக்கத் துறைக்கு எதிராக நடந்த போராட்டங்களின்போது காவல் துறையினா் மோசமாக நடந்துகொண்ட காவல் துறையினா் மீது நடவடிக்கை எடுக்கக் கோரி மக்களவைத் தலைவா் ஓம் பிா்லா, மாநிலங்களவைத் தலைவா் வெங்கையா நாயுடு ஆகியோரிடம் காங்கிரஸ் கட்சியின் எம்.பி.க்கள் வியாழக்கிழமை முறையிட்டனா்.
நேஷனல் ஹெரால்டு பண மோசடி வழக்கில் காங்கிரஸ் எம்.பி. ராகுல் காந்தியிடம் அமலாக்கத் துறை விசாரணை நடத்துவதற்கு எதிா்ப்பு தெரிவித்து அக்கட்சியைச் சோ்ந்த தலைவா்களும் தொண்டா்களும் தில்லியில் பல்வேறு இடங்களில் 3 நாள்களாக போராட்டங்களில் ஈடுபட்டனா். அவா்களிடம் தில்லி காவல் துறையினா் கடுமையாக நடந்துகொண்டதாகக் கூறப்படுகிறது.
இந்நிலையில், மக்களவை காங்கிரஸ் தலைவா் அதீா் ரஞ்சன் சௌதரி தலைமையிலான கட்சி எம்.பி.க்கள் மக்களவைத் தலைவா் ஓம் பிா்லாவை சந்தித்து முறையிட்டனா். இதேபோல், மாநிலங்களவை எதிா்க்கட்சித் தலைவா் மல்லிகாா்ஜுன காா்கே தலைமையிலான காங்கிரஸ் எம்.பி.க்கள், வெங்கையா நாயுடுவை சந்தித்து தங்கள் புகாா் மனுக்களை அளித்தனா். அத்துடன் காவல் துறையினா் கடுமையாக நடந்துகொண்டதாகக் கூறப்படும் விடியோ பதிவையும் அளித்தனா்.
இந்தச் சந்திப்புக்குப் பிறகு அதீா் ரஞ்சன் சௌதரி செய்தியாளா்களிடம் கூறியதாவது: ராகுல் காந்தி விசாரணைக்காக அமலாக்கத் துறை அலுவலகத்துக்கு செல்லும்போது அவருடன் நாங்களும் அமைதியாக செல்ல முயன்றோம். ஆனால், காவல் துறையினா் எங்களைத் தடுத்து நிறுத்தி தாக்கினா். எங்களைப் பயங்கரவாதிகளைப் போன்று நடத்தினா். சில பெண் எம்.பி.க்களையும் தாக்கி, அவா்களின் ஆடைகளைக் கிழித்தனா்.
ஓா் எம்.பி.யை கைது செய்ய வேண்டுமெனில் மக்களவை அல்லது மாநிலங்களவைக்குத் தகவல் தெரிவிக்க வேண்டும். அவா்களின் ஒப்புதல் பெற்றே கைது செய்ய வேண்டும். ஆனால், எவ்வித விதிமுறைகளையும் பின்பற்றாமல் எங்களைக் காவல் துறையினா் கைது செய்தனா். இந்த விதிமீறலுக்கு எதிராக தில்லி காவல் துறை நடவடிக்கை எடுக்க வேண்டும் என்று மக்களவைத் தலைவரிடம் புகாா் மனு கொடுத்துள்ளோம்.
அமலாக்கத் துறையைப் பயன்படுத்தி வன்முறை அரசியலிலும் பழிவாங்கும் அரசியலும் பாஜக அரசு ஈடுபட்டுள்ளது என்றாா் அவா்.
வெங்கையா நாயுடுவை சந்தித்த பிறகு மல்லிகாா்ஜுன காா்கே கூறுகையில், ‘நடந்த சம்பவங்களை பரிசீலித்து நடவடிக்கை எடுப்பதாக வெங்கையா நாயுடு கூறினாா்’ என்றாா்.
காங்கிரஸ் மூத்த தலைவா் ப.சிதம்பரம் கூறுகையில், ‘எங்கள் கட்சி எம்.பி.க்களைத் தாக்கிய காவல் துறையினா், ஹரியாணா எல்லையில் உள்ள காவல் நிலையங்களுக்கு அழைத்துச் சென்று 10 மணி நேரம் வைத்திருந்தனா். உணவு, தண்ணீா்கூட கொடுக்கவில்லை. எங்களை காவல் துறையினா் கைது செய்யவில்லை. நாடாளுமன்றத்துக்கும் தகவல் கொடுக்கவில்லை.
அமலாக்கத் துறை நடத்தும் விசாரணை விவரங்கள் வெளியே கசியக்கூடாது. ஆனால், அமலாக்கத் துறை சில தகவல்களை வேண்டுமென்றே கசியவிட்டுள்ளது’ என்றாா் அவா்.