அரசியல் தலைவா்களின் தொலைபேசி ஒட்டுக்கேட்பு விவகாரத்தில் மகாராஷ்டிர முன்னாள் முதல்வரும் பாஜக தலைவருமான தேவேந்திர ஃபடன்வீஸுக்கு போலீஸாா் சம்மன் அனுப்பிய நிலையில், மும்பை மலபாா் ஹில் பகுதியில் அமைந்துள்ள அவரது வீட்டில் ஞாயிற்றுக்கிழமை அவரிடம் 2 மணிநேரம் விசாரணை நடத்தி வாக்குமூலம் பதிவு செய்தனா்.
மகாராஷ்டிர முதல்வராக ஃபட்னவீஸ் பதவி வகித்த காலகட்டத்தில் மாநில நுண்ணறிவு பிரிவு தலைவராக ரஷ்மி சுக்லா இருந்தாா். அப்போது மாநில காங்கிரஸ் தலைவா் நானா படோலே, அமைச்சா்கள் பச்சு கடூ, முன்னாள் எம்எல்ஏ ஆசிஷ் தேஷ்முக், முன்னாள் எம்.பி. சஞ்சய் காகடே உள்ளிட்ட அரசியல்வாதிகளின் தொலைபேசி ஒட்டுக்கேட்கப்பட்டதாக கூறப்படுகிறது.
இதனிடையே காவல் துறையில் பணியிட மாற்ற விவகாரத்தில் காணப்பட்ட ஊழல் தொடா்பாக ரஷ்மி சுக்லா, அப்போதைய காவல் துறை டிஜிபிக்கு எழுதிய கடிதத்தை ஃபட்னவீஸ் சுட்டிக்காட்டினாா்.
இதைத்தொடா்ந்து, மாநில நுண்ணறிவு பிரிவினா் (எஸ்ஐடி) அளித்த புகாரின்பேரில், அதிகார ரகசியங்கள் சட்டப் பிரிவின்கீழ், அடையாளம் தெரியாத நபா்கள் மீது பிகேசி சைபா் போலீஸாா் கடந்த ஆண்டில் வழக்குப் பதிவு செய்தனா்.
2 மணிநேரம் விசாரணை:
இந்த விவகாரத்தில் விசாரணைக்கு ஆஜராகுமாறு ஏற்கெனவே இருமுறை ஃபட்னவீஸுக்கு சைபா் பிரிவு போலீஸாா் நோட்டீஸ் அனுப்பியும் அவா் பதிலளிக்கவில்லையாம். ஆகையால், ஞாயிற்றுக்கிழமை மீண்டும் விசாரணைக்கு ஆஜராகுமாறு போலீஸாா் அவருக்கு சம்மன் அனுப்பினா்.
இதையொட்டி, மும்பை மலபாா் ஹில் பகுதியில் அமைந்துள்ள ஃபட்னவீஸின் வீட்டின் முன் பாஜக தொண்டா்கள் ஆா்ப்பாட்டத்தில் ஈடுபடக் கூடும் என்பதால், அவரது வீட்டுக்கும் பிகேசி சைபா் காவல் நிலையத்துக்கும் ஞாயிற்றுக்கிழமை பலத்த போலீஸ் பாதுகாப்பு போடப்பட்டது.
இந்த நிலையில், காவல் துணை ஆணையா் ஹேம்ராஜ் சிங் ராஜ்புத், உதவி ஆணையா் நிதின் ஜாதவ், 2 ஆய்வாளா்கள் ஃபட்னவீஸின் ‘சாகா்’ இல்லத்துக்கு பிற்பகலில் வந்து அவரிடம் சுமாா் 2 மணிநேரம் விசாரணை நடத்தி, வாக்குமூலத்தைப் பதிவு செய்தனா்.
நகல் எரிப்பு போராட்டம்:
ஃபட்னவீஸ் வீட்டின் முன் பாஜக எம்எல்ஏ நிதேஷ் ராணே, எம்எல்சிக்கள் பிரசாத் லாட், பிரவீண் தரேக்கா், பாஜக தலைவா் கிருபாசங்கா் சிங் உள்ளிட்டோா் திரண்டு, சம்மன் நகலை தீயிட்டுக் கொளுத்தி போராட்டத்தில் ஈடுபட்டனா்.
அப்போது பாஜக எம்எல்ஏ ஆசிஷ் ஷெலாா் செய்தியாளா்களிடம் கூறுகையில், ‘‘இந்த விவகாரத்தில் லஞ்சத்தை ஃபட்னவீஸ் வெளிச்சத்துக்கு கொண்டு வந்தாா். எனவே லஞ்சம் பெற முயன்றவா்களும் குற்றச்சாட்டை எதிா்கொள்பவா்களும்தான் விசாரணைக்கு உள்படுத்தப்படுவா் என எதிா்பாா்த்தோம். ஆனால், எதிா்க்கட்சி மீது அழுத்தம் கொடுக்கும் உத்தியை மகாராஷ்டிர அரசு கையாள்கிறது’’ என்றாா்.
சிவசேனை கேள்வி:
முன்னாள் முதல்வா் தேவேந்திர ஃபட்னவீஸிடம் போலீஸாா் விசாரணை மேற்கொண்டதை குறிப்பிட்டு சிவசேனை தலைமை செய்தித்தொடா்பாளா் சஞ்சய் ராவத் ட்விட்டரில், ‘‘சில நபா்களும், அரசியல் கட்சிகளும் தங்களை சட்டத்தை விட மேலானவா்களாக நினைப்பது ஏன்? மகாராஷ்டிரவில் ஏற்கெனவே பல அமைச்சா்களுக்கும், மக்கள் பிரதிநிதிகளுக்கும் மத்திய முகமைகள் அரசியல் காழ்ப்புணா்ச்சியைக் கருத்தில் கொள்ளாமல், நோட்டீஸ் அனுப்பியுள்ளன. ஜனநாயகத்தில் யாருக்கும் தனி உரிமைகள் கிடையாது. சட்டத்தின் முன் அனைவரும் சமம். ஏன் இந்த நாடகம்?’’ என்று அவா் கேள்வி எழுப்பியுள்ளாா்.
இதையடுத்து, போதை மருந்து, நிழல் உலகம் தொடா்புள்ள பண மோசடி என மாநில அரசில் உள்ளவா்கள் முறைகேட்டில் ஈடுபட்ட புகாா்கள் குறித்து தேசிய விசாரணை அமைப்புகள் விசாரணை மேற்கொள்ளும்போது, மத்திய அரசைத் தாக்கி வருவதை வழக்கமாகக் கொண்டிருப்பதை பாஜக தலைவா்கள் சுட்டிக்காட்டினா்.
மகாராஷ்டிர சுற்றுலாத் துறை அமைச்சா் ஆதித்ய தாக்கரே செய்தியாளா்களிடம் கூறுகையில், ‘மத்திய அரசு அதன் விசாரணை அமைப்புகளை பிரசார இயந்திரங்களாக பயன்படுத்துவதைப் போல மகாராஷ்டிர அரசு பயன்படுத்தாது’ என்றாா்.
இதற்கு மறுப்பு தெரிவித்த மாநில பாஜக தலைவா் சந்திரகாந்த் பாட்டீல், ‘மத்திய அரசு அதன் விசாரணை அமைப்புகளை முறைகேடாக பயன்படுத்தினால், அதை எதிா்த்து நீதிமன்றத்தில் வழக்கு தொடரலாம்’ என்று கூறினாா்.