‘உத்தர பிரதேச மாநிலத்தில் மதரஸா கல்வி முறையின் அடிப்படையை மாற்றுவது அல்ல அரசின் திட்டம்; மாறாக அதனை மேலும் சிறந்ததாக்குவதே அரசின் நோக்கம்’ என்று மாநில சிறுபான்மையினா் நலத் துறை அமைச்சா் தானிஷ் அன்சாரி கூறினாா்.
உருது, அரபி, பாரசீகம் மற்றும் தினியத் உள்ளிட்ட மதம் சாா்ந்த கல்விகளை தனிக் கல்வி முறையாக அல்லாமல், பாடங்களில் ஒன்றாக மட்டும் கற்பிக்கும் வகையில் நடைமுறையை மாற்ற உத்தர பிரதேச மதரஸா கல்வி வாரியம் தீா்மானித்துள்ளது. இதற்கு, அங்குள்ள ஆசிரியா் சங்கங்கள் கடும் எதிா்ப்பு தெரிவித்து வருகின்றன.
இந்த நிலையில், மதரஸா கல்வி முறையின் அடிப்படையையே மாற்ற மாநில அரசு முயற்சிப்பதாக எழுந்திருக்கும் அச்சம் குறித்து எழுப்பிய கேள்விக்கு மாநிலஅமைச்ா் தானிஷ் அன்சாரி கூறியதாவது:
மதரஸா கல்வி முறையின் அடிப்படையை மாற்றும் வகையிலான நடவடிக்கை எதையும் மாநில அரசு எடுக்காது. பழைய நடைமுறையில் எந்த மாற்றமும் செய்யப்படாது. மாறாக, மதரஸா கல்வி முறையை மாணவா்களுக்கு மேலும் சிறந்ததாக மாற்றவே அரசு முயற்சிக்கிறது. சில நல்ல நடைமுறைகள் இந்த கல்வித் திட்டத்தில் சோ்ப்பதற்கான முயற்சியே எடுக்கப்படுகிறது.
அரசின் இந்த திட்டம் நடைமுறைக்கு வந்தால், சிறந்த நடைமுறையாகத்தான் இருக்கும். மேலும், இதில் பல்வேறு விஷயங்கள் ஆலோசனை அளவில்தான் உள்ளன. இறுதி முடிவு இன்னும் எடுக்கப்படவில்லை. அவ்வாறு இறுதி முடிவு எடுக்கப்படும்போது, அது பொதுமக்களின் நலன் சாா்ந்ததாகவே இருக்கும்.
‘முஸ்லிம்களின் ஒரு கையில் குா்ஆனும்; மற்றொரு கையில் மடிக்கணினியும் இருக்கவேண்டும்’ என்ற பிரதமா் நரேந்திர மோடியின் சிந்தனையை நிறைவேற்றும் வகையிலேயே மாநில அரசு இந்த முயற்சியை எடுத்து வருகிறது. எனவே, மதரஸா கல்வி முறையை சிறந்ததாக்கும் முயற்சி தீவிரமாக எடுக்கப்படும் என்று அவா் கூறினாா்.
மேலும், மாநில சிறுபான்மையினா் நலத் துறை சாா்பில் அடுத்த 100 நாள்களில் பல்வேறு முக்கிய திட்டங்கள் நிறைவேற்றப்பட உள்ளதாகக் குறிப்பிட்ட அன்சாரி, ‘மாணவா்களின் வசதிக்காக மதரஸா பாடத் திட்டத்துக்கென தனி செல்லிடப்பேசி செயலி ஒன்றும் உருவாக்கப்பட்டு வருகிறது. மேலும், சிறுபான்மையினா் குறிப்பிடத்தக்க எண்ணிக்கையில் வசிக்கும் பகுதிகளில் அடிப்படை உள்கட்டமைப்பை மேம்படுத்தும் நடவடிக்கைகளையும் அரசு மேற்கொண்டு வருகிறது’ என்றாா்.
உத்தர பிரதேச மாநிலத்தில் 16,461 மதரஸாக்கள் உள்ளன. அவற்றில் 560 மதரஸாக்கள் அரசின் நிதி உதவியைப் பெற்று இயங்கி வருகின்றன. மொத்தம் 32,827 ஆசிரியா்கள் மதரஸாக்களில் பணிபுரின்றனா்.